TƏLƏSİRİK

Özümü,

gecənin qaranlığına

sürtə-sürtə,

üzümdə

abır-həyanın

boyası,

qəlbimdə

vulkan təlatümü.

Vuruşa-vuruşa

fikrin qaranlığından,

gecənin qaranlığını

zəbt edirəm.

Bu gecənin

başqa

sərnişini yox,

bir qaranlıq,

bir də mən.

O, səhərə tələsir,

Mən

bir qız dodaqlarına

qonaq olmağa.

GEDƏSƏN

Bu dərdlərin başçısının,

Başını kəsib gedəsən.

Qazanı yana çevirib,

Aşını töküb gedəsən.

Dərdləri başından aşa,

İşi çoxalıb, dolaşa.

Sonra da kotana qoşa

Yerini əkib gedəsən.

Gözünə dolan dərdləri,

Əlində ölən dərdləri,

Dərində qalan dərdləri,

İp salıb, çəkib gedəsən.

Qalib ŞƏFAHƏT

Ədalət.- 2010.- 4 noyabr.- S. 7.