“Azərbaycan – Macarıstan: mədəniyyətlərin dialoqu” mövzusunda konfrans olub

Budapeştdə “Azərbaycan-Macarıstan: mədəniyyətlərin dialoqu” silsiləsindən 4-cü beynəlxalq elmi konfrans keçirilib. Tədbir Azərbaycanın Macarıstandakı səfirliyinin təşəbbüsü, Diasporla İş üzrə Dövlət Komitəsinin təşkilati dəstəyi, Azərbaycan Milli Elmlər Akademiyasının İqtisadiyyat İnstitutu, Macarıstan Elmlər Akademiyasının Dünya İqtisadiyyatı İnstitutunun, eləcə də parlamentin Macarıstan-Azərbaycan Dostluq Qrupunun iştirakı ilə baş tutub. Bu ilki elmi forumun əsas mövzuları iqtisadiyyat, hüquq və siyasət məsələləri olub. Azərbaycanın Macarıstandakı səfiri Həsən Həsənov deyib ki, konfrans səfirliyin Budapeştdə keçirdiyi illik elmi forumlar silsiləsindən sayca dördüncüdür. Onun sözlərinə görə, konfrans iştirakçılarının sayının ilbəil çoxalması Macarıstan cəmiyyətinin Azərbaycana marağının artdığını göstərir. Səfir qeyd edib ki, budəfəki konfrans əvvəllər təklif edilmiş ideyaların inteqrasiya olunması, müzakirə edilən məsələlərin formatının və mövzu dairəsinin genişlənməsi baxımından öncəkilərdən fərqlənir. Sonra Macarıstan xarici işlər naziri Peter Balajın konfrans iştirakçılarına təbrik məktubu oxunub. Məktubda qarşılıqlı səylər sayəsində ikitərəfli münasibətlərin daha da dərinləşməsindən məmnunluq ifadə olunub. Həmçinin qeyd edilib ki, bu, həm siyasi dialoq səviyyəsində, həm də maarif, elm və mədəniyyət kimi sahələrdə əməkdaşlığın intensivliyinin getdikcə artmasında özünü göstərir. Dünya İqtisadiyyatı İnstitutunun böyük elmi işçisi Atilla Karoy Şooş Macarıstanın beynəlxalq iqtisadi böhrana münasibəti barədə danışarkən deyib ki, uzaqgörən Azərbaycandan fərqli olaraq, Macarıstan bu böhranı valyuta ehtiyatları toplamadan qarşılamalı olub, əvəzində külli məbləğdə xarici borcu yaranıb. Onun sözlərinə görə, böhran Macarıstan iqtisadiyyatına ağır zərbə vurub. Ölkə valyuta və maliyyə sektorunun strukturunu dəyişməli, milli fiskal siyasətdə islahatlar barədə fikirləşməli olub. AMEA İqtisadiyyat İnstitutunun direktor müavini Allahyar Muradov qeyd edib ki, energetika sahəsi ilə yanaşı, qeyri-neft sektoru da dövlət rəhbərlərinin diqqət mərkəzindədir və bu fakt ölkənin büdcəsində öz əksini tapıb. Macarıstan institutunun əməkdaşı Jujanna Lüdviq “Aİ ilə Azərbaycan arasında iqtisadi münasibətlər” mövzusunda məruzə edib. TASİS proqramının Azərbaycanın iqtisadi dirçəlişində rolu, Avropa İttifaqı ilə Azərbaycan arasında bağlanmış sazişlər haqqında söz açan J.Lüdviq deyib ki, son 10 ildə Azərbaycandan Aİ ölkələrinə ixrac 20 dəfə artıb. İndi xüsusən energetika sektorunda, Azərbaycan Aİ-nin Qafqazda ən iri tərəfdaşıdır. Onun sözlərinə görə, Azərbaycanın Dünya Ticarət Təşkilatına qəbul edilməsi məsələsi də, heç şübhəsiz, Azərbaycanla Avropa iqtisadi bazarı arasında iqtisadi münasibətlərə güclü təsir göstərəcək. Milli Məclisin deputatı, professor Xanhüseyn Kazımlı milli iqtisadiyyatın inkişafında Azərbaycanın uğurlarını əks etdirən statistik rəqəmlər səsləndirib.

P.SULTANOVA

525-ci qəzet.- 2009.- 11 noyabr.- S.3.