Elçinin “Mahmud və Məryəm” romanı Türkiyədə ekranlaşdırılır

Xalq yazıçısı Elçinin məşhur “Mahmud və Məryəm” romanı illərin sınağından çıxmış xoşbəxt taleli əsərdir. Sovet ideologiyasının hökm sürdüyü bir dövrdə - 1982-ci ildə yazılmış bu roman ideoloji və coğrafi sərhədləri adlayaraq neçə-neçə nəslin sevimli kitabı olub. “Mahmud və Məryəm” bir çox xarici dillərə tərcümə edilərək nəşr olunub, səhnələşdirilərək teatr səhnələrində göstərilib, oxucuların və tamaşaçıların dərin rəğbətini qazanıb, xüsusi elmi araşdırmaların mövzusuna çevrilib.

“Mahmud və Məryəm” qardaş Türkiyədə də dəfələrlə nəşr edilib, 1997-ci və 2003-cü illərdə ilin ən çox satılan 10 kitabı sırasında yer alıb.

Roman Türkiyədə ilk dəfə 1993-cü ildə doktor İldəniz Kurtulanın çevirməsində “E yayınları” nəşriyyatı tərəfindən nəşr olunub. 1994-cü ildə romanı “Milli Kitabxana Basınevi” nəşr edib.

“Mahmud və Məryəm” 1997-ci ildə doktor Əli Duymazın yeni çevirməsində qardaş ölkənin ən qədim və nüfuzlu nəşriyyatlarından olan “Ötüken”də çapdan çıxıb.

Bundan sonra roman həmin nəşriyyatda dəfələrlə yenidən nəşr edilib. Ümumilikdə isə “Ötüken” nəşriyyatı Elçinin “Ağ dəvə” və “Ölüm hökmü” romanlarını, eləcə də, bütün hekayə və povestlərini çap edib.“Mahmud və Məryəm” 2001-ci ildə “Çağdaş dünya ədəbiyyatı” seriyasından “Everest” nəşriyyatında çap olunub. Əsər Türkiyənin bir sıra universitetlərində, o cümlədən Ərzurum Atatürk, İstanbul Memar Sinan və Fateh universitetlərində elmi tədqiqata cəlb edilib. Eyni zamanda, roman Fateh universitetinin sənət fakültəsində səhnələşdirilib və universitetlərarası teatr festivalının qalibi seçilib. Bugünlərdə isə Türkiyənin ən tanınmış kino şirkətlərindən olan “24 Kare Film” “Mahmud və Məryəm” romanı əsasında bədii film çəkmək üçün müqavilə imzalayıb. Film FİYAB-ın (Film Yapımçıları Məslək Birliyinin) dəstəyi ilə çəkiləcək. Şirkətin sahibi və filmin prodüsseri Sevda Kayğısız bu barədə deyib: “Türk dünyasının böyük yazarı Elçinin “Mahmud və Məryəm” romanı əsasında film çəkmək bizim çoxdankı arzumuz idi. Mən çox xoşbəxtəm ki, nəhayət, bu arzu reallaşır. “Mahmud və Məryəm” filminin çəkilişi bizim indiyə qədərki ən böyük layihəmizdir. Film Ərzurumda, Qarsda və Azərbaycanda çəkiləcək, texniki çəkilişlər isə Almaniyada aparılacaq. Çəkiliş tam şəkildə 2010-cu ildə başa çatacaq. Noyabr ayında isə Ankarada, İstanbulda və Bakıda filmin qala-nümayişləri keçiriləcək. Filmin yaradıcı heyətində məşhur türk sənətçiləri ilə bərabər, Elçinin təklifi ilə bir sıra görkəmli Azərbaycan sənətkarları da iştirak edəcəklər. Şübhəsiz ki, bu film Azərbaycan-Türkiyə mədəni əlaqələrinin daha da inkişaf etdirilməsində mühüm rol oynayacaq. Film haqqında biz ABŞ, Fransa, Yaponiya kimi ölkələrin məşhur prokat qurumlarına məlumat göndərmişik və artıq həmin qurumlar “Mahmud və Məryəm”lə maraqlandıqlarını bildiriblər. Almaniyada isə bu roman çox məşhurdur. “Mahmud və Məryəm”in alman dilində üç nəşri var. Buna görə də Almaniyanın böyük prokat qurumları bu filmə xüsusi maraq göstərirlər. “Mahmud və Məryəm” filmi Azərbaycan və türk dillərində səsləndirilməkdən əlavə, ingilis, fransız və alman dillərinə də dublyaj ediləcək. Biz bu filmin 2010-11-ci illərdə 20 ölkədə nümayiş etdiriləcəyini nəzərdə tutmuşuq”.

HÜSNİYYƏ

525-ci qəzet.- 2009.- 10 oktyabr.- S.23.