“İslamda mədəniyyət və gözəllik amili” Bakıda müzakirə edilib

Noyabrın 9-da “Bakı İslam mədəniyyətinin paytaxtı-2009” mədəniyyət ili çərçivəsində Azərbaycan Milli Elimlər Akademiyasının (AMEA) Milli Azərbaycan Tarixi Muzeyində “İslamda mədəniyyət və gözəllik amili” mövzusunda beynəlxalq elmi-praktiki konfrans açılıb.

Mədəniyyət və Turizm Nazirliyi və Milli Azərbaycan Tarixi Muzeyinin birgə təşkilatçılığı ilə keçirilən tədbirdə 9 ölkənin (Rusiya, Misir, Albaniya, İordaniya, Türkiyə, Macarıstan və s.) 15 elmi-tədqiqat və ali təhsil müəssisələrinin nümayəndələri iştirak ediblər.

Konfransı giriş sözü ilə açan mədəniyyət və turizm nazirinin müavini Sevda Məmmədəliyeva Bakının 2009-cu ildə İslam mədəniyyətinin paytaxtı elan edilməsindən sonra Azərbaycanda bir-birindən maraqlı onlarla beynəlxalq tədbirin təşkil olunduğunu diqqətə çatdırıb: “İslam dünyası və Avropanın mədəniyyət xadimlərinin qatıldıqları bu tədbirlərdə xalqlar arasında elm və mədəniyyət sahələrində əməkdaşlığın daha da genişləndirilməsi məsələləri müzakirə edilib. Bu konfranslarda Azərbaycanın İslam sivilizasiyasına töhfələri təbliğ olunub və ölkəmiz özünü ev sahibi kimi doğruldub”.

S.Məmmədəliyeva Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, millət vəkili Mehriban Əliyevanın fəaliyyyəti nəticəsində mədəni irsin qorunması istiqamətində mühüm uğurlar əldə olunduğunun çıxışında vurğulayıb.

AMEA-nın prezidenti, akademik Mahmud Kərimov, Dini Qurumlarla İş üzrə Dövlət Komitəsinin sədri Hidayət Orucov, Rusiya Federasiyası Nijni Novqorod İslam İnstitutunun rektoru Dəmir Muxətdinov, Moskva Dövlət Mədəniyyət və İncəsənət Universitetinin müəllimi Nadejda Yemelyanova və Türkiyənin Mərmərə Universitinin nümayəndəsi Rəcəb Qaradağ da konfransda çıxış ediblər. Onlar yarandığı dövrdən bəri böyük bir coğrafi ərazidə yayılmış İslam dininin bu gün bir milyarddan artıq insanın ortaq dəyərinə və mədəni sərvətinə çevrildiyini, vaxt keçdikcə İslamın prinsip və dəyərlərinin bu dini qəbul etmiş xalqların mədəniyyətinin dərinliklərinə işlədiyini, onların tarixində silinməz izlər qoyduğunu bildiriblər. Çıxışlarda regionda tarixən dözümlülük mühitinin formalaşmasında İslam dininin mühüm əhəmiyyət kəsb etdiyi nəzərə çatdırılıb: “Mərhəmət, sevgi, gözəllik və əxlaq dini olan İslamda tolerantlıq ali mənəvi dəyər və yüksək mədəniyyət kimi qiymətləndirilir. Bu baxımdan əsrlər boyu regionda dinc və ayrı-seçkiliyə məruz qalmadan, müsəlmanlarla yanaşı yaşayan digər dinlərin daşıyıcıları buna görə həm də İslama – bu dinə xas olan yüksək dözümlülük mədəniyyətinə minnətdar olmalıdırlar”.

Qeyd edək ki, konfransda “İslam mədəniyyəti və ənənələrinin öyrənilməsində arxeoloji materialların rolu”, “İslam mədəniyyətinin təşəkkülündə Azərbaycan ziyalılarının rolu”, “İslamda harmoniya – dünya ilahiliyinin ifadəsidir”, “Azərbaycan folkloru islam kontekstində”, “İslamda qadına verilən dəyər və qadın hüquqlarının müdafiəsi”, “Müasir gəncliyin tərbiyəsində islamın rolu” və digər mövzularda məruzələr dinlənilib, mövzu ilə bağlı diskussiyalar, müzakirələr aparılıb. Tədbirə dünən yekun vurulub.

SARA

525-ci qəzet .- 2009.- 11 noyabr.- S.7.