Əziz qələm dostlarım!

Qələm dostları deyəndə, on yaşından yüz yaşına kimi şeir yazan hər kəsə səslənirəm. Dostlar, qəzetlərə, jurnallara böyük silsilə şeirlər verməklə oxucunu yazılarınızdan doyuzdurmayın. Az yazı verin, dadı damağında qalsın, axtarıb kitablarınızı alsın. Şeir balaca olanda, səhifədə kiçik görünəndə sizə "balaca şair" deməyəcəklər. Canınıza zəhmət verib, zorla çox yazmayın. Şeir canınızdan atəş, ağrı kimi çıxsın. Siz yazıb dincəlin. Oxucu da oxuyub dincəlsin. Mən də hərdən sizin fitinizə gedib çox yazı çap etdirirəm. Oxuyanda özüm də yoruluram. Peşiman oluram.

Leyli-Məcnun nağılı

   Bir binada doğulub,

   Əvvəl yoldaş oldular.

   Bir bağçaya getdilər,

   Bağrı-badaş oldular.

   Məktəbdə Leyli-Məcnun

   yavaş-yavaş oldular.

   Toy oldu bir ömürlük,

   Göz ilə qaş oldular.

   Yaşayıb qarıdılar,

   Ömürdən yarıdılar...

   O qədər yaşadılar,

   Bacı-qardaş oldular.

   17 may 2009

Fikrət QOCA

525-ci qəzet.- 2009.- 19 may.- S.7.