Ankarada Anarın yeni kitabının təqdimatı olub

Türkiyənin “Bənqu” nəşriyyatı xalq yazıçısı Anarın “Kerem gibi” (Nazım Hikmətin həyatı və sənəti haqqında düşüncələr) kitabını çap edib. 1000 tirajla nəşr olunmuş 340 səhifəlik kitabın 260 səhifəsi “Giriş”dən və iki hissədən ibarət mətndir. Qalan səhifələrdə Nazım Hikmətin indiyəcən Türkiyədə çap olunmamış məqalələri verilib. Bu yazılar sırasında böyük şairin Əkbər Babayevlə öz həyatı və yaradıcılığı haqqında geniş söhbəti, habelə Azərbaycanla bağlı “Xalqın malı olan sənət”, “Azərbaycan mədəniyyəti haqqında düşüncələr”, “Dostluq toplantısı”, “Dostum Rəsul Rza”, “Aydındır şeirin dili”, “İkinci nəfəs” başlıqlı məqalələri yer alıb.

Kitabda həmçinin Azərbaycan şairlərindən Mikayıl Rəfilinin, Əli Nazimin, Səməd Vurğunun, Süleyman Rüstəmin, Rəsul Rzanın, Mirvarid Dilbazinin, Nigar Rəfibəylinin, Bəxtiyar Vahabzadənin, Qabilin, Xəlil Rza Ulutürkün, Məmməd Arazın, Fikrət Sadıqın, Fikrət Qocanın, Vaqif Səmədoğlunun, Tofiq Məliklinin, Nüsrət Kəsəmənlinin, Sabir Rüstəmxanlının, Ramiz Rövşənin Nazım Hikmətə ithaf olunmuş şeirləri dərc edilib.

Kitabın sonunda Anarın Türkiyənin Baş naziri Rəcəb Tayyib Ərdoğana Nazım Hikmətə Türkiyə vətəndaşlığının qaytarılması münasibətilə təşəkkür məktubu və “Zəfərin mübarək, Nazım” yazısı verilib.

Nazım Hikmətin Azərbaycanın ədəbiyyat, elm və sənət adamlarıyla çəkilmiş 50 fotoşəkliylə tamamlanan kitab Avrasiya Yazarlar Birliyinin təşəbbüsüylə nəşr olunub.

Mətni Türkiyə türkcəsinə uyğunlaşdıran İmdat Afşar kitaba önsöz yazıb. Kitabın redaktorları Fəthi Gədikli, Qonuralp İren, Murat Sözərdir.

Noyabrın 2-də Ankarada Sərgilər və Konqreslər Mərkəzində kitabın təqdimat mərasimi keçirilib. Mərasimdə yazıçılar, elm və siyasət adamları, çox sayda jurnalistlər iştirak ediblər. Avrasiya Yazarlar Birliyi başqanı Yaqub Dəliöməroğlu və Anar çıxış edib, müxbirlərin suallarına cavab veriblər. Xüsusi qeyd olunub ki, vaxtilə Nazım Hikmətin ilk kitabı Türkiyədən öncə Azərbaycanda nəşr olunduğu kimi, Anarın da böyük şairə həsr olunmuş bu əsəri Azərbaycandan əvvəl Türkiyədə işıq üzü görüb.

TRT-İNT və AVAZ televiziya kanallarında Anarla qırx dəqiqəlik söhbət efirə verilib. Yazıçı TRT-1, Kanal D və başqa kanallara, habelə “Hürriyət”, “Milliyət”, “Cümhuriyət”, “Zaman”, “Yeni Şəfəq” qəzetlərinə, “Qardaş qələmlər” və bir sıra başqa dərgilərə geniş müsahibələr verib.

“Hürriyət” qəzeti “Tanımadığın Hikmət” başlığını manşet kimi birinci səhifədə dərc edib. Yazıda deyilir: “Hayattaykən Nazımla tanışma və görüşmə imkanı bulan nadir düşüncə və ədəbiyyat adamlarından Anarın kendisinə aid və ya eşitdiyi tanıklıqlarla zənginləşdirdiyi “Kerem gibi” adlı kitabının tanıtımı olacaq. Ünlü yazar Anar qonaqlara həm kitabı haqqında bilgi verəcək, həm də soruları cavablandıracaqdır”.

“Olay” qəzeti də “Türk sağı Nazım Hikmeti kəşf etdi” başlığını manşetə çıxararaq birinci və səkkizinci səhifələrində Dursun Erkılıcın böyük yazısını verib. Yazıda deyilir:

“Yazımın başlığını “Türk sağı Nazım Hikmeti kəşf etdi” deyə adlandırmağımın səbəbi dəvət yazısına bağlıdır. Avrasiya Yazarlar Birliyi bizləri oraya çağırarkən “Tanımadığımız Nazım Hikmət ilə tanışmaya dəvətlisiniz” – deyir.

Gerçəkdən də öylə. Ən azı Necip Fazıl Kısakürək qədər, ən azı Atilla İlhan qədər Nazım Hikməti də oxumuş biri olaraq biliyorum ki, türk sağı Nazım Hikməti tanımıyor. “Kerem gibi” adlı kitabın Türkiyədə yayınlanmasına vəsilə olan və bu axşamkı çox önəmsədiyim buluşmanı gerçəkləşdirən bəzi dotslarla söhbətimizdə böyük bir cəsarətlə dilə gətirilən “Nazımi Hikmət bizə yanlış anladılmış” gerçəyi bu kitab ilə yıxılıb, yerinə “Nazım gerçəyi” oturacaq”.

Bu sözlərdən sonra Dursun Erkılıc kitabda Anarın yazdığı girişdən bir parçanı nümunə gətirir:

“Nazımın ölməz yaradıcılıq mirası, yalnız onun dünyagörüşünü paylaşanların deyil, bütün türk xalqınındır – sağçısıyla, solçusuyla və nə sağçı, nə solçu olmayan böyük çoğunluğuyla... Onun mirası öncə bütün türk dünyasınındır, sonra bütün insanlığın. “Türk dünyası” ifadəsinə əminəm bəzi solçular bir az ürkərək, şübhə və əndişəylə yanaşacaqdır. Bəzi sağçılar isə Nazımı bu dünyaya qəbul etmək belə istəməzlər. Bunlar əbəs cəhdlərdir. Dədə Qorqudsuz, Yunus Əmrəsiz, Nəvaisiz, Füzulisiz bir türk dünyası olmayacağı kimi, Nazım Hikmətsiz də bir türk dünyası olamaz... O illərdə Nazım Türkiyədə bir çoxları üçün “Moskvanın adamı”, “Türk düşmanı” idisə, azərbaycanlılar üçün Türkiyənin, Türklüyün, Türk dilinin simvoluydu. Nazımı bitib tükənməyən alqışlara qərq edən Bakı salonlarındakı dinləyicilər onun şəxsində bir kommunist propoqandaçısını deyil, bizə uzun illər həsrətini çəkdiyimiz Türkiyənin qoxusunu, ruhunu gətirən, canımız qədər yaxın olan Türk dilində qonuşan, ölümsüz şeirlərini türkcə oxuyan – həm də möhtəşəm oxuyan – bir türk şairini alqışlayırdı”.

Dursun Erkılıc davam edir:

“Yaqub Dəlioöməroğlu başkanlığında önəmli fəaliyyətlə diqqət çəkən Avrasiya Yazarlar Birliyi ilə, Türkiyəni və Türkcə sevdalıları qucaqlaşdıracaq böyləsinə önəmli bir kitaba imza atan Azərbaycan Yazıçılar Birliyi başqanı Anarı ürəkdən qutlamaq gərəkiyor. Qələmlərinə, ürəklərinə, əməklərinə sağlıq”.

525-ci qəzet.- 2009.- 7 noyabr.- S.23.