“Min bir gecə” nağılları haqqında yeni kitab nəşr olunub

AMEA Şərqşünaslıq İnstitutunun elmi işçisi, filologiya elmləri namizədi Lalə Bayramovanın “”Min bir gecə” ümumşərq ədəbiyyatının mədəni-tarixi abidəsi kimi” adlı yeni kitabı işıq üzü görüb. AMEA-nın mətbuat xidmətindən verilən məlumata görə, “Min bir gecə” nağılları Azərbaycan şərqşünaslığında ilk dəfə geniş tədqiq olunur, əsərin ərəb və ümumən şərq ədəbiyyatı tarixində yeri aydınlaşdırılır. Təqdim olunan kitabda “Min bir gecə” nağılları ətraflı və yüksək elmi səviyyədə araşdırılır. Müəllif tarixi-müqayisəli metoddan istifadə edərək nağılların qaynaqları və təsir dairəsi barədə aydın təsəvvür yarada bilir və “Min bir gecə” nağılları ilə yunan, hind, İran, türk, ayrıca olaraq Azərbaycan nağıllarının müqayisəsi, nağılların mənşəyi və onların ayrı-ayrı motivlərinin təkamülü barədə dolğun elmi təsəvvür yaradır. Kitabda “Min bir gecə” nağıllarının tematik təsnifatı və təhlili verilir, məhəbbət nağılları, sehrli nağıllar, məişət nağılları, səyahət nağıllarından ayrıca bəhs edilir.

SARA

525-ci qəzet.- 2009.- 12 noyabr.- S.7.