O BİR ŞAHZADƏMİ, BAŞINDA TACI?..

... Gah tutqunlaşıb hər ötən günün qışa doğru olduğunu xatırladan, gah da "bulud pərdələrin" arxasındakı ilıq nəfəsli günəşə boylanan gözəl bir payız səhəridir. Adına meyvələr şahı narın vətəni deyilən Şirvanın incisi Göyçayın bu al-əlvan səhəri ayrı bir ovqat doğurur. Hardan baxsan, hardan keçsən bu gözəlliyin, bu təmtərağın əsirinə çevrilirsən. Xan çinarların günəşdən qızarmağa, alışıb yanmağa başlayan yarpaqları da sanki bu büsatı özünəməxsus pıçıltılarla vəsf edirlər. "Şahzadənin" şərəfinə bütün şəhər qırmızı, yaşıl, göy, mavi, ağ, qızılı... rənglərə boyanıb, bütün şəhər nağıllı, nəğməli xoş bir tilsimə düşüb sanki.

Qədim Şirvan elinin gündən-günə abadlaşan, inkişaf edib müasirləşən Göyçay şəhəri həmişəki bayram libasına bürünüb. Şəhərin giriş qapılarından tutmuş mərkəzə doğru bütün küçə və meydanlar, park və bağlar al-əlvandır. İnsanların üz-gözündəki sevincin başqa səbəbləri də var. Sakinlər indi modern bir şəhərə çevrilən doğma Göyçayın qürurunu şən əhval-ruhiyyə ilə yaşayırlar. Bütün bunlar Dövlət Proqramlarında da qarşıya qoyulmuş vəzifələrin uğurlu həllinin, sosial-iqtisadi yüksəlişin və başqa fərəhli amillərin göstəricisidir. Yəni bu bayramlar, bu şənliklər Göyçayın halal haqqıdır.

Bu, son illər hər payız Göyçayda keçirilən ənənəvi Nar bayramının səhər ovqatıdır. Və bu dəfəki bayramın təşkilatçılığında, proqram dizaynında yeniliklər də var. Göyçay Rayon İcra Hakimiyyəti və AzNAR ASC-nin birgə keçirdiyi bu böyük el şənliyinin iştirakçısı və qonaqları da çoxdur. Qonaqlar da elə iki istiqamətdən - Göyçay Rayon İcra Hakimiyyətindən və Teymur Əhmədov adına Konserv zavodundan mərkəzi meydana toplaşırdılar.

... Bütün şəhər əhalisi, rayonun yaxın-uzaq kəndlərindən gələn dəstə-dəstə insanlar Göyçayı dünyada məşhurlaşdıran bu möcüzə meyvənin şəninə, şöhrətinə üz tutublar. Addımbaşı qələbəlikdir. Günortaya yaxın Bakıdan, xarici ölkələrdən, respublikanın müxtəlif rayonlarından gələn qonaqların qarşılanma mərasimindən sonra Nar bayramı daha şövqlü, daha teatral məqamlarla davam edəcək.

Hələ ki sakinlər, bayram iştirakçıları əsasən Heydər Əliyev prospektində təşkil edilmiş müxtəlif sərgilərə tamaşa edir, nar məhsullarına, digər bayram atributlarına diqqət yetirir, hal-əhval tutub bayramlaşırlar. Bu görüşlər, bayramlaşmalar zamanı sakinlər Ulu Öndər Heydər Əliyevin bir vaxtlar Göyçaya səfərlərini, bu rayonun inkişafına, xüsusilə nar bağlarının genişləndirilməsinə və nar emalı müəssisələrinin tikilməsinə qayğı və diqqət göstərdiyini xoş duyğularla xatırlayırlar. Bu gün həmin inkişafın daha böyük sürət alması göyçaylıları çox sevindirir. Bütün bunlara görə sakinlər Azərbaycan Respublikasının Prezidenti İlham Əliyev cənablarına minnətdarlıq edirlər.

Saat 12-yə yaxınlaşdıqca qonaqlar dəstə-dəstə Heydər Əliyev prospektindəki geniş meydana daxil olurlar. Bir sıra xarici dövlətlərin ölkəmizdəki səfirləri, Milli Məclisin üzvləri, dövlət məmurları, qonşu rayonların icra hakimiyyəti başçıları və nümayəndə heyətləri, Bakıda və respublikanın digər şəhər və rayonlarında yaşayıb çalışan tanınmış göyçaylılar, elm, mədəniyyət xadimləri, incəsənət ustaları... Bayramın qonaqları çoxdur. Göyçaylıların fəxr etdiyi, dünyada tanınan məşhur iş adamı Fərhad Əhmədov da öz dostları - Azərbaycan Rəssamlar İttifaqının sədri Fərhad Xəlilov, Rusiyanın ölkəmizdəki keçmiş səfiri Vasili İstratov və başqaları ilə birlikdə camaat arasındadır.

Milli paltarlar geyinmiş oğlan və qızlar qonaqlara nar şirəsi və nar məhsulları təklif edirlər. Uşaqlıq dostum Fərəclə mən yanaşı dayanmışıq. Bu bayrama ən çox sevinənlərdən biri də yüksək mədəniyyət sahibi olan Fərəc Əhmədovdur - Fərhad Əhmədovun qardaşı.

İntellektual səviyyə, eyni zamanda sadəlik, təvazökarlıq Əhmədov qardaşlarını fərqləndirən xarakterik xüsusiyyətlərdir.

... Heydər Əliyev mərkəzinin qarşısındakı meydanda daha böyük izdihamdır. Burada Ulu Öndərin abidəsi önünə gül-çiçək dəstələri düzülür. Hamı dahi rəhbərə öz sonsuz ehtiramını nümayiş etdirir.

Göyçay Rayon İcra Hakimiyyətinin başçısı Mənsur Məmmədov çıxış edərək qonaqları və bütün bayram iştirakçılarını salamlayır. O, rayonun sosial-iqtisadi və mədəni yüksəlişinə xüsusi qayğı və diqqət göstərən İlham Əliyev cənablarına göyçaylıların dərin minnətdarlığını bildirir.

Millət vəkilləri - "İrəli" Gənclər Təşkilatının sədri Ceyhun Osmanlı, Sabir Hacıyev, Elton Məmmədov, Şəmsəddin Hacıyev, digər qonaqlar çıxış edərək iştirakçıları Nar bayramı münasibətilə təbrik edirlər.

Sonra bayram tədbirləri orijinal təqdimatlarla bir-birini əvəzləyir. Folklor nümunələri, meydan tamaşaları, müasir rəqs və mahnılar, nar meyvəsinə aid uduşlu yarışlar...

Rəmzi nar ağacı əkilməsi mərasimində Fərhad Əhmədovun qonaqlarla və həmyerliləri ilə çox səmimi söhbətinin də şahidi oluruq. Məşhur göyçaylı deyirdi:

- Ölkənin çox yerində yetişməsinə baxmayaraq, narın əsas vətəni hər zaman Göyçay hesab edilmişdir. Hələ sovetlər dövründə Göyçay narı SSRİ-nin hər yerində məşhur idi. Nar məhsulları xüsusi olaraq Göyçay Konserv zavodunda hazırlanıb Kremlə və digər möhtəşəm yerlərə göndərilirdi. Məhz buna görə də Göyçay narının dünya miqyasında tanınması, bu yolla da Azərbaycanın, o cümlədən Göyçayın şöhrətinin yüksəldilməsi üçün Nar bayramının çox böyük əhəmiyyəti və rolu vardır. Təbiidir ki, bu meyvə Azərbaycandan başqa digər ölkələrdə də yetişir, ondan çoxlu sayda xeyirli məhsullar hazırlayırlar və hər bir ölkə öz məhsulunu dünyaya yaymağa çalışır. Lakin bu gün dünya hər şeyin daha yaxşısını, keyfiyyətlisini axtarır. Bu baxımdan AzNAR-ın dünya arenasına çıxarılan məhsulları, artıq ölkəyə yüksək şöhrət gətirməyə başlamışdır. Təsəvvür edin ki, son iki ildə zavodumuzun məhsulları Kənd Təsərrüfatı Məhsullarının Ümumdünya Sərgisində özünün keyfiyyətinə və digər göstəricilərinə görə 5 qızıl medal qazanmışdır. Bu qızıl medallar Azərbaycan xalqının, o cümlədən göyçaylıların əməyinə və zəhmətinə verilən qiymətdir. Ona görə də mən sizə və xalqımıza, xüsusilə AzNAR-ın fəaliyyətinə qayğı və diqqət göstərən cənab Prezidentə dərin minnətdarlığımı və təşəkkürümü bildirirəm...

Bayram şənlikləri Heydər Əliyev muzeyinin qarşısında, Sabir bağında, qarşı meydanda, prospekt boyu sıralanmış fərqli sərgilərdə, yarmarkalarda davam edir. Açıq havada dəmlənən plov qazanlarının, sac üstündə bişirilən nar qutablarının, ocaq nardançasının, narşərabın xoş və dadlı qoxusu bir-birinə qarışır.

Bayramda tanınmış şairlər də iştirak edir. Ədalətin, Pərvizin söhbətləri maraqlıdır. Bütün şəhəri öz rənginə, təntənəsinə, şahanəliyinə çəkən bu ecazkar meyvənin doğmalığı birdən mənə Rəsul Rzanı, Əli Kərimi... xatırladır. Elə dayandığımız yer də Əli Kərim küçəsi ilə Heydər Əliyev prospektini qovuşdurur. Göyçayı tanıdan, şöhrətləndirən təkcə güleyşə narı, xan çinarları deyil, həm də böyük şairləridir.

Gözəl və bənzərsiz Nar bayramının sevincini yaşaya-yaşaya bu ovqata əsir düşüb o şöhrət zirvələrini xatırlamamaq mümkünmü? Və elə bu zaman mənə bəlkə də dünyanın hansısa bir möcüzəsini görüb yaşamaq da qismət olur. Tanımadığım gənc bir oğlan mobil telefonunda şeirə (!!!) qulaq asırdı. Meyxanaya deyil, repə deyil, Rəqsanəyə deyil, şerə!

... Qayıt, mənim gülüm, yerbəyer elə

Dərdli səhərləri, gecələri sən.

Çaşıb başqa yolla keçirəm elə,

Düz öz qaydasınca küçələri sən.

Qayıt, yerinə qoy Ayı, Günəşi –

Yenə olduğu tək görüm həyatı.

Qayıt, gözüm nuru, könlüm atəşi,

Qayıt, səhmana sal bu kainatı!

Bir zamanlar Göyçay deyəndə həm də Əli Kərim xatırlanırdı...

Axşama doğru hava bir az da mülayimləşir. Heç kim bu əziz bayramdan ayrılmaq istəmir.

Bakıdan gələn incəsənət ustalarının konsert proqramı ilə Göyçayda keçirilən Nar bayramı sona çatır.

Gecə düşüncə atəşfəşanlıq olur, səmada rəngbərəng fişənglər uçuşur...

Məzahir ƏHMƏDOĞLU

Ədalət.- 2010.- 19 noyabr.- S. 5.