“Azərbaycan şərqşünaslığı” jurnalı nəşrə başlayıb

AMEA-nın akademik Ziya Bünyadov adına Şərqşünaslıq İnstitutu 51 illik fəaliyyəti dövründə “Ərəb filologiyası”, “İran filologiyası”, “Türk filologiyası”, “Orta əsrlər Şərqi”, “Elmi araşdırmalar”, “Şərq filologiyası” və başqa topluları vasitəsilə bu sahədə görülən elmi işləri əhatə edən məqalələri ictimaiyyətə çatdırıb. Bu ilin sentyabr ayından isə Şərqşünaslıq İnstitutunda geniş oxucu kütləsi üçün nəzərdə tutulan jurnal nəşrə başlayıb. “Azərbaycan şərqşünaslığı” adlı bu yeni elmi-kütləvi jurnalın ilk sayı artıq işıq üzü görüb. Nəfis tərtibatda nəşr olunmuş jurnalın səhifələrində müasir Azərbaycan şərqşünaslığında, ilk növbədə Şərqşünaslıq İnstitutunda araşdırılan ən aktual mövzularla bağlı məqalələrlə tanış olmaq mümkündür. Jurnalın “Görkəmli şərqşünaslar” rubrikasında Şərqşünaslıq İnstitutuna adı verilən akademik Ziya Bünyadovun həyat və yaradıcılığı barədə baş redaktor, İnstitutunun direktoru, professor Gövhər Baxşəliyevanın məqaləsi öz əksini tapıb. Sonra Z.Bünyadovun “Nəsiminin məhkəməsi və qətli” adlı məqaləsi oxuculara təqdim edilib. Tarix, ədəbiyyat, dilçilik, din və ictimai fikir bölmələrində Türkiyə-Özbəkistan əlaqələri tarixinə, ötən əsrin 60-70-ci illərində Səudiyyə Ərəbistanında siyasi vəziyyətə, Aşiq Paşanın kiçik həcmli məsnəvilərinə, Məsturə və Natəvanın tale və yaradıcılıqlarının müqayisəsinə, Şərqşünaslıq İnstitutunda fars dilinin tədqiqi ilə bağlı aparılan araşdırmalara, İslamın qlobal təbii və ictimai proseslər haqqında konsepsiyasına, Misirdə qadın probleminə həsr olunmuş məqalələrlə tanış olmaq mümkündür. “Unudulmuş səhifələr”, “Tərcümələr”, “Şərqşünasların bədii yaradıcılığı”, “Şərqi tanı” rubrikaları da oxucuların marağına səbəb olacaq yazılardır. Burada həmçinin son zamanlar şərqşünaslıqla bağlı nəşr olunmuş yeni kitab və jurnallar barədə məlumat almaq, şərqşünas alimlərin iştirakı ilə keçirilən tədbirlər, görüşlər və beynəlxalq konfranslar barədə yazıları oxumaq olar. Jurnaldakı yazılarla Şərqşünaslıq İnstitutunun rəsmi saytında da (www.orientalstudies.az) tanış olmaq mümkündür.

HÜSNİYYƏ

525-ci qəzet.- 2009.- 3 oktyabr.- S.23.