"Eurovision-2009"un ilk
yarımfinalı keçirilib
Mayın 12-də Moskvada "Eurovision-2009" müsabiqəsinin
I yarımfinalı gerçəkləşib.
APA-nın Moskvaya ezam edilmiş xüsusi müxbirinin məlumatına görə,
müsabiqənin I yarımfinalının
aparıcıları Andrey
Malaxov və Natalya Vodyanova olub.
Müsabiqənin I
yarımfinalında 18 ölkə - Çernoqoriya, Çexiya,
Belçika, İsveç, Belarus, İsveçrə, Ermənistan,
Andorra, İsveç, Türkiyə, İsrail, Bolqarıstan,
İslandiya, Makedoniya, Rumıniya, Finlandiya, Portuqaliya, Malta,
Bosniya və Hersoqovina mübarizə aparıb. Bu ölkələr
arasından 10-u - Türkiyə, İsveçrə, İsrail,
Portuqaliya, Malta, Finlandiya, Bosniya-Hersoqovina, Rumıniya, Ermənistan,
İslandiya finala vəsiqə qazanıblar. Bu 10 ölkənin
finalda çıxış edəcəyi sıra nömrəsi
müəyyənləşib. Mayın 16-da keçiriləcək
final mərhələsində Türkiyə 18, İsveçrə
4, İsrail 2, Portuqaliya 6, Malta 14, Finlandiya 24, Bosniya-Hersoqovina
12, Rumıniya 22, Ermənistan 9, İslandiya 7-ci
çıxış edəcək.
Yarımfinaldan
sonrakı mətbuat konfransında çıxış edən
Türkiyə təmsilçisi Hadisə Açıqgöz
finala vəsiqə qazanmasına çox sevindiyini bildirib. O,
media mənsublarının: "Siz bu müsabiqədə
bütün təmsilçilərdən gözəlsiniz"
- replikasının cavabında: "Bu müsabiqədə hər
bir təmsilçi gözəldir, burada söhbət tək məndən
getməməlidir" - deyib.
İsveçrə təmsilçisi
Malena Ernman bu müsabiqədə ən güclü rəqibinin
Yunanıstan təmsilçisi Sakis Ruvas olduğunu qeyd edib. İsrail
təmsilçiləri Noa və Mira Avad isə
mahnıları ilə bütün dünyaya sülh
arzuladıqlarını bildiriblər: "Biz dünyada gedən
bütün savaşlara yox deyirik, ancaq və ancaq sülh istəyirik.
Bu mahnını oxumaqda da əsas istəyimiz məhz
budur". Artıq üçüncü dəfə bu
müsabiqədə iştirak edən Malta təmsilçisi
Chiara bu dəfə qalib olacağını
düşünür: "Eurovision" müsabiqəsində
bu vaxta qədər iki dəfə iştirak etmişəm. Bir
iştirakımda ikinci, digərində isə
üçüncü olmuşam. Bu dəfə isə
müsabiqənin qalibi olmağa gəlmişəm. Mən istəyimə
çatacağam. İradəliyəm və qalib gəlmədən
geri çəkilməyəcəm".
Qeyd edək ki,
"Eurovision-2009" müsabiqəsinin II yarımfinalı
mayın 14-də keçiriləcək. Azərbaycan təmsilçiləri
Aysel Teymurzadə və Araş müsabiqənin II
yarımfinalında 12-ci çıxış edəcəklər.