Bakıda Beynəlxalq Caz Festivalı davam edir

II Beynəlxalq Caz Festivalı çərçivəsində Heydər Əliyev Sarayında yaponiyalı pianoçu Keiko Matsuinin konserti olub. XX əsrin 80-ci illərinin ortalarından başlayaraq məşhurlaşan K.Matsui əsasən caz-pop və fyujn üslubunda ifaçı kimi tanınır. O, Şərqin musiqi mədəniyyətinə sədaqətini qoruyub saxlamış, orijinal bəstəkar özünəməxsus vokalçı kimi uğur qazanıb. Gecədə yaponiyalı sənətçinin caz kompozisiyaları böyük maraqla qarşılanıb.

Keikonun daimi konsert qrupuna tanınmış saksafonçu Mişel Gegan, basist Mel Broun və ənənəvi yapon fleytaçısı Kazu Matsui daxildir. Qeyri-adi ifa tərzi ona özünəməxsus vokalçı kimi də uğur qazandırıb. 2000-ci ildən başlayaraq dünya caz müsabiqələrində və festivallarında uğurla çıxış edən Keikonun kompazisiyaları Yaponiya və Amerikada lirik mahnılar kimi, digərləri kinofilmlərə etüdlər kimi səslənir. Tənqidçilərin ümumi fikrinə görə, XXI əsrdə Keikonun yaradıcılığı yeni musiqi kateqoriyaları ilə daha yaxşı uzlaşır.

Ədalət.- 2010.- 30 oktyabr.- S. 24.