Hafiz Paşayevin "Yüksəkliyə doğru" kitabının Azərbaycan dilində nəşri təqdim edilib

Dillər Universitetinin Amerika Mərkəzində xarici işlər nazirinin müavini, Diplomatik Akademiyanın rektoru professor Hafiz Paşayevin "Yüksəkliyə doğru" kitabının Azərbaycan dilində nəşrinin təqdimatı keçirilib. Azərbaycan Marketinq Cəmiyyətinin və Amerika Təhsilli Azərbaycan Məzunları Assosiasiyasının (ATAMA) təşkilatçılığı ilə keçirilən mərasimi giriş sözü ilə açan ATAMA-nın sədri Ceyhun Kərəmov əvvəlcə müəllifin fəaliyyət yolundan danışıb. O bildirib ki, görkəmli diplomat Hafiz Paşayev 1993-cü ilin fevralından 2006-cı ilin iyununa qədər Vaşinqtonda Azərbaycanın ABŞ-dakı ilk səfiri kimi müvəffəqiyyətlə çalışıb. Səfir işlədiyi dövrdəki fəaliyyətini əks etdirən müxtəlif materiallar kitab şəklində 2006-cı ildə Vaşinqtonda ingilis dilində nəşr edilib: "Oxucuların marağı nəzərə alınaraq, kitab Azərbaycan Marketinq Cəmiyyətinin təşəbbüsü ilə dilimizə tərcümə olunub. Kitaba müəllifin Amerika universitetlərində, müstəqil tədqiqat mərkəzlərində, habelə ABŞ-ın 30-dan çox ştatında keçirilən biznes forumlardakı çıxışları, Amerika mətbuatında dərc olunmuş bir sıra məqalələri, müsahibələri və bəyanatları daxil edilib". C.Kərəmov oxucuların bu nəşr vasitəsilə Azərbaycanın ABŞ-dakı səfirliyinin açılmasından etibarən meydana gələn ikitərəfli əlaqələrin mürəkkəb inkişaf dinamikası barədə ətraflı məlumat almaq imkanı qazanacaqlarını qeyd edib.

Dillər Universitetinin prorektoru Natiq Yusifov, Azərbaycan Marketinq Cəmiyyətinin sədri Rəhim Hüseynov, İqtisad Universitetinin rektoru, Milli Məclisin elm və təhsil məsələləri daimi komissiyasının sədri Şəmsəddin Hacıyev, BDU-nun professoru Abuzər Xələfov, tərcüməçi Xumar Hüseynova və başqaları kitabın məziyyətlərindən söz açıblar. Qeyd edilib ki, burada toxunulan məsələlərin - Xəzərin enerji ehtiyatlarının Qərb ölkələrinə çatdırılması, regional münaqişələrin həlli, yeni müstəqil dövlətlərdə demokratiyanın dəstəklənməsi, Cənubi Qafqazda təsiri gücləndirmək üstündə geosiyasi rəqabət və ABŞ-ın xarici siyasətinin formalaşdırılmasında Konqresin rolu kimi məsələlərin əhəmiyyəti Amerika-Azərbaycan əlaqələri çərçivəsindən çox-çox geniş miqyaslıdır. Azərbaycanlı oxucular buradakı materiallar əsasında ölkəmizin beynəlxalq aləmdə özünü təsdiqləmək üçün keçdiyi çətin yol, aradan qaldırılan maneələr barədə aydın təsəvvürə malik ola biləcəklər".

Professor Hafiz Paşayev kitabın yazılma səbəbi, nəşr prosesi, habelə okeanın o tayında Azərbaycan diplomatlarının fəaliyyəti barədə danışıb. Müəllif ümummilli lider Heydər Əliyevin 1997-ci il iyulun 27-dən avqustun 7-dək davam edən ABŞ-a ilk rəsmi səfəri, keçirdiyi görüşlər haqqında xatirələrini danışıb. H.Paşayev prezident İlham Əliyevin 2006-cı ilin aprelində ABŞ-a səfərinin, prezident Buşla, digər dövlət rəsmiləri ilə danışıqlarının, səmimi söhbətlərinin ölkələrimiz arasında münasibətlərin inkişafında yeni mərhələ açdığını bildirib: "Kitabın 1993-94-cü illəri əhatə edən birinci fəsli "Azərbaycanın Vaşinqton xəritəsində yerləşdirilməsi", 1995-2001-ci illəri əhatə edən ikinci fəsli "ABŞ-Azərbaycan münasibətlərinin möhkəmlənməsi", 2001-2006-cı illəri əks etdirən üçüncü fəsli isə "Əməkdaşlıqdan strateji tərəfdaşlığa doğru" adlanır. Bunlar həm də iki dövlət arasında əlaqələrin inkişaf mərhələlərini göstərir".

Sevinc MÜRVƏTQIZI

525-ci qəzet.- 2009.- 14 mart.- S.18.