Ərdoğan azərbaycanlı rəssamın
sərgisinin açılışına
qatılıb
İstanbulun Topkapı səmtində Polis Təhsil və Konqres Mərkəzinin açılışı çərçivəsində azərbaycanlı rəssam Sənan Eynullayevin bal mumundan hazırladığı sərgi nümayiş etdirilib. APA-nın Türkiyə bürosunun xəbərinə görə, Polis Təhsil və Konqres Mərkəzinin açılışında Türkiyənin baş naziri Rəcəb Tayyib Ərdoğan da iştirak edib. Baş nazir daimi sərgi üçün hazırladığı bal mumu heykəllərinə görə S.Eynullayevə təşəkkürünü bildirib. Daimi sərgidə Türkiyə Cümhuriyyətinin qurucusu Qazi Mustafa Kamal Atatürk, baş nazir R.T.Ərdoğan, İstanbul valisi Müəmmər Gülər, mərkəzi inşa edən iş adamı Sami Şener və başqalarının heykəlləri nümayiş olunur. Bal mumu heykəllərinin paltarlarını isə Türkiyənin məşhur kişi geyimləri modelyeri Faruk Saraç hazırlayıb. Rəssamla modelyer heykəllər üzərində 6 ay işləyiblər.