"Adəm və
Həvva" ictimaiyyətə
təqdim olundu
İyunun 27-də
R.Behbudov adına Dövlət Mahnı Teatrında yazıçı-dramaturq Elçin Hüseynbəylinin "Adəm
və Həvva" pyesi əsasında hazırlanan tamaşanın
premyerası keçirildi.
İrəvan Dövlət
Dram Teatrının yaradıcı kollektivi tərəfindən səhnələşdirilən
tamaşaya teatrın baş rejissoru Nazir Rüstəmov quruluş verib. İkihissəli tamaşada əsas rolları - Adəm və Həvvanı Pərviz Gülməmmədovla
Elnarə Heydərova ifa edirlər. Səhnə əsərində
digər rolları xalq artisti Süleyman
Nəcəfov (hakim), əməkdar artist Vaqif Kərimov (məhkəmə katibi), Nurbəniz Niftəliyeva (prokuror), Samir Bayramov (I vəkil), Əhliman Ərşadov
(II vəkil), Niyaməddin
Səfərəliyev (İblis)
oynayırlar. Tamaşanın
musiqi tərtibatçısı
əməkdar artist Sevda Ələkbərzadədir.
Premyeranı izləmiş
şair İlyas Tapdıq, bizimlə söhbətində,
tamaşadan böyük zövq aldığını dedi:
"Həm əsərin məzmunu, həm də onun uğurlu
səhnə həllini çox bəyəndim. Tamaşanın
musiqisi də çox gözəldir. İnanıram ki, burada səslənən
mahnı gənclərin dilinin əzbəri olacaq".
Şair-publisist Südabə
Sərvinin fikrincə, müəllif bu əsər vasitəsilə
insanlara demək istəyir ki, əsl sevgi həmişə var
və olacaq: "Çünki sevgi bəşəriyyətin
xilas yoludur. Əsərin səhnə həlli də xoşuma
gəldi. Xüsusilə prokuror rolunu ifa edən Nurbəniz Niftəliyevanın
təbii oyunu diqqətimi çəkdi".
E.Hüseynbəyli pyesi
bir oyun kimi qələmə aldığını, İrəvan
Dram Teatrının əsəri öz təşəbbüsü
ilə pyes kimi səhnələşdirdiyini dedi. Əsərin
səhnə həllinin onu qane etdiyini bildirən E.Hüseynbəyli
hər bir bədii əsərə rejissorun fərqli
yanaşma sərgiləməyə ixtiyarının
olduğunu nəzərə çatdırdı.
Quruluşçu rejissor
N.Rüstəmov gənclər üçün nəzərdə
tutulan tamaşanın yarıgerçəklik-yarıyalan
üzərində qurulduğunu, səhnə əsərində
məkan və zaman məfhumunun olmadığını önə
çəkdi: "Əsərdə söhbət Adəm və
Həvvanın insanları əsl sevgiyə, məhəbbət
yoluna qaytarmaq cəhdindən gedir. Lakin onlar yeni dövrə
inteqrasiya oluna bilmirlər. Bununla da Adəm və Həvva
insanları tərk edir".
Tamaşanın
premyerasına tanınmış sənət adamları və
ziyalılarla yanaşı tələbələr və
ictimaiyyət numayəndələri də baxıblar.
Sevinc MÜRVƏTQIZI