Litvalı alim Azərbaycanlıların soyqırıma məruz qalmaları ilə bağlı oçerk yazıb

Litvalı tarixçi, etnoloq və siyasi şərhçi İmantas Melyanas "Azərbaycan xalqına qarşı soyqırım (1905-1994)" adlı tarixi oçerk yazıb. Bu barədə Diasporla İş üzrə Dövlət Komitəsinin mətbuat xidməti məlumat verib. Qeyd edilib ki, litva dilində yazılan oçerk "Soyqırım və müqavimət" ("Genocidas ir rezistencija") elmi jurnalında dərc olunub. Bu, təkcə Litvada deyil, Baltikyanı ölkələrin tarixində dövlətə məxsus elmi nəşrdə dərc olunan Azərbaycan haqqında ilk tarixi yazıdır. Oçerk müəllifinin məqsədi Litva oxucularını insanlıq tarixinin daha bir qara səhifəsi ilə tanış etməkdir. Litva Yəhudiləri İcması Şurasının sədri, Litva Xalqları İnformasıya Palatasının (İNFORUM) İdarə Heyətinin sədri, Litva-Azərbaycan Assosiasiyasının həmtəsisçisi Vitaliyus Karakorskis oçerk haqqında fikirlərini bölüşərkən deyib ki, müəllif obyektivliyə nail olmaq üçün Litvadakı erməni diasporunun nümayəndələrinə sözügedən hadisələrlə bağlı onlarda olan materialları təqdim etmələri məqsədilə müraciət edib. Burada erməni diasporu ilə yanaşı fransız və rus mənbələrindən də istifadə olunub. Lakin İmantas Melyanas Azərbaycan tarixi qaynaqlarını əsas görütüb. Bu oçerkin yazılmasında tarixçi alimə Baltik Azərbaycanlıları Konqresi, Litva Azərbaycanlıları Cəmiyyəti xüsusi kömək göstəriblər.

Qeyd edək ki, Qafqazdakı proseslərə dair araşdırmaları ilə tanınan alim İmantas Melyanas vaxtaşırı türkçülük, Qafqaz və islam dini mövzusunda yazilarla çıxış edir.

P.SULTANOVA

525-ci qəzet.- 2009.- 25 iyun.- S.3.