Azərbaycan şairlərinin əsərləri “Drujba narodov”da
“Drujba narodov”
jurnalı noyabr nömrəsində Azərbaycan
şairlərinin şeirlərinə
geniş yer ayırıb. Jurnalın bu sayında
Məmməd İsmayılın,
Akif Əhmədgilin və Qulu Ağsəsin
şeirləri dərc
olunub. Məmməd İsmayılın yaxın
dostu və tərcüməçisi Mixil
Sinelnikov 70 illik yubileyini bu günlərdə
qeyd etdiyimiz şairin şeirlərinə
giriş məqaləsi
yazıb. O, ilyarım
bundan əvvəl Məmməd İsmayılı
görmək üçün
Türkiyəyə getdiyindən,
son illərdə dostunun bu şəhərdəki
yaşam tərzindən
söz açıb:
“Məmməd İsmayıl
Çanaqqala universitetində
dərs deyir. İş otağının
pəncərəsindən gəmilərin
sakit-sakit keçib getdiyi Dardanel boğazı görünür.
Arxeoloq Şilmanın
və davamçılarının
üzə çıxardığı
Troya şəhərinin
xarabaları çox elə də uzaqda deyil. Uzaqdan
boz zeytun bağları ilə Yunanıstan boy göstərir. Və Məmməd bu mənzərəni özünəməxsus
şəkildə qələmə
alır:
Qoca Aristotel mənə Asosda
On ildi ayrılıq dərsi öyrədir.
Poeziya araşdırmaları onun xeyli vaxtını alır. Bununla yanaşı Məmməd öz monoqrafiyası üzərində də çalışır”. M.Sinelnikov M.İsmayılın V.M.Jirmunskinin “Türk qəhrəmanlıq dastanları” əsərini türkcəyə çevirməyə də vaxt tapdığını yazısında vurğulayıb: “Ünlü Azərbaycan şairi yaşının ahıl çağlarında kabinet, elm adamı olmaq istəmir. Bir-birinin ardınca şeir kitabları nəşr olunur. M. İsmayıl xəlqi və klassik tərzə sahib olan bir sənətkardır. Onun şeirləri çox zaman sadə danışıq intonasiyası, (bu səbəbdən də tərcümə edilməsi mümkünsüz olur) dərin fəlsəfi düşüncələr və forma mükəmməlliyi ilə seçilir (Belə mükəmməl şeirləri başqa dilə çevirmək elə də asan olmur)”. M,Sinelnikov M.İsmayılın şeirlərində xeyli zamandan bəri uzaq düşdüyü doğma vətənindən, ən əsası da sevgi və ölümdən söhbət açıldığını qeyd edib. M.İsmayılın jurnalda dərc olunan “Sevgi”, ”Səni” və “Ay bulud” şeirləri M.Sinelnikovun tərcüməsində verilib.
Jurnalda Akif Əhmədgilin “Qar”, “Sevincin yenilgisi” və Qulu Ağsəsin “Sən”, “Mən və o”, “Gecə” şeirləri də yer alıb. Şeirləri Olqa Yermolayeva və Gennadi Kalaşnikov tərcümə ediblər.
SARA
525-ci qəzet.- 2009.- 13 noyabr.- S.7.