Balaca pianoçu:
parlaq istedad və böyük arzular
Toğrul Hüseynli
Bülbül adına Orta İxtisas Musiqi Məktəbinin 10-cu sinfində
fortopiano üzrə təhsil alır. Xüsusi istedada malik olması onu digər yaşıdlarından
fərqləndirir. Cəmi 14 yaşı
olsa da, indiyə kimi bir neçə ciddi uğura imza atıb. Azərbaycan klassik musiqisini həm ölkə daxilində, həm də onun hüdudlarından
kənarda layiqincə
təmsil edib. Klassik musiqinin bütün musiqilərin şahı olduğunu deyən Toğrulun sözlərinə
görə, çox kiçik yaşlarından,
hələ heç sərbəst danışmadığı
halda artıq bir çox klassik əsərlər ifa etməyə başlayıb. Qərara
gəlib ki, özünü bu sahədə sınasın:
"Bacım pianoçudur.
Ona görə də gözümü açandan
evimizdə həmişə
klassik musiqi eşitmişəm. Fortopianoya marağım
da o vaxtdan yaranıb. Saatlarca klassik musiqi
dinləməkdən yorulmurdum".
T.Hüseynli əvvəlcə görkəmli
bəstəkar Oqtay Zülfüqarovun Uşaq Filormaniyası nəzdindəki
"Aysel" uşaq
teatrının solisti
seçilib. O zaman vokalist kimi çıxış
edib. Sonra isə Bakı
Musiqi Akademiyasının
nəzdindəki pedaqoji
hazırlıq kafedrasında
təhsilə başlayıb.
Fortopiano ifaçılığına
yiyələndikdən sonra,
altı yaşında
Bülbül adına Orta İxtisas Musiqi Məktəbinə qəbul
olunub. Özü də ən
yüksək balla.
Müxtəlif konsert proqramlarında
çıxış edən
Toğrul özünü
müsabiqələrdə də
sınayıb. 2004-cü ildə keçirilən Nazim Əliverdibəyov adına gənc
ifaçıların 4-cü ümumşəhər müsabiqəsinə
qatılıb. Qeyd edək
ki, bu, respublikada
fortopiano sahəsində
ən nüfuzlu yarışma hesab olunur. Müsabiqəyə qatılan istedadlı,
bacarıqlı gənc
və yeniyetmələr
arasında 9 yaşlı
Toğrul birinci yeri tutub. Deyir ki, bu qələbə
onun həyatında çox böyük uğur olmaqla yanaşı, həm də sənətə daha çox bağlanmasına, özünəinamının
artmasına səbəb
olub. Toğrulun beynəlxalq müsabiqələrdəki
çıxışları da uğurlu alınıb. Gürcüstanda 2005-ci ildə keçirilən pianoçuların ikinci beynəlxalq müsabiqəsində
üçüncü yeri
tutaraq bürünc medalla mükafatlandırılıb.
Həmin
vaxtdan etibarən isə artıq orkestrlə çıxışlar
etməyə başlayıb.
Rauf Abdullayevin rəhbərlik etdiyi Azərbaycan Dövlət Simfonik Orkestri ilə 2006-cı ildə Filarmoniyada ilk konserti olub. Nəhayət, 2008-ci ildə ümummilli
lider Heydər Əliyevin 85 illik yubileyinə həsr olunmuş gənc musiqiçilərin birinci
respublika müsabiqəsində
birinci yeri tutub. "Bu müsabiqəyə çox
ciddi hazırlıq görülmüşdü. Bölgələrdən də uşaqlar
qatılmışdılar. Dövlət
səviyyəli tədbirdə
birinci yerə layiq görülməyim məni çox fərəhləndirdi. Yekun konsertdə
dövlət rəsmiləri
də vardı. Mən Sensantın 2 saylı konsertini ifa etdim və nəticədə
qalib seçildim".
T.Hüseynli görkəmli piano ifaçılarını
mütəmadi dinləyir,
onlardan öyrəndiklərini
öz ifasında tətbiq edir.
Gənc pianoçunun arzuları çoxdur. Əvvəlcə Bakı Musiqi
Akademiyasına daxil olmaq, gələcəkdə
isə xarici ölkədə təhsilini
təkmilləşdirmək istəyir. Sənətdə daha böyük
nailiyyətlər əldə
etmək, fortopianonun peşəkar ifaçılarından
birinə çevrilmək,
böyük səhnələrə
çıxmaq, nüfuzlu
beynəlxalq müsabiqələrin
qalibi adını qazanmaq niyyətindədir.
Onun çox kiçik yaşlarından qazandığı
uğurlar, sənətinə
peşəkarlar tərəfindən
verilən qiymət isə Toğrulun bu arzularının reallaşacağına şübhə
yaratmır. Amerika
Pianoçular Assosiasiyasının
sədri Coel Hadison Toğrulun ifasını dinlədikdən
sonra: "İndiyədək
bu yaşda belə texnikaya malik uşaq görməmişəm" - deyib.
Toğrulu Amerikaya dəvət
edən Hadison onu Birləşmiş Ştatlarda ən mahir pianoçu kimi tanıda biləcəyini söyləyib.
Mahaçqalada keçirilən dostluq konsertində çıxışından
sonra isə əslən bakılı,
SSRİ xalq artisti Murad Kajloyev Toğrulun ifasına valeh olduğunu deyib və gənc
pianoçunu Dağıstanda
konsert verməyə dəvət edib.
Azərbaycan musiqi ifaçılığını
bütün dünyada
layiqincə təmsil etməyi arzulayan Toğrul Hüseynli istedadı, zəhməti,
dövlətin və doğmalarının dəstəyi,
müəllimlərinin səyləri
sayəsində buna
nail olacağına inanır. Bu yolda ona uğurlar
diləyirik.
P.SULTANOVA