63 yaşlı "Qarabağ bülbülü"

Murad Rzayev bu gün də yaradıcılıq eşqiylə yaşayır

Murad Rzayev-yəqin ki, bu ad musiqisevərlərə çox şey deyir. Təqdimata o qədər ehtiyacı olmasa da, təkcə "Qarabağ Bülbülləri"nin adını çəkmək yetər ki, onun kim olduğunu anlayasan. "Ədalət" qəzeti olaraq bu gün 63 yaşı tamam olan tanınmış musiqiçi və pedaqoqun həyatından maraqlı məqamları, yaradıcılıq kitabının bəzi səhifələrini onun sevənlərin, musiqi qədri bilən insanlarımızın diqqətinə çatdırmağı özümüzə borc bildik.

Rzayev Murad Yunis oğlu 1947-ci ilin dekabr ayının 7-də Ağdam şəhərində ziyalı ailəsində anadan olub. 1954-cü ildə Ağdam şəhər 3 nömrəli orta məktəbin birinci sinfinə daxil olan gələcək musiqiçi-pedaqoq 1964-cü ildə həmin məktəbi bitirib.

Hələ məktəbdə oxuyarkən rayonun Güllücə kəndində kino qurğusunda motorçu yəni fəhlə işləyən səbəbkar kiçik yaşlarından rayonun Xalq Teatrında bir çox tamaşalarda rollar oynayır, Respublika Teatr Cəmiyyətinin fəxri fərmanına, diplomlarına layiq görülür.

1964-cü ildə Üzeyir Hacıbəyov adına Ağdam Musiqi Texnikumunun Xor-dirijorluq fakültəsinə daxil olan gənc Murad Rzayev 68-ci ildə oranı bitirir və həmin il hərbi qulluğa çağırılır. 1970-71-ci illərdə rayon mədəniyyət evinin bədii rəhbəri kimi çalışır və bu illərdə Rayon Komsomol Komitəsinin bürosunun qərarına əsasən Pioner və Məktəblilər evinə (Hazırda Ağdam Uşaq Yaradıcılıq Mərkəzi) müdir təyin olunur.

24 yaşındaykən çiyinlərini belə məsul vəzifənin ağırlığına verən M.Rzayev rayonda ilk dəfə müəllim və şagirdlərdən ibarət xor qrupu və estrada orkestri yaradır, eyni zamanda adı dillər əzbəri olacaq "Qarabağ Bülbülləri"nin təməlini qoyur. Respublika Komsomol Komitəsinin təqdimatına əsasən 1977-ci ildə Zaqafqaziya Komsomol məktəbinə qiyabi daxil olaraq 1979-cu ildə oranı əla qiymətlərlə bitirir. Həmin ildə Mədəniyyət və İncəsənət Universitetinin mədəni maarif fakültəsinə daxil olan M.Rzayev 1984-cü ildə mədəni maarif işçisi fakültəsini bitirir.

Bu müddətdə isə bədii rəhbəri olduğu "Qarabağ bülbülləri" ansamblı ölkəmizi dünyanın bir çox ölkələrindən uğurla təmsil edir, 40 qızıl medal, 100-dən çox diplomlar, fəxri fərmanlar alaraq, 12 sənədli və bədii filmlərə çəkilərək Zaqafqaziya Ümumittifaq və Beynəlxalq Festivallar Laureatı adına layiq görülür.

Həmin illərdə qabaqcıl iş təcrübəsi və mədəniyyət və incəsənət sahəsində istedadlı şagirdlər yetişdirdiyinə görə ona 1976-cı ildə "Qabaqcıl maarif xadimi", 1985-ci ildə "SSSR-nin maarif əlaçısı" kimi fəxri adlar verilir.

İşlədiyi müddətdə rəhbərlik etdiyi "Qarabağ bülbülləri" qazandığı uğurlara görə həmçinin Sovet İttifaqının Mərkəzi Komitəsinin "SSRİ Xalq Təsərrüfatı Nailiyyətlər sərgisinin, Ağdam rayon partiya komitəsinin, Ümumittifaq pioner təşkilatının döş nişanını, Təhsil Nazirliyinin fəxri diplomunu, Mədəniyyət və Təhsil Nazirliyinin, Qaçqınların və Məcburi köçkünlərin işi üzrə Dövlət Komitəsinin və bir sıra qurumların diplomuna layiq görülüb.

Həmçinin YAP Ağdam rayon təşkilatı tərəfindən mükafatlandırılıb və Milli muğam sənətinin təbliği və inkişafındakı xidmətlərinə görə "Milli Muğam Oskar Mükafatı" alıb. Müəllifi olduğu onlarla mahnılar Mirzə Babayev, Oqtay Ağayev, Flora Kərimova kimi əvəzolunmaz sənətkarlar tərəfindən ifa olunan "Qarabağ bülbülü"nun bəstələrinə Lalə Dadaşova, Teymur Əmrah kimi nisbətən gənc ifaçılar onun bəstələrinə həyat verməyə çalışıblar. Ağdam Dövlət Teatrının tamaşalarına da musiqi yazan M.Rzayevin bəstələri indi də aktuallığını itirmir. Sənətkar deyir ki, bu gün də ölkəmizin musiqi sənətinə layiqli, istedadlı ifaçılar yetişdirməkdə davam edir və davam edəcək. Biz də "Ədalət" qəzeti olaraq Murad Rzayevi 63 yaşının tamam olması münasibətiylə ürəkdən təbrik edir, hər zaman şux, gümrah olmasını arzu edirik.

İntiqam VALEHOĞLU

Ədalət.- 2010.- 7 dekabr.- S. 6.