Bakı Slavyan Universitetində Milli Kitab Mükafatının təsisçi və münsiflər heyəti ilə görüş olub

Ötən gün Bakı Slavyan Universitetində Milli Kitab Mükafatının (MKM) təsisçisi və münsiflər heyəti ilə görüş keçirilib. Tədbiri giriş sözü ilə açan Azərbaycan Yazıçılar Birliyinin (AYB) katibi, mükafatın münsiflər heyətinin üzvü Rəşad Məcid Milli Kitab Mükafatının təsisinin əhəmiyyətli addım olduğunu vurğulayıb və cəmiyyətdə əks-səda doğurduğunu qeyd edib. R.Məcid həmçinin universitetin yaradıcılıq fakültəsinin tələbələrinin müsabiqəyə əsərlər təqdim edəcəyinə inandığını bildirib. AYB katibi kitaba marağın azaldığı, gənclərin az mütaliə etdiyi bir zamanda kitab mağazası açmağın, Milli Kitab Mükafatı təsis etməyin cəsarətli və hörmətə layiq addım olduğunu çıxışında önə çəkib.

MKM-in təsisçisi, “Əli və Nino” Nəşriyyat Evinin sahibi Nigar Köçərli layihənin keçirilməsində əsas məqsədin ictimaiyyətin diqqətini Azərbaycan ədəbiyyatına cəlb etmək, müasir ədəbiyyatımızın sosial önəmini artırmaq və ədəbiyyatımızı zəngilləşdirəcək əsərləri dərc etmək olduğunu bildirib: “Biz çox ümid edirik ki, bu layihənin həyata keçirilməsi sayəsində milli ədəbiyyatımız üçün inci hesab edilən ədəbi əsərlər yarada biləcək müasir müəlliflərin oxucular üçün “kəşf edilməsi” və stimullaşdırılmasına nail olacağıq. Tarixən Nizamilər, Füzulilər, Ordubadilər, Axundovların vətəni olan ölkəmizin yeni ədəbi dahilərə ehtiyacı var”. N. Köçərli müsabiqəyə hekayələr, povestlər, romanlar və digər ədəbi üslublarda yazılmış nəsr əsərlərinin qəbul olunacağını, müsabiqəyə müəllifin vətəndaşlığından asılı olmayaraq Azərbaycan dilində yazılmış bütün əsərlərin və əsərin dilindən asılı olmayaraq Azərbaycan vətəndaşı tərəfindən yazılmış əsərlərin təqdim oluna biləcəyini vurğulayıb: “Namizəd əsərlər minimum 40 min çap işarəsi həcmində olmalıdır. Eyni zamanda Milli Kitab Mükafatının təqdimat günündən 10 il əvvəlki müddət ərzində yazılmış əsərlər Münsiflər Heyəti tərəfindən nəzərdən keçiriləcək. Namizəd əsərlərin müəlliflərinə yaş, cins, yaşama yeri və əsərin nəşr olunma yeri üzrə heç bir məhdudiyyət tətbiq olunmayacaq. Əsərləri yalnız müəlliflər təqdim etməlidir və bura həm dərc olunmuş, həm də dərc olunmamış əsərlər daxildir”. Müsabiqənin şərtlərini ətraflı izah edən təsisçi namizəd əsərlərin bu il dekabrın 31-dək qəbul ediləcəyini, mayın 1-də isə 3 qalibin adının elan olunacağını söyləyib.

Xalq şairi, münsiflər heyətinin üzvü Vaqif Səmədoğlu mükafatın təsisçisinə belə əhəmiyyətli bir iş üçün minnətdarlığını bildirib. V.Səmədoğlu Azərbaycan xalqının istedadlı olması ilə bağlı fikirlərini bölüşüb: “Bütün Azərbaycan xalqı yazır. Bəziləri mənim kimi yazır, bəziləri də qəhrəmanım Moşu kimi. Belə mükafatların təsisi yaxşı yazanlar üçün bir stimuldur”.

V.Səmədoğlu çıxışında həmçinin münsiflər heyətinin üzvü kimi əsərlərə obyektiv yanaşacaqlarını vurğulayıb.

SARA

525-ci qəzet.- 2009.- 14 noyabr.- S.23.