Ermənilərin "Eurovision-2009"dakı çıxışında azərbaycanlı "imzası"

Moskvada keçirilən "Eurovision-2009" müsabiqəsinin ilk yarımfinalında səhnəyə çıxan Ermənistan təmsilçiləri Anuş və İnqanın kostyumları, saç düzümü və makiyajı, xoreoqrafik etüdü və səhnə tərtibatı azərbaycanlı Aslan Əhmədovun işidir.

APA-nın "Novosti Armeniya"ya istinadən yaydığı məlumata görə, Aslan Əhmədov Ermənistan təmsilçilərinin çıxışını hazırlayan "Fresh Art" şirkətinin təsisçilərindən biridir. O, digər təsisçilər David Gevorkov və Aleksandr Siradekyanla birgə Anuş və İnqanın çıxışı üçün xüsusi kompozisiya tərtib edib. "Fresh Art"ın rəhbərləri Ermənistan təmsilçilərini "Eurovision-2009"a hazırlamaq işinin məhz onlara tapşırılmasından qürur duyduqlarını bildiriblər.

Qeyd edək ki, Aslan Əhmədov 1973-cü ildə Bakıda anadan olub. 1994-cü ildə Bakıda İncəsənət Universitetini bitirib və Sankt-Peterburqa köçüb. Orada David Gevorkov və Aleksandr Siradekyanla birlikdə "Fresh Art" şirkətini təsis edib.

APA-nın "Eurovision-2009" müsabiqəsinin işinin işıqlandırmaq üçün Moskvaya ezam olunmuş müxbiri Ermənistan təmsilçilərinin çıxışını hazırladığı bildirilən Aslan Əhmədovdan bununla bağlı münasibət öyrənmək istəsə də, o açıqlama verməkdən imtina edib.

525-ci qəzet.- 2009.- 13 may.- S.7.