“Gənclər avanqardda: səslər və rənglər aləmində” müzakirə edilib

Azərbaycan Bəstəkarlar İttifaqının (ABİ) 75 illik yubileyinə həsr olunmuş Beynəlxalq musiqi festivalı çərçivəsində gənc bəstəkarların estrada musiqisindən və gənc rəssamların sərgisindən ibarət “Gənclər avanqardda: səslər və rənglər aləmində” mövzusunda məclis keçirilib. ABİ-nin mətbuat xidmətindən verilən məlumata görə, incəsənətin müxtəlif sahələrini təmsil edən gəncləri bir araya gətirmək məqsədi daşıyan məclis Məsud Kazıminin dirijorluğu ilə “Con tempo” solistlər ansamblının (bədii rəhbər Nizami Zeynalovdur) ifasında gənc bəstəkar Vasif Allahverdiyevin “Muğamsayağı” əsəri ilə açılıb.

Məclisdə gənc bəstəkarlardan Rüfət Xəlilovun “Tapmacalar”, Tahir İbişovun “Buxarlanma”, Ayaz Qəmbərlinin “Köhnə qrammofondan vals”, Türkər Qasımzadənin “Turş gilənar dadlı fikirlər”, Xədicə Zeynalovanın “E-D-Es”, Firudin Allahverdinin “Çayxana” əsərləri, Kərəm Əkbərin simli kvintet üçün “Nonet”i və Aliyə Məmmədovanın “Trio”su səslənib.

Tədbir çərçivəsində gənc rəssamlardan Rəna Əmrahova, Leyla Mirzəzadə, Əsmər Nərimanbəyova, Vüqar Quliyev və Rəşad Babayevin müxtəlif mövzulu əsərlərindən ibarət sərgi nümayiş etdirilib.

Gənclərin yaradıcılığına həsr olunmuş tədbirdə Azərbaycan Bəstəkarlar İttifaqının sədri, xalq artisti Firəngiz Əlizadə də iştirak edib.

Ötən gün həmçinin gənc bəstəkarların əsərlərinin lent yazısında dinlənilməsi və müzakirəsi təşkil olunub.

SARA

525-ci qəzet.- 2009.- 18 noyabr.- S.7.