Azərbaycanlı rəssamlar Rusiya Rəssamlıq Akademiyasının fəxri üzvü seçiliblər

Rəssamlar İttifaqının katibi Salhab Məmmədov və əməkdar incəsənət xadimi Çingiz Fərzəliyev Rusiya Rəssamlıq Akademiyasının fəxri üzvü seçilib. Bu barədə APA-ya Mədəniyyət və Turizm Nazirliyinin mətbuat katibi İntiqam Hümbətov məlumat verib. İ.Hümbətovun sözlərinə görə, bu münasibətlə fəxri titulların təqdimat mərasimi keçirilib. Həmin mükafatları hər iki rəssama Rusiya Rəssamlıq Akademiyasının vitse-prezidenti, xalq rəssamı Tahir Salahov, Rusiyanın Azərbaycandakı səfiri Vladimir Doroxin təqdim ediblər. Mərasimdə Azərbaycan Rəssamlıq Akademiyasının rektoru, xalq rəssamı Ömər Eldarov, Moskva Dövlət Universitetinin Bakı Filialının rektoru, professor Nərgiz Paşayeva, mədəniyyət və turizm naziri Əbülfəs Qarayev, akademik Vasim Məmmədəliyev, xalq yazıçıları Maqsud İbrahimbəyov, Çingiz Abdullayev və digər tanınmış mədəniyyət, incəsənət xadimləri, dövlət rəsmiləri iştirak ediblər.

525-ci qəzet.- 2009.- 5 noyabr.- S.7.