“Cavid ömrü” Bakı Slavyan Universitetində nümayiş etdirilib

Dahi Azərbaycan şair-dramaturqu Hüseyn Cavidin həyat yolu və yaradıcılığından bəhs edən “Cavid ömrü” filmi Bakı Slavyan Universitetində (BSU) nümayiş olunub. Filmin yaradıcı heyəti ilə görüş keçirilib. Görüşü universitetin nəzdində fəaliyyət göstərən Humanitar liseyin kollektivi təşkil etsə də, filmin nümayişinə və yaradıcı heyətlə görüşə həsr olunan tədbirə universitetin bütün fakültələrini təmsil edən fəal tələbələr, professor-müəllim heyəti qatılıb. BSU tədris prosesini maraqlı etmək, yaxşı mənada tələbəni və şagirdi təəccübləndirmək, gənclərin ədəbiyyatımıza həvəsini gücləndirmək məqsədilə bir sıra addımlar atır. Rektor Kamal Abdullanın təşəbbüsü ilə həyata keçirilməkdə olan “Auditoriya+” layihəsi gənclərin teatr, kino, incəsənət və ədəbiyyat xadimləri ilə sıx təması üçün real imkan yaradır. Bəlkə elə bunun nəticəsidir ki, bu universitetdə tələbə və şagirdlərin cəlb olunduğu çoxlu teatr, musiqi, rəqs, rəsm və başqa yaradıcılıq studiyaları fəaliyyət göstərir.

Şagird və tələbələrin, müəllim kollektivinin görüşünə gələn yaradıcı qrupun üzvləri: filmin rejissoru Ramiz Həsənoğlu, Mircəfər Bağırov rolunun ifaçısı, xalq artisti Ramiz Novruz, İblis rolunun ifaçısı, əməkdar artist Məmməd Səfa, Mişkinaz rolunun ifaçısı Dilarə Əliyeva, filmin quruluşçu rəssamı Adil Azay, Ərtoğrul rolunun ifaçısı Vüsal Murtuzəliyev, Turan rolunun ifaçısı Dəniz Tacəddin lisey şagirdlərinin hazırladıqlrı ədəbi-bədii kompozisiyanı maraqla qarşılayıb və onların suallarını böyük həvəslə cavablandırıblar. Liseyin direktoru, BSU-nun professoru Telman Cəfərov bildirib ki, dahi şairin və onun ailə üzvlərinin məşəqqətli həyatından, repressiyaya məruz qalan yazıçıların acı taleyindən bəhs edən bu film görüş ərəfəsində bütün lisey siniflərində, filologiya fakültəsinin bir sıra qruplarında nümayiş etdirilib.

S.QARAYEVA

525-ci qəzet.- 2009.- 12 noyabr.- S.7.