Gənclərin beynəlxalq əməkdaşlığına həsr olunan festival keçirilib

Mayın 11-də Bakıda Gənclər və İdman Nazirliyilə Tələbələrin İqtisadiyyat və Menecmentlik üzrə Beynəlxalq Assosiasiyası (AİESEC) beynəlxalq "Global Village" festivalına təşkil edib.

Tədbirdə çıxış edən Gənclər və İdman Nazirliyinin sektor müdiri Fuad Babayev deyib ki, Azərbaycanın ikinci dəfə ev sahibliyi etdiyi festival gənclər arasında mədəniyyətlərarası anlaşma və dialoqun daha da inkişafı baxımından çox əhəmiyyətlidir: "Beynəlxalq "Global Village" festivalında gənclər 25-dən artıq artıq ölkənin mədəniyyətini təqdim etməklə bərabər, ayrı-ayrı xalqların adət-ənənələri, milli mətbəxi, rəqsləri və musiqisi haqqında ətraflı məlumat verirlər". F.Babayev qeyd edib ki, sözügedən festival AİESEC nümayəndəliyinin Azərbaycanda fəaliyyətinə və Azərbaycanın Beynəlxalq AİESEC təşkilatına tamhüquqlu üzvlüyünün 3 illiyinə həsr olunub.

"AİESEC Azərbaycan" şirkətinin prezidenti Fərid İsmayılzadə vurğulayıb ki, təşkilatın xəttilə hər il dünyada 7 min 500 tələbə mübadiləsi həyata keçirilir, beynəlxalq konfranslar təşkil olunur. Onun sözlərinə görə, təşkilat dünyanın 100-dən çox ölkəsində gənclərin şəxsi və peşəkar inkişafına istiqamətlənmiş bütün təşəbbüsləri - təhsil və təlim layihələrini, konfransları, beynəlxalq tələbə mübadiləsi proqramlarını dəstəkləyir.

S.QARAYEVA

525-ci qəzet.- 2009.- 13 may.- S.2.