“Türkiyə səfərimiz protokolların imzalanması ilə bağlı narahatlıqdan irəli gəlir”

GÜLTƏKİN HACIBƏYLİ: “TÜRKİYƏ MİLLİSİNİN AZARKEŞİ KİMİ TÜRKİYƏ-ERMƏNİSTAN QARŞILAŞMASINDA AZƏRBAYCAN BAYRAĞINI DALĞALANDIRMAQ İSTƏRDİM”

Ötən şənbə İsveçrənin Sürix şəhərində Türkiyə ilə Ermənistan arasında məlum protokolların imzalanması mərasi keçirildi. Qeyd edək ki, protokolların imzalanması Azərbaycan rəsmilərində, siyasilərində, parlamentarilərində, bütövlükdə ölkə ictimaiyyətində böyük narazılığa və narahatçılığa səbəb oldu. Elə bu narazılıqdan, narahatçılıqdan irəli gələrək bir qrup azərbaycanlı millət vəkili - Səməd Seyidov, Əli Hüseynov, Nizami Cəfərov, Gültəkin Hacıbəyli, Rövşən Rzayev, Qənirə Paşayeva, Fəzail Ağamalı, Əkrəm Abdullayev, Mübariz Qurbanlı, Asəf Hacıyev və Qüdrət Həsənquliyev dünən bir neçə günlüyə qardaş Türkiyəyə səfərə düşüblər. Yola düşməzdən öncə isə Milli Məclisin (MM) Beynəlxalq münasibətlər və parlamentlərarası əlaqələr komitəsinin sədr müavini Gültəkin Hacibəyli “525”in əməkdaşı ilə söhbətində bildirib ki, millət vəkillərinin qardaş Türkiyəyə səfəri sözügedən ölkə və Ermənistan arasında məlum protokolların imzalanması ilə bağlıdır: “Bildiyiniz kimi, oktyabr ayının 10-da ABŞ dövlət katibi Hillari Klintonun, o cümlədən Rusiya, Fransa, İsveçrə xarici nazirlərinin, Avropa İttifaqı təhlükəsizlik və xarici siyasət üzrə ali komissarının, Avropa Şurası Nazirlər Komitəsinin sədrinin vasitəçiliyi və iştirakı ilə Türkiyəylə Ermənistan arasında iki protokol imzalandı. Həmin protokollardan biri diplomatik münasibətlərin qurulmasına, digəri isə qarşılıqlı əməkdaşlığın inkişafına dair protokol idi. Onu da qeyd edim ki, təxminən bir neçə aydan bəri idi Türkiyəylə Ermənistan arasında protokolların imzalanması ilə bağlı danışıqlar, müzakirələr gedirdi və etirazlara baxmayaraq, sonda məlum imzalanma mərasimi reallaşdırıldı. Heç şübhəsiz ki, bu protokolların imzalanması hər bir sıravi azərbaycanlını qayğılandırdığı kimi, biz millət vəkillərini də narahat etməyə bilməzdi. Əlbəttə, biz qardaş türk millətimizin ən qədim və ən böyük dövləti olan Türkiyəyə, onun rəsmilərinə güvənirik. Türkiyənin baş naziri cənab Rəcəb Tayyib Ərdoğanın, Türkiyə Cümhuriyyətinin cümhur başqanı Abdulla Gülün, Türkiyə Böyük Millət Məclisinin sədri Mehmet Əli Şahinin dəfələrlər verdikləri, səsləndirdikləri bəyanatlara inanırıq və əminik ki, qardaş Türkiyə dövləti, bu ölkənin dövlət rəsmiləri heç vaxt Azərbaycanı, Azərbaycan türklərini darda qoymayacaq, hər zaman olduğu kimi, bundan sonra da Azərbaycana, Azərbaycan türklərinə dəstək olacaq. Ancaq istənilən halda millət vəkilləri olaraq qardaş Türkiyəyə səfərimiz narahatçılığımızı bir daha Türkiyə siyasətçilərinə, rəsmilərinə, parlamentarilərinə çatdırmaqdan, bundan sonra hansı addımlar atıla bilər, proseslər hansı məcrada inkişaf edə bilər və edəcək, bütövlükdə Azərbaycan xalqının narahatlığı nədən ibarətdir, bu kimi məsələlərlə bağlı türkiyəli həmkarlarımızla, bu ölkənin siyasiləri ilə birgə fikir mübadiləsi aparmaqdan ibarətdir. Bununla yanaşı, səfərimiz millət vəkilləri olaraq, seçicilərimizin bu məsələ ilə bağlı narahatçılığını Türkiyə ictimaiyyətinə, siyasilərinə çatdırmaqdan, Türkiyə-Ermənistan əlaqələrinin Türkiyə, Azərbaycan, bütövlükdə ümumtürk mənafeləri baxımından hansı sonuclara gətirib çıxaracağını bir daha birlikdə dəyərləndirməkdən ibarətdir. Belə demək mümkünsə, bu səfər protokolların imzalanması ilə bağlı narahatlıqdan irəli gələn, yaranan bir səfərdir. Bu yerdə bir məqamı da vurğulamaq istəyirəm ki, biz Türkiyəyə inanmasaq, güvənməsək, etibar etməsək belə bir səfəri reallaşdırmarıq. Biz onu da bilirik ki, Türkiyənin baş naziri Rəcəb Tayyib Ərdoğan kifayət qədər ciddi, xarizmatik bir siyasətçidir və heç şübhəsiz, o, dönə-dönə təkrar etdiyi sözlərə, verdiyi vədlərə axıradək əməl edəcək”. Bu baxımdan, millət vəkili Türkiyəyə böyük maraq və inamla yola düşdüklərini söyləyib. “Düşünürük ki, Türkiyədə Azərbaycan ictimaiyyəti və seçicilərində yaranan narahatçılığı çatdırmaqla yanaşı, həmçinin Dağlıq Qarabağ məsələsinin həlli ilə bağlı bir daha qardaş dövlətin rəsmilərinin, siyasilərinin mövqelərini eşitməyə, Türkiyənin bu məsələdə atacağı addımlarla bağlı məsələhətləşmələr aparmağa nail ola biləcəyik”, - deyə G.Hacıbəyli sözlərinə əlavə edib.

Bəs, görəsən, Türkiyə Böyük Millət Məclisi necə, məlum protokolları ratifikasiya edəcəkmi? G.Hacıbəyli buna inanmaq istəmədiyini dilə gətirib: “Türkiyə Böyük Millət Məclisi müstəqil bir ali qanunverici orqandır, qurumdur və heç kim onun işinə qarışa, təsir göstərə bilməz. Bu baxımdan düşünürəm ki, Türkiyə parlamenti özü bu məsələ ilə bağlı müstəqil qərar verəcək. Ancaq bununla belə, protokolların ratifikasiya edilməsini də istisna etmək olmaz”.

Ümumiyyətlə, protokollar qardaş dövlətin parlamenti tərəfindən ratifikasiya olunarsa və bunun məntiqi davamı olaraq Türkiyə-Ermənistan sərhədləri açılarsa, bundan daha çox kim, hansı tərəf - Türkiyə, yoxsa Ermənistan qazanmış olar və olacaq? Millət vəkilinin bildirdiyinə görə, təbii ki, bundan qazanan Ermənistan olacaq. Bu, daha çox Ermənistanın xeyrinə olan bir məsələdir: “Onu da qeyd edim ki, ermənilər, Ermənistan bu protokolları supergüclərin, o cümlədən ATƏT Minsk qrupuna həmsədrlik edən dövlətlərin təzyiqi, təkidi ilə imzaladı. Əslində, ermənilər, Ermənistan zəngin dövlətçilik tarixinə malik bir xalq, dövlət deyil. Bu dövlət Rusiya tərəfindən qədim Azərbaycan torpaqları hesabına yaradılmış bir dövlətdir və yarandığı gündən də Rusiyanın vassalıdır. Heç də təsadüfi deyil ki, dəfələrlə Rusiyanın rəhbər şəxsləri Ermənistanı özlərinin for-postu adlandırıblar. Elə Qarabağ münaqişəsi də məhz Rusiya tərəfindən yaradılıb və bugünədək də öz həllini tapmayıb. Məhz indi Rusiyanın marağındaydı ki, Türkiyə ilə Ermənistan arasında məlum protokollar imzalansın. Onu da yaxşı bilirsiniz ki, Bu gün Ermənistan iqtisadiyyatı tamamilə Rusiyadan asılı vəziyyətdədir və belə demək mümkünsə, Rusiya Ermənistanı öz çiyinlərindən atmaq üçün öz for-postunu belə bir protokola imza atmağa məcbur etdi. Heç şübhəsiz, protokolların imzalanması və gələcəkdə sərhədlərin açılması ilə Ermənistan iqtisadiyyatı da iflic vəziyyətindən qurtara bilər. Bu isə yuxarıda qeyd etdiyim kimi, ilk növbədə Ermənistanın havadarı olan Rusiyanın işinə yarayır. Bir sözlə, bütün hallarda Rusiya heç zaman Ermənistandan əl çəkməyəcək və onu əlindən buraxmayacaq. Ancaq bir məqamı da bildirmək istəyirəm ki, Cənubi Qafqaza barış, sülh başqa yerdən - nə Rusiyadan, nə Qərbdən gələcək. Cənubi Qafqaza sülh, barış Türkiyədən gələ bilər və gələcək. Biz Qarabağ məsələsinin ədalətli həllinə yalnız və yalnız ümumtürk birliyi, həmrəyliyi, Türkiyə ilə Azərbaycanın bir yerdə olması, birgə addımlaması ilə nail ola bilərik və nail olacağıq. Buna heç kimin şübhəsi olmasın”. Yeri gəlmişkən onu da qeyd edək ki, bu gün Türkiyənin Bursa şəhərində Türkiyə və Ermənistan milliləri arasında futbol üzrə dünya çempionatının seçmə oyunları çərçivəsində növbəti qarşılaşma olacaq. Belə olan təqdirdə, görəsən, şəxsən G.Hacıbəyli bir millət vəkili olaraq həmin oyunu izləmək üçün Bursa stadionuna gedəcəkmi və orada Azərbaycan bayrağını dalğalandıracaqmı? Millət vəkili bununla bağlı ilk öncə qeyd edib ki, çox güman səfər qrafikləri gərgin olacaq. Yəni, həmin bu oyunu izləmək üçün vaxtı qalacaq-qalmayacaq, onu indidən deməsi çox çətindir: “Ancaq şəxsən mən özüm qardaş Türkiyə millisinin azarkeşi kimi həmin oyunu canlı izləmək üçün Bursaya getmək və orada Azərbaycan bayrağını dalğaılandırmaq istərdim. Çalışacağam ki, məhz bu istəyimi reallaşdırım. Bu yerdə qeyd edim ki, həmin görüşdə Azərbaycan bayrağının dalğalandırılmasına Bursa şəhər rəhbərliyi tərəfindən qoyulan qadağa da heç cür anlaşılan və qəbuledilən deyil. Türkiyənin ay-ulduzlu, qırmızı rəngli bayrağı Azərbaycan türkləri üçün əziz, doğma olduğu kimi, üçrəngli Azərbaycan bayrağı da Türkiyə, türklər üçün bir o qədər doğmadır, əzizdir. Bu baxımdan, həmin qarşılaşmada Azərbaycan bayrağının dalğalandırılması da daha məqsədəuyğun olardı”.

Kamil HƏMZƏOĞLU

525-ci qəzet.- 2009.- 14 oktyabr.- S.5.