Yurd nisgilli şeirlər toplusu

“Adiloğlu” nəşriyyatında Əbülfət Hoçazlının “Salam, Zəngəzurda qalan dağlarım” adlı şeir kitabı işıq üzü görüb. Kitabın önsöz müəllifi və redaktoru Nazim Əhmədlidir. Önsözdə Ə.Hoçazlının vətəndaş şair olduğu xüsusi qeyd edilib: “Ürəkdən, candan vətən üçün, el üçün yanan şair xalqını düşünür, vətənpərvərlik ruhu onu rahat buraxmır. Vətən, onun gözəlliyi, insanlara qarşı sevgi, mübarizlik, kövrəklik onun yaradıcılığında qabarıq şəkildə özünü göstərir”.

Kitabda müəllifin oxucuya ünvanladığı ürək sözləri də yer alıb. Həyat və yaradıcılığı haqqında məlumat verən Ə.Hoçazlı bu kitabın hansı zərurətdən meydana çıxdığını açıqlayıb: “Doğma yerlərin arzusu ilə səhərlər köçkün kimi məskunlaşdığımız dörd divar arasından çıxıb, işə-gücə gedib, axşamlar da yorğun ayaqlarımla qayğılı, fikirli, dərdli, qüssəli yenə o dörd divar arasına dönür, ötən günlərdə qalan Laçınlı xatirələrimlə yenidən qucaqlaşıram və beləcə ömür-gün keçir. Laçınımın həsrəti ilə yaşaya-yaşaya bu şeirləri kitab halında dərc etdirməyi özümə borc bildim”.

Kitabda müəllifin müxtəlif mövzularda qoşmaları oxuculara təqdim olunub.

SARA

525-ci qəzet.- 2009.- 20 noyabr.- S.7.