Moskvada Adil Şirinin şeirlər kitabı nəşr edilib
Bu günlərdə
Moskvanın İPO "U Nikitskix vorot" nəşriyyatında
şair Adil Şirinin "Bədrlənmiş ay"
("Polnolunie") adlı şeirlər kitabı işıq
üzü görüb. Professor Elçin İsgəndərzadənin
rəyi ilə çap olunan kitabdakı şeirləri rus
dilinə tərcüməçi Nicat Məmmədov
çevirib. Kitabın ön söz müəllifi və
redaktoru Rusiya Yazıçılar Birliyinin katibi, "Rossiyskiy
kolokol" jurnalının baş redaktoru Maksim Zamşevdir. M.Zamşev
yazdığı önsözdə Adil Şirini müasir Azərbaycan
ədəbiyyatının tanınmış nümayəndəsi
kimi səciyyələndirərək, onun şeirlərində
ifadə olunan vətənpərvərlik duyğularını
təqdir edib: "Şairlər öz millətinin səsidir.
Yaxşı şairlərin yaradıcılığında
öz xalqının etika və estetikası bədii əksini
tapır, tarixin nəfəsi duyulur və gələcəyə
inam ifadə olunur. Adil Şirinin şeirlərində də
milli ənənələr müasir ədəbi
dünyagörüşlə uzlaşır. Onun şeirinin qəhrəmanları
vətəninə, təbiətinə bağlıdır. Adil
Şirinin yeni kitabı doğma Azərbaycana həsr olunan nəğmələrin
məcmusudur". M.Zamşev məhz şairlərin
dünyanı mənəvi böhrandan qurtara biləcəyinə
əminliyini yazıda ifadə edib və Adil Şirinin də
belə şairlərdən olduğunu vurğulayıb. Kitabdakı
şeirlər "Aşiq dağlar", "Ana, mənə
görə ağlama", "Sabaha ümid var" bölmələrində
toplanıb.
İlk
bölmədə yer alan "Mənə nə oldusa, sevgidən
oldu", "Payız ayrılığı", "Sevgi
yağışı", "Mahnı qanadlarında",
"Sirli sevgilər", "Sevgi" kimi şeirlərdə
əsasən əzəli-əbədi sevgi mövzusu qələmə
alınıb. Bölmədə təqdim olunan bu kimi şeirlərdə
Adil Şirinin lirik qəhrəmanı iztirab çəkən,
sevən, qısqanan biridir. Lakin bu hisslər fərqli aspektdən,
fərqli baxış bucağından qələmə
alınması ilə seçilir.
"Anama"
şeiri ilə açılan "Ana, mənə görə
ağlama" bölümündə şairin əsasən
dostlarına və onun şair qəlbini tərpədən
müxtəlif mövzulara həsr olunmuş şeirləri
oxucuların ixtiyarına verib. Bu bölmədəki
"Avtoportret", "Gözəl günah", "Xəbər
al", "Kimə deməli", "Yenə dağları
xatırladım", "Buludlar", "Yuxu" kimi
şeirlərində Adil Şirin bəzən təbiət
hadisələrinin fonunda öz fəlsəfi dünyagörüşünü
ifadə edib.
"Sabaha
ümid var" başlığı altında oxuculara təqdim
olunan şeirlər də əsasən təbiət hadisələri
ilə həmahəng insan hisslərini, ovqatının, əhval-ruhiyyəsinin
təsvirindən ibarətdir. "Qəbrimə qar
yağır", "Ulduzsuz göydə", "O gün gəlib",
"Şair dostlarıma", "Kəpənək",
"Həyatdan fraqmentlər", "Ümid",
"Qırmızı çətir" "Məktub"
şeirləri bu baxımdan xüsusilə diqqəti çəkir.
Kitabda
şairin "Rekviyem", "Laçın şikəstəsi"
əsəri və böyük türk şairi Nazim Hikmətə
həsr etdiyi poema da yer alıb.
"Rekviyem" simfonik poemasında
şair əsasən Qarabağ dərdini əks etdirib. Xalqımızın
başına gətirilən çoxsaylı faciələr və
bu faciələrin qurbanına çevrilmiş insanların təsviri
poemanın əsas məzmun yüküdür. "Bu torpaq
ağrıdan yata bilmir" misrası ilə başlayan poemada
qaçqınların çəkdiyi dərdlər,
onların üzləşdiyi faciələrin
ağırlığı özünü bədii
sözün ifadəsində tam göstərə bilib. Amma bədbin
notlarla qələmə alınan poemada sabaha inam, vətənimizin
üzləşdiyi problemləri dəf edəcəyinə bir
inam da sezilir. Poemanın sonunda təsvir olunmuş ümid
misralara çevrilərək oxucularda da buna inam yaradır.
Adil Şirinin Nazim Hikmətə həsr
olunan poemasında böyük şairlə bağlı fikirlər
bədii formada öz əksini tapıb. Nazim Hikmətin məşhur
"Mən bir ceviz ağacıyam Gülhanə
parkında" isrası ilə açılan poemada Adil
Şirin onu özünün müəllimi adlandırıb.
"Laçın
şikəstəsi" poemasında şair əsasən
Qarabağ ağrı-acılarını şeir dilinə
çevirib. Doğulduğu doğma Laçın
torpağının dərdinin, xiffətinin,
ağrısının ifadəsindən ibarət poemada
şairin vətən həsrəti göynərtili misralara
çevrilib.
Xatırladaq
ki, 10-a qədər kitabın müəllifi olan Adil Şirin
Azərbaycan və "Avrasiya" Yazıçılar
Birliyinin üzvüdür. Şair bu yaxınlarda Rusiya
Yazıçılar Birliyinə də üzv qəbul edilib. Birliyin
"Puşkin" medalına layiq görülən A.Şirin
həmçinin Nazim Hikmət və Şahmar Əkbərzadə
adına beynəlxalq ədəbiyyat mükafatları
laureatıdır. Şair Türk Dünyası Beynəlxalq
Elmi Araşdırmalar Mərkəzinin fəxri doktorudur.
Sevinc MÜRVƏTQIZI