Vaqif Bayatlı Ödər haqqında kitab nəşr olunub

Bugünlərdə “Elm və Təhsil” nəşriyyatında Mübariz Məsimoğlunun şair Vaqif Bayatlı Odərin həyatı, yaradıcılığı, şəxsiyyəti, fəlsəfi fikir sisteminə aid kitabı işıq üzü görüb. Professor Nizami Cəfərovun elmi redaktorluğu ilə çap olunan “Vaqif Bayatlı Odər” adlı kitabda şairin yaradıcılığı timsalında əsl sənətin qayəsi barədə mülahizələr və fikirlər öz əksini tapıb. Yeddi bölmədə təqdim olunan düşüncələrdə şair “Tanrı tərəfindən yer üzünə endirilən gül adamlardan biri” kimi səciyyələndirilib: “Vaqif Bayatlı Odər sözün həqiqi mənasında hər şeyi dəli bir eşqlə sevir, dəli bir eşqlə sevdirir. Vaqif Bayatlı Odərin əxlaqı sevməkdə Məcnun, sevdirməkdə Vaqif Bayatlı Odər əxlaqıdır. O, Məcnun kimi ayağa enib sevir, Vaqif kimi həmin enmə məqamının yüksəlişinə istinad edib sevdirir”. Müəllifə görə, “Vaqif Bayatlı Odər cismən bizim aramızdadır. Onun ruhu çoxdan göyüzündə dolaşır. Yaxşı ki, bu dünyada Vaqif Bayatlı Odər sözü var, yoxsa dünya daha da qaranlıq olardı...”

Kitabdakı fikirlər “Göy adamının yer həyatı”, “Bu Qaf dağı kimə bənzər”, “Üzünə ay işığı düşən şair”, “Yupyumru bir eşq ilə”, “Forma genişliyində təzahür edən məna ənginliyi”, “Yerüzünün bu başından göyüzünün o başına gedilən yol”, “Son sözə qədərki söz” bölümlərində təqdim olunub.

Sevinc MÜRVƏTQIZI

525-ci qəzet.- 2009.- 7 noyabr.- S.23.