ADMİU-da yaradıcılıq-ifa işlərilə bağlı hesabat konfransı olub

Azərbaycan Dövlət Mədəniyyət və İncəsənət Universitetində professor-müəllim heyətinin yaradıcılıq-ifa işlərinin hesabat konfransı keçirilib. Konfransı giriş sözü ilə Elm və yaradıcılıq işləri üzrə prorektor, professor Maral Manafova açaraq professor-müəllim heyətinin yaradıcılıq-ifa işlərinin yekun hesabatı barədə məruzə edib. Sonra söz universitetin Bədii Şurasının sədri, professor Nəzakət Qazıyevaya verilib. O, 2008-2009-cu tədris ilində yaradıcılıq-ifa işlərinin uğurla yerinə yetirilməsi və təhvil verilməsi haqqında hesabat verib.

Konfransda “Kino rejissoru və operator sənəti” kafedrasının, “Rəssamlıq” fakültəsinin professor-müəllim heyətinin yaradıcılıq-ifa işlərindən ibarət foto sərgiyə və rəsm əsərlərinə baxış keçirilib.

“Musiqi sənəti” fakültəsinin müəllimlərindən əməkdar artist Yaqut Abdullayeva, əməkdar artist Simarə İmanova, Zakir Əliyev konsert proqramı ilə çıxış ediblər və onların çıxışları yaradıcılıq- ifa işi kimi yüksək qiymətləndirilib.

“Aktyor sənəti” və “Rejissorluq” fakültələrinin müəllimləri əməkdar artist Gülsabah Quliyeva, Kəmalə Mehdiyeva, Əlizaman Mirzəyev və digərləri əməkdar artist, professor Gülşad Baxşıyevanın quruluşunda M.F.Axundovun “Hekayəti-vəziri-xani Lənkəran və Dərviş Məstəli şah” komediyasından parçaları məharətlə ifa ediblər.

“Səhnə danışığı” kafedrasının dosenti, əməkdar artist Ağalar Bayramov Fikrət Qoca və Qabilin şeirlərindən ibarət kompozisiyanın bədii qiraəti ilə çıxış edib.

Ümumilikdə konfransın yekununda universitetin yaradıcı fakültələrinin yaradıcılıq-ifa işləri qənaətbəxş hesab olunub.

Gündüz ƏLİYEV,

ADMİU-nun I kurs tələbəsi

525-ci qəzet.- 2009.- 29 oktyabr.- S.7.