Xalq yazıçısı Anar güneyli ziyalılarla görüşüb

Dünya Azərbaycanlıları Konqresinin (DAK) həmsədri, xalq şairi, millət vəkili Sabir Rüstəmxanlının dəvəti əsasında Kanada Qələm Təşkilatının keçmiş sədri Rza Bərahəninin başçılığı ilə ABŞ, Kanada, Almaniya, İngiltərə, İsveç və başqa ölkələrdə yaşayan, əslən Güney Azərbaycandan olan 12 tanınmış soydaşımız ölkəmizdə səfərdədir. Oktyabrın 5-də qonaqlar Milli Azərbaycan Tarixi və Nizami Gəncəvi adına Milli Azərbaycan Ədəbiyyatı muzeylərində olublar, oktyabrın 6-da isə Yazıçılar Birliyində (AYB) qurumun sədri, xalq yazıçısı Anarla görüşüblər. AYB-nin mətbuat xidmətindən verilən məlumata görə, görüşdə S.Rüstəmxanlı güneyli ziyalıları Anara təqdim edib, qonaqlara görkəmli yazıçının həyat və yaradıcılığı barədə ətraflı məlumat verib. Görüşdə çıxış edən AYB sədri güneyli-quzeyli Azərbaycan mövzusunun ədəbiyyatımızda aparıcı xətlərdən olduğunu vurğulayıb: “Neçə illər ərzində vətəndən kənarda yaşayan güneyli soydaşlarımızın dərdlərinə şərikik. Mənim düşüncəmə görə, Azərbaycan türklərinin öz hüquqlarını əldə etməsinin başlıca və bəlkə də yeganə yolu ədəbiyyatdan keçir”.

Birlik sədri qurumun mətbuat orqanlarının qapılarının güneyli ziyalıların üzünə həmişə açıq olduğunu bildirib.

Görüşün sonunda AYB sədri R.Bərahəniyə AYB-nin fəxri üzvlük vəsiqəsini təqdim edib.

S.MÜRVƏTQIZI

525-ci qəzet.- 2009.- 8 oktyabr.- S.7.