MƏZAHİR ƏHMƏDOĞLU - JURNALİST, ŞƏXSİYYƏT...

Cəmiyyətin inkişafı bütün tarixi dövrlərdə mətbuatın da inkişafına zəmin yaradır. Eyni zamanda mətbuat da öz növbəsində cəmiyyətin inkişafında müəyyən rol oynayır, ona təkan verir. Bu iki proses bir-birini tamamlayır. Hazırda demokratik inkişaf yolu ilə irəliləyən müstəqil Azərbaycan Respublikasında mətbuat, söz azadlığının yaratdığı böyük imkanlar jurnalistikanın inkişafına təkan vermişdir. Həsənbəy Zərdabinin ənənələrini yaşadan Azərbaycan jurnalistləri əsasən bu sahənin inkişafı üçün yaradılmış əlverişli imkanlardan istifadə edərək, dünyanın qabaqcıl mətbuat orqanlarının da təcrübəsindən bəhrələnməklə cəmiyyətimizin uğurlarını, mövcud problemləri ayrı-ayrı fərdlərin qurumların fəaliyyətini, ölkədə baş verən ictimai-siyasi hadisələri obyektiv şəkildə, yaradıcılıqla işıqlandırır, bir qrup jurnalistlər isə yaradılmış əlverişli şəraitdən istifadə edərək müəyyən siyasi, qruplaşmaların, imkanlı şəxslərin mənafelərinə xidmət edərək bundan bəhrələnir.

Həqiqət naminə demək lazımdır ki, hazırda respublikamızda yüksək peşə hazırlıığna, yaradıcılıq qabiliyyətinə, mənəvi keyfiyyətlərə malik dövlətçiliyimizə sədaqətli, öz dəsti-xətti olan jurnalistlər ordusu yaranmaqdadır.

..."Ədalət" qəzeti redaksiyasının əməkdaşları kimi. Təsadüfi deyildir ki, bu qəzet bir çox digər qəzetlər kimi daha böyük oxucu kütləsi tərəfindən maraqla izlənilir. Respublikamızda nəşr edilən bir çox mətbuat orqanları ilə bərabər "Ədalət" qəzetində də Həsənbəy Zərdabi tərəfindən təməli qoyulmuş milli mətbuatımızın zəngin ənənələrinə sadiq, dünyanın mütərəqqi mətbuat orqanlarının təcrübəsindən bəhrələnən, demokratik ruhlu, yüksək mənəvi və peşə ketfiyyətinə malik jurnalistlər çoxdur. Onlardan biri də Məzahir Əhmədoğludur.

"Ədalət" qəzetinin 25 may 2010-cu il tarixli sayında publisist Əbülfət Mədətoğlunun hörmətli jurnalistimiz Məzahir Əhmədoğlu barədəki "...Hə, Məzahir müəllim" sərlövhəli məqaləsini böyük maraqla, istəklə oxudum. Oxuduqca da düşünürdüm ki, nə yaxşı Məzahir müəllim kimi qələm sahiblərinə, olduqca geniş, zəngin daxili dünyası olan və öz daxili aləmindəki mənəvi zənginlikləri, tükənməz həyat eşqini məharətlə, yaradıcılıqla oxucularına çatdırmağı bacaran, insanları başa düşən, qələmə alan jurnalistlər var. Elə Əbülfət müəllim kimi. Mən inanıram ki, "Ədalət" qəzetinin çoxsaylı oxucularının əksəriyyəti də bu fikirlə şərikdir.

Məzahir müəllimi şəxsən yaxından tanımayanlar da onun bir neçə yazısını oxumaqla bu maraqlı insanın daxili aləminə, geniş yaradıcılıq dünyasına bələd ola bilər.

Əbülfət müəllimin dediyi kimi onun yaradıcılığı ilə az-çox tanış olan hər bir kəs Məzahir müəllimə 100 və bəlkə də daha çox yaş verər. Onun özünəməxsus yüksək mənəvi keyfiyyətləri çoxdur. Ən başlıcası isə odur ki, Məzahir müəllim bütün yazılarında sanki, istər-istəməz öz daxili dünyasını oxucularına olduğu kimi təqdim edə bilir. Bütün yazıları səmimiyyətə, reallığa söykənir bu gözəl insanın. Məzahir müəllim hər hansı bir mövzunu oxucularına çatdırarkən sadəcə bu mövzunu şərh etməklə kifayətlənmir, öz məharətli, cəsarətli qələmi ilə sanki oxucuya elə bir eynək verir ki, bu eynək onun mövzu ilə bağlı daxilindəkiləri güzgü kimi göstərir, heç bir təhrifə yol vermədən əks etdirir.

Mən onun yazılarında dosta, yoldaşa, ətrafındakılara qarşı bizim hamımızda olmayan böyük, şirin bir istiqanlılıq da müşahidə etmişəm. Eyni zamanda çox kövrək incə hisslərə malikdir, Məzahir müəllim. Özü ətrafındakılara qarşı necə diqqətlidirsə, qayğıkeşdirsə özünə qarşı da həmişə bu münasibəti gözləyir. Xüsusilə yaxınları ilə onu çox incə, kövrək, zərif hisslər bağlayır. Bəzən adi bir diqqətsizlikdən, zahirən biruzə verməsə də, daxilən kövrəlir. Lakin tez də barışır. Yazılarındakı fəlsəfəyə, daxili aləminin zənginliyinə bələd olanda onun müdriklik çağında olduğu qənaətinə gəliriksə, ürəyinin bu kövrək, incə, zərif telləri bu insanın hələ yetkinlik yaşında olduğu qənaətinə gətirir.

Bir məsələni xüsusilə vurğulamaq istəyirəm. Məzahir müəllim bir sıra dövlət məmurlarını haqlı olaraq bəzən çox cəsarətlə, səmimiyyətlə tənqid etməklə bərabər dövlətçiliyimizə hədsiz dərəcədə sədaqətli bir qələm sahibi olduğunu sübut etmişdir. Öz yazılarında həmişə reallıqlara söykənən fikirləri ilə oxucularında vətənimizə məhəbbət, dövlətçiliyimizə sədaqət, milli-mənəvi dəyərlərimizə hörmət hisslərini aşılamağa çalışıb.

Özü biruzə verməsə də eşitdiyimə görə, Məzahir müəllim hazırda müəyyən qayğıları olan böyük bir ailənin, nəslin yükünü daşıyır çiynində. Doğrudur, o, heç vaxt öz qayğıları ilə dost-tanışı, yaxınlarını qayğılandırmır.

Məzahir müəllimin yüksək mənəvi keyfiyyətlərindən çox danışmaq olar. Lakin Əbülfət müəllim demişkən yazdıqları elə onun özünün təqdimatçısıdır. Onu yaxşı tanımaq üçün bir neçə yazılarını oxumaq kifayətdir.

Əbülfət müəllimin dediyi kimi mən də bilmirəm onun neçə yaşı var, neçə illik yubileyi yaxınlaşır. Bir onu bilirəm ki, Məzahir müəllim yazdıqca, yazdıqlarına qarşı səmimi münasibəti hiss etdikcə, ətrafındakılardan haqlı olaraq umduğu azca da olsun diqqət və qayğını gördükcə sanki gəncləşir, həyat eşqi, yazıb-yaratmaq ehtirası güclənir bu insanda.

Bütün bunları qələmə aldıqca özümdə bir rahatlıq hiss edirəm. Elə bil ki, Məzahir müəllimin yaradıcılığı ilə, onun daxili aləmi ilə tanış olduqdan sonra ona olan mənəvi borcumu müəyyən qədər yerinə yetirdim sanki. Gərək hər bir oxucu qələm sahiblərinə qarşı diqqətli olsun, axı onların bizdən umduqları nədir, adi səmimiyyət, obyektiv qiymət.

Novruz ŞABANOV

Ədalət.- 2010.- 19 iyun.- S. 13.