Azərbaycanda Beynəlxalq Mədəniyyət
Həftəsi keçirilir
Mayın 18-dən Bakıda
Beynəlxalq Mədəniyyət
Həftəsinə start
verilib. Tədbirlər Kıbrıs, Balkanlar, Avrasiya Türk Ədəbiyyatı
Kurumu ( KİBATEK), Türk Dünyası Araşdırmaları Uluslararası
Akademiyası (TDAUEA) və
"Vektor" Beynəlxalq
Elm Mərkəzinin birgə təşkilatçılığı
ilə həyata keçirilir. Bu barədə qəzetimizə
məlumat verən
"Vektor" Beynəlxalq
Elm Mərkəzinin prezidenti, şair Elçin İsgəndərzadə
silsiləyə yazıçı-filosof Hacı Fərhad Mirzənin bir ay əvvəl
Ankarada çap olunmuş "Kəlamlar"
kitabının təqdimat
mərasimi ilə başlandığını bildirib.
Tədbirdə 10-dək
xarici ölkədən
20-dən artıq tanınmış incəsənət,
elm və ədəbiyyat adamı iştirak edir. E.İsgəndərzadənin dediyinə
görə, onların
sırasında İordaniyanın
Türkiyədəki fəxri
konsulu Ömər Kaplan, Sənət Cəmiyyətinin prezidenti
Əminə Sevinc Öksüzoğlu, KİBATEK-in
prezidenti Fəyyaz Sağlam və başqaları var. Onlar təqdimat mərasimində kitabın
əhəmiyyətindən söz açıblar.
E.İsgəndərzadə
bildirib ki, təqdim olunan kitab bir sıra nüfuzlu
mükafatlara layiq görülüb: "Kitabın müəllifinə
KİBATEK-in ildə bir nəfərə təqdim etdiyi
"Türk kültürünə xidmət"
mükafatı da verilib".
Tədbirdə
çıxış edən xalq şairi Nəriman Həsənzadə,
Bakı Musiqi Akademiyasının prorektoru Gülnaz Abdullazadə,
xalq artisti Tofiq Bakıxanov, əməkdar jurnalist İttifaq
Mirzəbəyli yeni mükafat alması münasibətilə
"Kəlamlar"ın müəllifini təbrik edib, ona
yeni yaradıcılıq uğurları arzulayıblar.
E.İsgəndərzadənin
sözlərinə görə, Mədəniyyət Həftəsi
çərçivəsində Azərbaycan, Gürcüstan,
Türkiyə, Makedoniya, Belçika və Almaniyadan gəlmiş
şair və yazıçılar Lənkəran rayonuna da səfər
ediblər. Yazıçılar Birliyinin yerli üzvlərilə
keçirilən görüşdə ədəbiyyatın və
mədəniyyətin xalqlar və ölkələr
arasında münasibətlərə təsirindən
danışılıb. Tədbirdə "Vektor" Beynəlxalq
Elm Mərkəzi tərəfindən bir sıra yazarlara
mükafatlar verilib.
Mayın 24-dək davam
etməsi nəzərdə tutulan Mədəniyyət Həftəsi
çərçivəsində Gəncə və Şəki
şəhərlərinə də səfərlər
planlaşdırılıb.
Sevinc MÜRVƏTQIZI