“Tanış mövzuda variasiyalar” işıq üzü görüb

Sənətşünaslıq namizədi Əlisəfdər Hüseynovun “Tanış mövzuda variasiyalar” kitabı son zamanlar kino sahəsinə həsr edilən maraqlı nəşrlərdən biri kimi diqqəti çəkir. Kitaba önsöz yazan tanınmış şair və sənətşünas Ramiz Heydər “Sənətə məhəbbətlə” adlı məqaləsində müəllifin yazı üslubu barədə fikirlərini açıqlayıb. R.Heydər Ə.Hüseynovun yersiz nəzəriyyəçiliyə uymamaq, fikri əsas predmetə yönəltmək və yalnız bundan sonra nəzəri ölçüləri, estetik meyarları işə salmaq bacarığını xüsusi vurğulayıb: “Kitabın hər səhifəsində Azərbaycan kinosunun uğurlarını elmi-nəzəri fikrin yaddaşına həkk etməyə, milli kino sənətimizin dünya kinosu ilə ayaqlaşması üçün öz töhfəsinin verməyə çalışan qələm sahibinin təəssübkeşliyi və narahatlığı hiss olunur”. Ön sözün müəllifi kitabda toplanan məqalə və resenziyaların mövzu-problematika dairəsinin çox geniş olduğunu qeyd edib: “Yazıların janr xüsusiyyətləri, mövzu dairəsi onların müxtəlif başlıqlar altında qruplaşdırmağa imkan verdiyi halda müəllif bilərəkdən buna getməmiş və məncə, düz də etmişdir. Çünki qoyulan problemlərin, araşdırılan məsələlərin xarakteri janrından və həcmindən asılı olmayaraq, bu yazılara bir küll halında monoqrafik sanbal verir və nəticədə kitab kinonun nəzəriyyəsi və estetikasının elə bu günün özündə də diskussiyalara yol açan aktual problemləri barədə birnəfəsə yazılmış tədqiqat təsiri bağışlayır”.

Nəşrin elmi redaktoru professor Aydın Dadaşovdur. Kitabda müəllifin “Kino haqqında iki paradoks”, “Tanış mövzuda variasiyalar”, “Kino mövzusunda 5 etüd”, “Ekranın görünməyən tərəfi”, “Söz, səs, təsvir”, “Mətnin gizlinləri”, “Misra və kadr”, “Kinoda və poeziyada mətnini semantik quruluşu”, “Metamorfozlar”, “Qaranlıq vurğunu”, “Özünə gülən adam” və başqa məqalələri toplanıb. Məqalələrdə Ə.Hüseynovun kinonun digər sahələri, xüsusilə poeziya ilə əlaqələrinin müxtəlif aspektləri, ekran dilinin poetikası, semantik və sintaktik özəllikləri ilə bağlı qələmə aldığı tənqidi məqamlar dolğun əks etdirilib.

S.MÜRVƏTQIZI

525-ci qəzet.- 2009.- 15 oktyabr.- S.7.