75 YAŞLI ALİM

Azərbaycanın cənnət guşələrindən biri olan İsmayıllı rayonunda dünyaya gələn Zakir müəllim özünün həyat salnaməsini göz önünə gətirəndə heç nə üçün təəssüflənmir. Çünki onun sabah 75 yaşı tamam olur və bu 75 ildə o, böyük bir institutun görə biləcəyi qədər işlər görüb. Dövlətin və xalqının qarşısında saysız-hesabsız elmi uğurlara imza atıbdı.

Zakir müəllim bir dağ rayonunda dünyaya gəlib, amma seçdiyi həyat yolu, özünün həsr etdiyi sahə daha çox dənizlə bağlı olubdu. Ali təhsil aldıqdan sonra müxtəlif sahələrdə çalışan Zakir müəllim özünün gələcək həyat yolunu seçdiyi ixtisasla geoloji kəşfiyyatla bağlayıb. Elə ona görə də ilk böyük iş yeri olan Neftçala Yod-brom mədənində özünü təsdiq etməyə, bacarığını ortaya qoymağa başladı. 1957-ci ildə başlanan həmin axtarışlar sonradan onun iştirakı ilə 100-dən artıq yeni quyuların qazılıb istismara verilməsi ilə nəticələnmişdi. Bu gün 75 yaşını qeyd edən Zakir Salman oğlu Məmmədov təkcə Azərbaycan neftçiləri arasında deyil, eləcə də dünyanın bir çox ölkələrində yaxşı tanınır. Çünki onun bu sahədə qazandığı elmi uğurlar, kəşflər, elmi məqalələri həyata tətbiq edildikcə öz müəllifinə böyük şöhrət və nüfuz qazandırır. Çoxlu sayda orden və medalların, döş nişanların, fəxri fərmanların onun adına yazılması heç də təsadüfi deyil. Çünki Zakir Məmmədov Sovet dönəmində SSRİ hüdudlarından da kənarda çalışmış və Əlcəzair Xalq Respublikasında neft-qaz yataqlarının işlənməsi üzrə uzun müddət ekspert vəzifəsində çalışmışdır. Azərbaycanda Balaxanı, Sabunçu, Ramana, Lökbatan, Neftçala, Siyəzən və daha neçə-neçə ərazilərdə qazılıb istismara verilən quyuların hər birində bu böyük alimin öz xidmətləri var.

Geologiya, minerologiya elmləri üzrə alimlik dərəcəsi almış Beynəlxalq Ekoenerji Akademiyasının doktor-professoru Zakir Salman oğlu Məmmədov bu gün də öz ixtiraları ilə, elmi yaradıcılığı ilə məşğuldur. Biz onu təbrik edir və ona elmi uğurlar arzulayırıq.

ƏBÜLFƏT

Ədalət.- 2010.- 6 noyabr.- S. 14.