"Azərbaycanda milli hərəkat"

MƏMMƏD ƏMİN RƏSULZADƏNİN EYNİADLI ƏSƏRİ AZƏRBAYCAN VƏ RUS DİLLƏRİNDƏ KİTAB ŞƏKLİNDƏ ÇAP OLUNUB

Bu günlərdə Məmməd Əmin Rəsulzadənin "Azərbaycanda milli hərəkat" adlı tarixi əsəri Azərbaycan və rus dillərində çapdan çıxıb. Professor Şirməməd Hüseynovun təqdimatı ilə nəşr edilən kitab M.Ə.Rəsulzadənin anadan olmasının 125 illiyinə həsr edilib. Qeyd edək ki, M.Rəsulzadə bu əsəri 1933-cü ildə qələmə alıb. Kitabda ideya mənbələrinə görə Şərqin milli-azadlıq ideyaları ilə Qərbin mədəni-demokratik cərəyanlarını özündə birləşdirən Azərbaycanın milli hərəkatının bütün incəlikləri, habelə Cümhuriyyət dövrü və müsavatçılıq ideyalarıyla bağlı geniş və sanballı məlumatlar yer alıb. Yeni nəşrdə təkcə XX əsr milli hərəkatı ilə əlaqədar deyil, eyni zamanda, "Əkinçi"nin, habelə nəşr edilən digər qəzetlərin, Mirzə Fətəli Axundovun, Həsən bəy Zərdabinin və digər ziyalıların bu sahədə gördüyü işlər barəsində də məlumatlar var.

Bununla yanaşı, əsərdə antimüsəlman siyasət yürüdən Rusiya imperiyasının zülmü altındakı türk xalqlarının siyasi cəhətdən sıx əlaqələr qurması və birgə fəaliyyət göstərməsinə də geniş yer ayrılıb. Kitabda milli hərəkatın inkişafında Azərbaycan ədəbiyyatının roluna daha geniş yer ayrılaraq, müsavatçılıq ideyalarının milli hərəkatın inkişafında oynadığı rol barəsində xeyli məlumatlar verilib. Kitabda həmçinin Azərbaycan Demokratik Cümhuriyyətinin milli ruhun dirçəlməsi sahəsində gördüyü işlər incəliklərilə oxuculara çatdırılır. Bütün bunlarla bərabər kitabda milli ideyaların daşıyıcılarının, müsavatçıların kütləvi şəkildə həbs edilməsi, habelə represiyalarla bağlı da tutarlı məlumatlar öz əksini tapıb.

AQİL

525-ci qəzet.- 2009.- 31 yanvar.- S. 6.