“İslam mətbəxi” beynəlxalq kulinariya festivalı davam edir

Bakı Əl Oyunları İdman Sarayında Mədəniyyət və Turizm Nazirliyinin dəstəyi ilə “Bakı - İslam Mədəniyyətinin Paytaxtı - 2009” layihəsi çərçivəsində keçirilən “İslam mətbəxi” beynəlxalq kulinariya festivalı davam edir. Xatırladaq ki, festivalın açılış mərasimi oktyabrın 6-da gerçəkləşib. Aşıqların ifası ilə start verilən festivalda ilk çıxışı mədəniyyət və turizm nazirinin müavini Sevda Məmmədəliyeva edib və kulinariya yarışmasının Azərbaycanın mədəni irsinin ən qədim nümunələrindən olan aşıq musiqisi ilə başlamasının heç də təsadüfi olmadığını bildirib: “Prezident İlham Əliyevin və Heydər Əliyev Fondunun prezidenti, YUNESKO-nun və İSESKO-nun xoşməramlı səfiri Mehriban Əliyevanın yüksək diqqət və qayğısı sayəsində Azərbaycanın aşıq sənəti YUNESKO-nun qeyri-maddi mədəni irs siyahısına daxil edilib”. Beynəlxalq kulinariya festivalının əhəmiyyətini vurğulayan S.Məmmədəliyeva belə bir tədbirin Bakıda keçirilməsinin Azərbaycan mətbəxinin dünya miqyasında tanınmasında mühüm rol oynayacağına əminliyini dilə gətirib. Dünya Kulinariya Təşkilatları Assosiasiyasının prezidenti Qissur Qudmundsson, Dünya Folklor Sənəti Təşkilatının prezidenti Karmen Padilya, Azərbaycan Milli Kulinariya Mərkəzinin direktoru, Kulinariya Assosiasiyasının prezidenti Tahir Əmiraslanov və digər çıxış edənlər Bakıda keçirilən festivalın böyük əhəmiyyətini vurğulayıblar. T.Əmiraslanov deyib ki, ayrı-ayrı ölkələri təmsil edən aşpazlar 9 nominasiya üzrə öz bacarıqlarını göstərəcəklər. Onların işini beynəlxalq tərkibli münsiflər heyəti qiymətləndirəcək”.

Sonra əvvəlcədən quraşdırılmış mətbəxlərdə yarışa start verilib.

Xatırladaq ki, festivalda Azərbaycan, Belarus, Filippin, Gürcüstan, İran, İslandiya, Kanada, Nigeriya, Özbəkistan, Rusiya, Serbiya, Türkiyə, Ukrayna, Yunanıstan və digər ölkələrin aparıcı kulinarlarından ibarət komandalar iştirak edir.

Festivala oktyabrın 9-da yekun vurulacaq.

S.MÜRVƏTQIZI

525-ci qəzet.- 2009.- 8 oktyabr.- S.7.