Muzey Mərkəzinin rəsmi saytının təqdimatı olub

Ötən gün Muzey Mərkəzində YUNESKO-nun Moskva Bürosunun "Rusiya muzeyi: virtual filial" layihəsi çərçivəsində yaradılmış Muzey Mərkəzinin vebsaytının təqdimat mərasimi keçirilib. museumcenter.az ünvanlı saytın yaradılmasında Mədəniyyət və Turizm Nazirliyi ilə yanaşı YUNESKO-nun Moskva Bürosu, Dövlət Rus Muzeyi və YUNESKO işləri üzrə Azərbaycan Milli Komissiyası iştirak edib.

Tədbirdə çıxış edən Mədəniyyət və Turizm Nazirliyinin mədəni siyasət şöbəsinin müdiri Fikrət Babayev müasir cəmiyyətdə texnologiyaların inkişafının həm ayrı-ayrı insanlar və təşkilatlar arasında, həm də ölkələr, kontinentlər və mədəniyyətlər arasında yeni ünsiyyət üsullarının meydana gəlməsinə gətirib çıxardığını bildirib: "Təqribən 10 ildir ki, Muzey Mərkəzi öz fəaliyyətində kompyuter texnologiyalarının tətbiqini nəzərdə tutan işlərə başlayıb. 2000-ci illərin əvvəllərindən sərgi və digər tədbirlərə aid multimedia materiallarının yaradılması üzrə iş gedir. Muzey Mərkəzinin informasiya köşkündə Mərkəzin tarixi və fəaliyyəti haqqında proqramlar quraşdırılıb. 2008-ci ildə Muzey Mərkəzində Bakı əhalisi və qonaqlar üçün müasir texnologiyalar vasitəsilə Rus Muzeyinin sərvətləri ilə birbaşa təmasda olmağa imkan verən "Rusiya muzeyi: virtual filial" İnformasiya-Tədris Mərkəzi açılıb. Kompyuter proqramlarının, habelə külli miqdarda nəşr, foto və video materiallarının toplanması nəticəsində Mədəniyyət və Turizm Nazirliyinin Muzey Mərkəzinin vebsaytının yaradılması ideyası meydana gəldi".

Müxtəlif ölkələrin səfirliklərinin, mədəniyyət mərkəzlərinin və biznes kompaniyalarının nümayəndələrinin qatıldığı tədbirdə çıxış edənlər saytın istifadəyə verilməsinin əhəmiyyətli hadisə olduğunu vurğulayıblar.

Bildirilib ki, sayt 2007-ci ildə Bakıda yaradılan "Rusiya muzeyi: virtual filial" İnformasiya-Tədris Mərkəzinin gələcək inkişafına xidmət edəcək, müxtəlif ölkələrin vətəndaşlarının ölkəmizin mədəniyyəti ilə daha yaxından və geniş tanış olmasına imkan yaradacaq. Həmçinin bu vebsayt Azərbaycan mədəniyyətinə əlavə auditoriyanı cəlb edəcək, ölkədə və ölkədən kənarda vahid mədəniyyət-informasiya məkanının genişləndirilməsinə və xalqlar arası əlaqələrin gücləndirilməsinə xidmət göstərəcək.

Qeyd edək ki, "MediaDizayn" studiyasında hazırlanan vebsaytın Azərbaycan, rus və ingilis dillərində versiyası var. Ciddi klassik üslubda tərtib olunan sayt geniş axtarış sistemi ilə təchiz edilib. Vebsayt artıq dünyanın aparıcı axtarış sistemləri tərəfindən indeksləşdirilib və Muzey Mərkəzinin fəaliyyəti ilə bağlı sorğu verdikdə ilk cavab sətirlərində çıxması təmin olunub. Muzey Mərkəzi və "Rusiya muzeyi: virtual filial" portalı arasında olan ikitərəfli istinad mübadiləsi saytın tez bir zamanda Qlobal Şəbəkənin "mədəniyyət seqmentinə" qatılmasına təkan verib. Saytın "Rusiya muzeyi: virtual filial" İnformasiya-Tədris Mərkəzinə həsr olunmuş blok, "Sərgi və layihələr", "İncəsənət qalereyası", "Muzey Mərkəzi" və başqa bölmələrində Muzey Mərkəzinin çoxillik fəaliyyət konsepsiyası, yaranma tarixi, keçirilən sərgi və layihələr haqqında məlumat, ziyarətçilər üçün bilgi, beynəlxalq proqramlarda iştirak və buraxılan məhsullar haqqında informasiyalar yer alıb. Sayt vasitəsilə internet şəbəkəsinin istifadəçiləri burada sözügedən mərkəz tərəfindən keçirilməsi nəzərdə tutulan tədbirlər haqda məlumat ala bilərlər.

S.MÜRVƏTQIZI

525-ci qəzet.- 2009.- 26 sentyabr.- S.23.