Beynəlxalq seminar davam edir

Tədbir pulların yuyulması və terrorçuluğun maliyyələşdirilməsinə qarşı mübarizəyə həsr olunub

Azərbaycan Mərkəzi Bankı yanında Maliyyə Monitorinqi Xidməti (MMX) 2010-cu ilin noyabrın 9-11-də Bakıda Dünya Bankı, Beynəlxalq Valyuta Fondu və BMT-nin Narkotiklər və Cinayət İdarəsi ilə birgə "Pulların yuyulmasına və terrorçuluğun maliyyələşdirilməsinə qarşı mübarizə sahəsində əməkdaşlığın aktual məsələləri" mövzusunda beynəlxalq seminar keçirir.

MMX-dən "APA-Economics"ə verilən məlumata görə, seminar Dünya Bankı, Beynəlxalq Valyuta Fondu və BMT-nin Narkotiklər və Cinayət idarəsinin 4 nəfər beynəlxalq eksperti tərəfindən aparılır.

Pulların yuyulmasına və terrorçuluğun maliyyələşdirilməsinə qarşı mübarizə sahəsində uzunmüddətli peşəkar iş təcrübəsinə malik olan beynəlxalq ekspertlər tərəfindən keçirilən seminar praktiki xarakter daşıyır. Seminarda təqdimatlarla yanaşı, pulların yuyulmasına və terrorçuluğun maliyyələşdirilməsinə qarşı mübarizə ilə bağlı konkret nümunələr və ölkə təcrübələri təhlil ediləcək, maliyyə monitorinqi orqanları ilə hüquq-mühafizə orqanları arasında əməkdaşlıq və məlumat bazalarından birgə istifadə məsələlərinə dair müzakirələr aparılacaq.

MMX-nın direktoru Adışirin Qasımov tədbirdə çıxış edərkən bildirib ki, qlobal miqyasda mövcud olan pulların yuyulması və terrorçuluğun maliyyələşdirilməsi problemi azad vətəndaş cəmiyyətinin formalaşdırılması, liberal və rəqabətli bazarların yaradılmasına istiqamətlənmiş beynəlxalq səyləri sarsıdır və milli iqtisadiyyatların inkişafına mane olur. Qeyd edilən problemlərin aradan qaldırılması üçün həm ölkə daxili, həm də beynəlxalq səviyyədə geniş əhatəli strateji fəaliyyətə, intensiv əməkdaşlığa və səmərəli koordinasiyanın təmin olunmasına ehtiyac var.

A.Qasımovun sözlərinə görə, maliyyə sisteminin şəffaflığının və etibarlılığının artırılması, iqtisadi cinayətkarlıq və korrupsiya yolu ilə qanunsuz gəlirlərin əldə edilməsinə qarşı mübarizə sahəsində də Azərbaycan dövlətinin siyasəti aydın hədəflərə malik olan strategiyaya və qabaqcıl beynəlxalq standartların tətbiqinə əsaslanır. Belə ki, Azərbaycanda 2004-2006-cı illər ərzində Korrupsiyaya qarşı mübarizə üzrə Dövlət Proqramı qəbul edilərək uğurla icra edilib. Bu Proqramın davamı kimi "Şəffaflığın artırılması və korrupsiyaya qarşı mübarizə üzrə Milli Strategiya" və bu Strategiyanın həyata keçirilməsi ilə bağlı 2007-2011-ci illər üçün Fəaliyyət Planı qəbul edilib, tam əhatəli həyata keçirilir. Bu proqram və strategiyaların reallaşdırılması nəticəsində bu günlərdə Azərbaycan FATF-ın xüsusi monitorinq rejimindən tam çıxarılıb.

A.Qasımov bildirib ki, seminarın daha bir əlamətdarlığı bu tədbirin pulların yuyulması və terrorçuluğun maliyyələşdirilməsi ilə mübarizədə birbaşa iştirak edən hüquq-mühafizə orqanlarının nümayəndələrinin geniş tərkibdə iştirakı ilə keçirilməsindədir. Müxtəlif dövlət orqanları arasında qarşılıqlı və səmərəli əməkdaşlığın təmin edilməsi, məlumat bazalarından birgə istifadə və məlumat mübadiləsinin həyata keçirilməsi ölkədə effektiv PL/TMM sisteminin formalaşdırılmasının əsas şərtlərindən biri kimi çıxış edir.

Qeyd edək ki, MMX son bir il ərzində pulların yuyulmasına və terrorizmin maliyyələşdirilməsinə qarşı mübarizə mövzusunda 45, o cümlədən beynəlxalq ekspertlərin iştirakı ilə 9 təlim və seminarlar keçirib. Bu təlim və seminarlarda 2 700 nəfərdən çox yerli mütəxəssis iştirak edib.

Ədalət.- 2010.- 11 noyabr.- S. 3.