Dövlət qulluqçularının fəaliyyətinə həsr edilən tədbir keçirilib

Dünən Azərbaycan Respublikasının Prezidenti yanında Dövlət Qulluğu Məsələləri üzrə Komissiya "Dövlət qulluqçularının fəaliyyətlərinin qiymətləndirilməsinə dair seminar" keçirib. Tədbir dövlət qulluğu sahəsində ixtisaslaşmış beynəlxalq təşkilat olan SİGMA ilə birlikdə təşkil olunub. Tədbirə dövlət rəsmiləri, dövlət orqanlarının mərkəzi icra aparatlarının kadr qurumlarının rəhbərləri, beynəlxalq təşkilatların nümayəndələri və ekspertlər qatılıb. Seminarın açılışında çıxış edən komissiyanın sədri Bəhram Xəlilov tədbirin keçirilməsində əsas məqsədin ölkədə dövlət qulluğu sahəsində aparılan islahatlara dəstək vermək olduğunu bildirib: "Seminarda beynəlxalq ekspertlər dünyada mövcud olan ən yaxşı təcrübələri Azərbaycanın dövlət qurucuları ilə bölüşəcək. Bu seminar DQMK-nın SİQMA ilə keçirdiyi ilk tədbirdir. Bundan sonra dövlət qulluqçularının fəaliyyəti ilə bağlı bir neçə seminar keçiriləcək. Bu tədbirlər isə dövlət qulluqçularının fəaliyyətinin qiymətləndirilməsi işinin aparılmasına köməklik edəcək. Bu işi həyata keçirmək üçün Azərbaycanda müvafiq qanunvericilik bazası olsa da, hələlik bu mümkün olmayıb. Dövlət qulluqçularının fəaliyyətinin qiymətləndirilməsi onların vəzifədə yüksəlişinə də şərait yarada bilər".

Daha sonra çıxış edən Prezident Administrasiyasının Kadr məsələləri şöbəsinin Kadr siyasəti sektorunun müdiri Vasif Xələfovun sözlərinə görə, dövlət qulluğunda qiymətləndirmənin tətbiqinin dövlət qulluqçularının həvəsləndirilməsi və liderlik təşəbbüslərinin inkişafına böyük rol oynaya bilər: "Dövlət qulluqçularının xidmətlərinin qiymətləndirilməsi ilə bağlı sistemin yaradılması korrupsiya ilə bağlı qanunvericilik aktlarında da nəzərdə tutulub. Beynəlxalq təcrübə göstərir ki, dövlət qulluqçularının fəaliyyətinin qiymətləndirilməsi təkcə dövlət qulluqçularının maddi vəziyyətinin yaxşılaşdırılması ilə nəticələnmir. Onlar üçün layiqli iş şəraitinin yaradılması və müəyyən üstünlüyə malik olması vacibdir. Bu gün Azərbaycanda dövlət qulluqçuları güzəştli ipoteka kreditləri almaq, yaxşı təqaüdlə təmin edilmək kimi üstünlüklərə də malikdir. Bundan başqa 2006-2009 illər ərzində dövlət qulluğunda uzunmüddətli, səmərəli fəaliyyətinə görə 229 nəfər "Dövlət qulluğunda fərqlənməyə görə" medalı, 42 nəfər isə "Vətənə xidmət" medalı ilə təltif edilib".

Qeyd edək ki, tədbir çərçivəsində qulluqçuların xidməti fəaliyyətinin qiymətləndirilməsi üsulları və dövlət qulluqçularının işinin təkmilləşdirilməsi üçün kadrların idarəedilməsi vasitələri barədə beynəlxalq təcrübə haqqında iştirakçılara məlumat verilib.

P.SULTANOVA

525-ci qəzet.- 2009.- 25 iyun.- S.5.