"BOKSÇULARIMIZIN UĞURLARI HƏLƏ QABAQDADIR"

Bu fikri bizimlə söhbətində Azərbaycan Boks Federasiyasının birinci vitse-prezidenti Ağacan Abiyev xüsusi ilə vurğuladı

- Ağacan müəllim, sirr deyil ki, son on ildə Azərbaycan boksu yüksələn bir xətlə inkişaf edir. Sizcə, bunun səbəbi nə ilə bağlıdır?

- Öncə onu qeyd edim ki, ölkə prezidenti cənab İlham Əliyev idmanın bütün növlərinin inkişafına böyük diqqət göstərir. Diqqət və qayğı əvvəllər Ulu Öndərimiz Heydər Əliyev tərəfindən də olub. Bu gün isə tam məsuliyyətlə deyə bilərəm ki, Azərbaycanda idmanın bütün növlərinin yüksək sürətlə inkişafına səbəb ölkə prezidentinin böyük qayğısıdır. Əgər bu qayğı olmasaydı, təbii ki, idmanın bütün növləri üzrə Azərbaycan idmançıları möhtəbər yarışlarda bir-birinin ardınca qızıl medallar qazanmazdı.

- Görünür, öncə idmanın inkişafı üçün maddi -texniki baza yaradılmalıdır və ondan sonra idmançıdan nəsə tələb etmək mümkündür. Bəlkə biz yanılırıq, belə deyil?

- Sizin söylədiyiniz fikirlərdə böyük həqiqət var. Bu gün nəinki Bakı şəhərində, eləcə də ölkəmizin digər şəhər və rayonlarında idmanı inkişaf etdirmək üçün Olimpiya İdman Kompleksləri, dünya standartlarına cavab verən futbol stadiyonları və eyni zamanda digər idman kompleksləri istifadəyə verilib. Təbii ki, belə bir şəraitdə idmanın hər hansı bir növünə marağı olan yeniyetmələr və gənclər istər-istəməz öz istedadlarını və qüvvələrini ortaya qoya bilirlər. Hər bir şəraiti olan idman kompleksində məşq eləmək də asandır, təcrübə toplamaq da və möhtəbər yarışlarda iştirak eləmək də.

- Təbii ki, yaxşı şərait olanda idmançıdan da yüksək göstərici tələb olunur. Yəni hər hansı bir idmançı bəhanə gətirib deyə bilmir ki, məşq zamanı onun üçün şərait yaradılmayıb.

- Ümumiyyətlə, hər hansı idmançı yaxşı məşq etmədən, təcrübə toplmadan, fiziki və psixoloji hazırlığa malik olmadan yüksək nəticəyə, daha doğrusu, çempion adı qazanmağa nail ola bilməz. Hər bir çempionluğa gedən yol gərgin məşqlərdən, yüksək fiziki və psixoloji hazırlıqdan başlayır. Üstəlik, idmançının özünə inamı da bu uğurların qazanmasında başlıca əhəmiyyət kəsb eləyir.

- Bir ara boksçularımızın mötəbər yarışlarda və beynəlxalq turnirlərdə qüvvələri zəiflədi, uğurları azaldı. Daha doğrusu, biz öyrəşmişik ki, boksçularımız başqa ölkələrin idmançılarından daha çox qızıl medal qazansınlar...

- Uzun müddət boksçularımız həm Avropa, həm Dünya çempionatlarında, həm də Beynəlxalq yarışlarda yüksək yer tutublar. Biz bununla sözün həqiqi mənasında qürur duymuşuq. Amma sonradan məşqçi heyətinin zəifliyi üzündən beynəlxalq yarışlarda boksçularımız əvvəlki vaxtlarla müqayisədə o qədər də böyük uğurlar qazana bilmədi. Bu bizi və eyni zamanda Boks Federasiyasının rəhbərliyini çox narahat elədi.

- Elə biz də belə düşünürdük. Çünki Azərbaycan Boks Federasiyası kubalı məşqçiləri ölkəmizə dəvət elədi. Səhv eləmiriksə, bundan sonra boksumuzda yaranmış durğunluq aradan qaldırılmağa başlandı...

- Səhv eləmirsiniz. Həqiqətən də kubalı boksçuların fəaliyyətə başlamasından sonra boksçularımız arasında nizam-intizam daha da yüksəldi. Hətta tanınmış boksçular 1 dəqiqə belə məşqə gec gəldiyinə görə, məşqə buraxılmadı. Təbii ki, bu sərt tədbirlər yalnız və yalnız boksumuzda yaranmış boşluğu doldurmaq üçün idi. Yüksək nizam-intizam, tələbkarlıq və peşəkarlıq artıq zaman-zaman öz sözünü deməyə başlayır.

- Siz "öz sözünü" deyəndə nəyi nəzərdə tutursunuz?

- Konkret olaraq onu nəzərdə tuturuq ki, gənclərdən və yeniyetmələrdən ibarət olan boksçularımız beynəlxalq yarışlarda və eləcə də mötəbər yarışlarda yeni uğurlar qazanmağa başladı. Hər bir uğurun arxasında isə bayaq dediyim kimi, gərgin məşqlər, ağır zəhmət və bir də tələbkarlıq dururdu. Məşqçilər korpusunun yeni taktikası və orijinal metodu zaman-zaman özünü doğrultdu. Rinqə çıxan hər bir boksçumuz son ana qədər döyüşdü və rəqibə qalib gələrək mötəbər turnirin qızıl medalını qazandı. Məgər bunlar asanlıqla əldə edilib?! Hər bir qələbə üçün məşqçilər və idmançılar olmazın əzab-əziyyəti ilə üzləşirlər.

- Axır vaxtlar Sərhədçi İdman Kompleksində keçirilən yeniyetmələr və gənclə arasında ölkə çempionatı çox şeyə aydınlıq gətirdi. Yəni gələcəkdə bu boksçular yığmamızın beynəlaxq turnirlərdə şərəfini qoruya biləcəklər. Siz onlara ümid bəsləyirsinizmi?

- Artıq yığmamızın bir çox yaşlı və normadan artıq çəkisi olan boksçuları idmandan uzaqlaşıblar. İstər-istəməz həmin boksçuların yeri görünməyə başlayır. Ölkə birinciliyinin keçirilməsində elə əsas məqsəd də ondan ibarətdir ki, bu cür yeniyetmələri və gəncləri həmin yarışlarda seçməklə biz onları gələcəkdə yığmaya gətirəcəyik. Onların hər birinin üzərində məşqçilər gərgin işləməli, fiziki və psixoloji cəhətdən bu boksçuları gələcəkdə keçirilcək yarışlara hazırlamalıdırlar.

- Ağacan müəllim, siz Azərbaycan boksunun həm dünənini, həm də bu gününü görmüsünüz. Azərbaycan boksunun gələcəyinə böyük ümidlər bəsləyirsinizmi?

- Mən həmişə yığmamızın ən çətin vaxtında belə inamımı və ümidimi itirməmişəm. İnanmışam ki, hansısa beynəlxalq yarışda uğursuzluğa düçar olsaq da, növbəti Avropa çempinatında mütləq boksçularımız qızıl medal qazanacaq. Necə fikirləşmişəmsə, elə də olub və boksçularımızın bir neçəsi beynəlxalq turnirdə o qızıl medalı qazanıb. Qarşıdan gələn Olimpiya oyunlarında və Avropa çempionatında boksçularımızın möhtəşəm qələbə qazanmasına böyük inamım var. Ən azından ona görə ki, bu gün Azərbaycan boksu daha yüksək sürətlə inkişaf edir. Buna görə də Azərbaycan boksçularının mötəbər yarışlarda uğur qazanmasına nəinki mən, hətta Boks Federasiyasının rəhbərliyi böyük ümid və inamla baxır.

Faiq QİSMƏTOĞLU

Ədalət.- 2010.- 7 avqust.- S. 4.