Yazıçılar Birliyində Çingiz Aytmatov haqqında kitabın təqdimatı olub

Ötən gün Yazıçılar Birliyində (AYB) "Çingiz Aytmatov: Mən Manas oğluyam" kitabının təqdimat mərasimi keçirilib. Giriş sözüylə çıxış edən AYB-nin sədri, xalq yazıçısı Anar Ç.Aytmatov yaradıcılığının böyük əhəmiyyətini vurğulayaraq, onun ədəbi irsinin Azərbaycanda da çox sevildiyini, demək olar ki, bütün əsərlərinin dilimizə tərcümə edildiyini nəzərə çatdırıb: "Qırğız xalqı bəşəriyyətə dünyanın həcmcə ən iri eposu olan "Manas" dastanı ilə yanaşı, ümumtürk köklərimiz baxımından, soydaşımız sayıla biləcək Çingiz Aytmatovu da bəxş edib. Onun imzası və əsərlərilə təkcə qırğızlar deyil, bütün türk dünyası, o cümlədən Azərbaycan xalqı fəxr edir".

"Çingiz Aytmatov ona görə nəhəng sənətkardır ki, min illərin zəngin türk mədəniyyətini öz yaradıcılığında məhz tarixi inkişaf məntiqi ilə əks etdirib. Çingiz Aytmatovun məntiqi ilə sintaksisi arasında əlaqə hansısa "akademik" stixiya ilə nizama salınır. Həmin stixiya türk dastanlarının hamısında var. O, bu mənada da türk mədəniyyətinin fenomenidir". Bu fikirləri tədbirdə Atatürk Mərkəzinin direktoru, professor Nizami Cəfərov səsləndirib.

Professor Tofiq Məlikli təqdim olunan kitabın Ç.Aytmatovun yaradıcılığını tədqiq etmək istəyənlər üçün qiymətli mənbə olacağına əminliyini bildirib.

Səbayel rayon icra hakimiyyətinin başçısı Sahib Ələkbərov vaxtilə böyük yazıçı ilə bir neçə dəfə görüşdüyünü deyərək, onunla bağlı maraqlı xatirələrini dilə gətirib.

Rusiyanın ölkəmizdəki səfiri Vladimir Doroxin Ç.Aytmatovun dünya ədəbiyyat xəzinəsinə dəyərli əsərlər bəxş etdiyini vurğulayıb.

Rejissor Tofiq İsmayılov qırğız kinosunun inkişafının Ç.Aytmatovun yaradıcılığı ilə bağlı olduğunu qeyd edərək, onun dərin fəlsəfi əsərləri əsasında maraqlı ekran nümunələrinin meydana gəldiyini bildirib.

Kitabın tərtibçisi, şairə-publisist Südabə Sərvi nəşrə həm Ön söz, həm də Son yazıb. O, Ç.Aytmatovu dahi şəxsiyyət adlandıraraq, belə böyük insanlar haqqında kitab yazıb gələcək nəsillərə çatdırmağın məsuliyyətli iş olduğunu, görkəmli ədibin "bir Manas oğlu olaraq ruhunun, adının həmişə dərin hörmətlə anılacağını" qeyd edib. Kitab AYB-nin 75 illiyi münasibətilə hazırlanan silsilədən növbəti nəşrdir. Burada böyük yazıçı haqqında sənədlər, məqalələr, xatirələr, müsahibələr və fotoşəkillər toplanıb. Topluda dünyanın tanınmış qələm adamlarından Lui Araqon, Muxtar Auezov, Süleyman Dəmirəl, eləcə də ölkəmizin məşhur şair və yazıçılarının Ç.Aytmatov haqqında fikirləri yer alıb.    

Sevinc MÜRVƏTQIZI

525-ci qəzet.- 2009.- 25 iyun.- S.7.