İlham Əliyev: "Dağlıq Qarabağa müstəqilliyin verilməsi mümkünsüzdür"

"Ermənistan-Azərbaycan, Dağlıq Qarabağ münaqişəsinin həlli prosesində mövqeyimiz birmənalıdır. Bu məsələdə beynəlxalq hüquq normaları tam şəkildə təmin edilməlidir". APA-nın "AzərTAc" agentliyinə istinadən verdiyi məlumata görə, bunu Azərbaycan prezidenti İlham Əliyev Nazirlər Kabinetinin 2011-ci ilin birinci rübünün sosial-iqtisadi inkişafının yekunlarına həsr olunmuş iclasında deyib.

Prezident bildirib ki, BMT Təhlükəsizlik Şurasının 4 qətnaməsi qeyd-şərtsiz icra edilməlidir: "Necə ki, Liviya ilə bağlı BMT Təhlükəsizlik Şurasının qətnamələri bir neçə saatdan sonra icra edilməyə başlanıb. Mən bu barədə artıq fikrimi bildirmişəm. Bir daha demək istəyirəm ki, bu, ədalətsizlikdir, ikili standartdır və bu, ayrı-seçkiliyi heç bir səbəblə izah etmək mümkün deyil. Çünki ermənilər tərəfindən azərbaycanlılara qarşı soyqırımı - genosid törədilib. Xocalı soyqırımı törədilib. Ermənilər tərəfindən günahsız insanlar vəhşicəsinə qətlə yetiriliblər. Nədənsə o zaman dünya birliyi bizim dərdimizə biganə qaldı. Azərbaycanın beynəlxalq birlik tərəfindən tanınmış əraziləri uzun illərdir ki, işğal altındadır. Təhlükəsizlik Şurasının 4 qətnaməsi qəbul edilib, ATƏT-in qərarları, Avropa Parlamenti, Avropa Şurası, İslam Konfransı Təşkilatı, NATO-nun qərarları - bütün bunlar işğal edilmiş torpaqlardan erməni qoşunlarının çıxarılmasını tələb edir. Ancaq məsələ həllini tapmır. Belə olan halda haqlı olaraq Azərbaycan vətəndaşları sual verirlər ki, nə üçün bizə qarşı münasibət fərqlidir? Bunun səbəbi nədir? Mən də bu sualı beynəlxalq ictimaiyyətə, beynəlxalq aləmdə nüfuza malik olan ölkələrə ünvanlayıram".

Dövlət başçısı qeyd edib ki, Azərbaycanın ərazi bütövlüyü bərpa olunmalı, işğala son qoyulmalı və bu məsələ tezliklə həllini tapmalıdır: "Çünki Azərbaycan xalqının səbri tükənməz deyil". Prezident danışıqlar prosesində Azərbaycanın mövqeyinin birmənalı olduğunu vurğulayıb: "Bu mövqe bizim arzularımıza deyil, beynəlxalq hüquqa əsaslanır və beynəlxalq hüquq hələ ki, dünyada başlıca meyardır. Biz indi görürük ki, beynəlxalq hüquq normaları müxtəlif yerlərdə kobudcasına pozulur. Ona görə də Azərbaycanın ərazi bütövlüyü bərpa edilməli, heç bir şərt irəli sürülməməlidir".

İ.Əliyev vurğulayıb ki, hazırda danışıqlar masasında olan təkliflər Azərbaycanın ərazi bütövlüyünün bərpasını təmin edəcək. Eyni zamanda, məsələ öz həllini Dağlıq Qarabağda yaşayan insanların və oraya mütləq qayıdacaq Azərbaycan vətəndaşlarının muxtariyyət, özünüidarəetmə statusunda yaşamasını təmin edə biləcək prinsiplər əsasında tapa bilər: "Bir daha demək istəyirəm ki, Dağlıq Qarabağa müstəqilliyin verilməsi, yaxud nə vaxtsa bunun edilməsi mümkünsüzdür. Bu, danışıqlar mövzusu deyil və olmayacaq".

Prezident bəyan edib ki, Azərbaycan imitasiya, danışıqlar naminə danışıqlarda iştirak etməyəcək. İlham Əliyev ölkədə inhisarçılığa qarşı mübarizəni daha da gücləndirilməsinin vacibliyini vurğulayıb. Prezident deyib ki, həm idxalda, həm də ki, daxili istehsalda inhisarçılığa qarşı mübarizə daha da güclü aparılmalıdır. Bəzi hallarda inhisarçılıq deyəndə daha çox idxalla bağlı olan məsələlər yada düşür. Ancaq son hadisələr, xüsusilə Novruz bayramı ərəfəsində müşahidə olunan mənzərə onu göstərir ki, daxildə istehsal olunan malların qiymətlərinin süni şəkildə qaldırılması halları baş vermişdir. "Biz dərhal operativ şəkildə lazımi tədbirləri gördük. Süni şəkildə artırılan qiymətlərin tənzimlənməsi üçün lazımi addımları atdıq. Ancaq həm idxalla, həm də daxili istehsalla bağlı inhisarçılığa yol verilməməlidir", prezident bildirib.

Dövlət başçısı qeyd edib ki, Azərbaycanın bazarı demək olar ki, kifayət qədər məhduddur. "Əgər hansısa bir böyük istehsalçı yaranırsa,- biz istəyirik, maraqlıyıq ki, həm orta və kiçik sahibkarlıq artsın, həm böyük şirkətlərimiz olsun və onlar da güclənsin, dövlət tərəfindən verilən dəstək, siyasi, iqtisadi dəstək artıq böyük şirkətlərin yaranmasına xidmət göstərir,- ancaq, böyük şirkət istər-istəməz inhisarçıya çevrilir, bəzi hallarda öz maraqlarının təmin olunması üçün qəbuledilməz addımlar atır", o deyib. İlham Əliyev bildirib ki, belə olan halda inhisarçılığa qarşı mübarizə həm idxalda, həm daxili istehsalda daha da güclü olmalıdır və elə etmək lazımdır ki, xoşagəlməz hallara yol verilməsin. Bununla yanaşı prezident vurğulayıb ki, korrupsiya və rüşvətxorluğa qarşı mübarizənin gücləndirilməsi gözəl nəticələrini verir. Bu siyasət davam etdiriləcək. "Bu, bizim şüurlu seçimimizdir və görülən tədbirlər xalq tərəfindən yüksək qiymətləndirilir. Biz burada bir neçə amili nəzərə almalıyıq. Bu mübarizə genişmiqyaslı və çoxşaxəli olmalıdır. Əlbəttə ki, inzibati tədbirlər gücləndirilməlidir, cəza tədbirləri bundan sonra da tətbiq olunacaqdır, ictimai nəzarət daha da güclü olmalıdır", o qeyd edib.

Həmişə insanlarla təmasda olan zaman, xoşagəlməz hallar haqqında məlumatlar vermələrini müraciət edən prezident qeyd edib ki, Azərbaycanda ümumiyyətlə, bütün sahələrdə ictimai nəzarət daha da güclü olmalıdır. İslahatların dərinləşməsi prosesi getməlidir. Bu da antikorrupsiya tədbirlərinin arasında mühüm əhəmiyyətə malik olan sahədir. Sağlam rəqabət təmin edilməlidir. Qeyri-sağlam rəqabət aradan qaldırılmalıdır. Bütün sahələrdə şəffaflıq təmin edilməlidir. "Bizdə bu sahədə gözəl təcrübə vardır. Bizdə şəffaflıqla bağlı məsələlər uğurla həllini tapır. Azərbaycan Dövlət Neft Fondunu misal gətirmək olar. Dünya miqyasında ən böyük və müsbət qiymətlərə layiq olan qurumdur və biz şəffaflıqla bağlı inkişaf etmiş ölkələrin bir çoxundan qabaqdayıq. Bu sahədə əldə olunmuş nailiyyətlər bütün başqa sahələrə də şamil edilməlidir", prezident deyib. "Bu ilin birinci rübündə ölkə iqtisadiyyatı uğurla inkişaf edib və bütövlükdə 1,6% artıb. Ancaq sevindirici hal isə qeyri-neft sektorunun 5,6 faiz artmasıdır". Dövlət başçısı bildirib ki, əsas vəzifə qeyri-neft sektorunu inkişaf etdirmək, neft-qaz amilindən asılılığı azaltmaq, beləliklə, ölkə iqtisadiyyatının şaxələndirilməsinə nail olmaqdır: "Ona görə qeyri-neft sektorunun inkişafına xüsusi diqqət göstərilir, ölkədə aparılan sosial və iqtisadi islahatlar, ilk növbədə bu məqsədə nail olmaq üçün həyata keçirilir".

Prezident qeyd edib ki, sənaye istehsalı bütövlükdə 0,3% artsa da, sənayenin inkişafında əsas məsələ qeyri-neft sənayesinin 9,8% artmasıdır: "Bu da onu göstərir ki, qeyri-neft sektoruna qoyulan vəsait, investisiyalar, sahibkarlara yaradılmış şərait gözəl nəticələrini göstərib. Bütövlükdə sənaye istehsalında o qədər də böyük artımın olmaması neft-qaz sektorunda hasilatda müəyyən azalmanın səbəbidir. Ancaq bu azalma əlbəttə ki, müvəqqəti xarakter daşıyır və hazırda Azərbaycanda neftin hasilatı demək olar ki, yüksək həddə çatıb və bu səviyyədə qalacaq".

Qaz istehsalından danışan prezident bildirib ki, növbəti illərdə qoyulacaq investisiyalar hesabına qaz hasilatı da artmalıdır: "Narahatedici məsələlərdən biri odur ki, birinci rübdə inflyasiya 9,1% artıb. Bu, bizi narahat edir. Ancaq hazırda inflyasiya birrəqəmlidir, elə etməliyik ki, biz birrəqəmli inflyasiyanın səviyyəsini saxlaya bilək. Bununla bərabər, əhalinin pul gəlirləri 16%-dən çox artıb. Yəni, əgər biz yenə də inflyasiyanı əhalinin pul gəlirləri ilə müqayisə etsək, görərik ki, gəlirlərdə real artım müşahidə olunur. Əminəm ki, bu meyllər il ərzində özünü daha böyük həcmdə göstərəcək".

Prezident deyib ki, ölkədə yığılan valyuta ehtiyatları 34,2 milyard dollara bərabərdir: "Bu istiqamətdə də bütün tapşırıqlar yerinə yetirilir və valyuta ehtiyatlarımız artır. Ölkədə böyük investisiya layihələri icra edilir və bu layihələr böyük vəsait tələb edir. Buna baxmayaraq, biz həm investisiya layihələrimizi təmin edirik, eyni zamanda, valyuta ehtiyatlarımızı da artırırıq. Bu, özlüyündə gözəl göstəricidir. Eyni zamanda, bu, ölkənin iqtisadi və maliyyə gücünü göstərir. Əminəm ki, ilin sonuna qədər ölkənin valyuta ehtiyatları artacaq və bu artım çox təsirli olacaq". Bütövlükdə iqtisadi sahədə bütün tapşırıqların yerinə yetirildiyini qeyd edən prezident birinci rübün yekunlarının ilin sonuna qədər bu müsbət meyllərin özünü göstərəcəyini söyləməyə əsas verdiyini qeyd edib: "Sosial sahədə bütün proqramlar həyata keçirilir. Bütün sosial məsələlər həllini tapır. Sosial infrastrukturun yaradılması istiqamətində proqram üzrə işlər aparılır. Məktəblərin, xəstəxanaların, sosial obyektlərin, mədəniyyət, idman obyektlərinin tikintisi investisiya proqramı çərçivəsində müəyyən olunduğu kimi icra edilir. Birinci rübün yekunlarına görə ölkədə orta əməkhaqqı 340 manat səviyyəsindədir. Əgər biz dollarla hesablasaq, bu, haradasa 430 dollara yaxındır. Bu, yaxşı göstəricidir. Orta əməkhaqqının artımı ölkədə həm iqtisadi, həm də sosial sahədə aparılan siyasətin əlamətidir. Biz bazar iqtisadiyyatına sadiq olan ölkəyik. Eyni zamanda, sosial məsələlər də Azərbaycanda uğurla həllini tapır. Əlbəttə, bunun ən gözəl göstəricisi odur ki, Azərbaycanda yoxsulluğun səviyyəsi ildən-ilə aşağı düşür".

Dövlət başçısı bildirib ki, 2010-cu ilin yekunlarına görə Azərbaycanda yoxsulluq 9,1% səviyyəsində olub: "Ümid edirəm ki, bu il ərzində həm iqtisadi, həm də sosial sahədə görüləcək işlər nəticəsində, eyni zamanda, bu il maaşların və pensiyaların gözlənilən artımları hesabına Azərbaycanda yoxsulluq şəraitində yaşayanların sayı yenə də azalacaq". Hər bir ölkədə yoxsulların olduğunu qeyd edən prezident ölkədə aparılan quruculuq işlərinin, iqtisadi islahatların, sosial proqramların bu ağır problemin həllinə imkan yaradacağını qeyd edib: "Bununla bərabər, bütün regionlarda regionların sosial-iqtisadi inkişafı Dövlət Proqramı uğurla icra edilir. Bu ilin birinci rübündə nəzərdə tutulmuş bütün investisiya layihələri vaxtında həllini tapır. Birinci üç ayda regionlarda təxminən on yeddi min yeni iş yeri açılıb. Bu proses davam edir. Bütövlükdə birinci proqramın icrasından sonra ölkəmizdə 930 min yeni iş yeri açılıb. Sahibkarlara kömək məqsədi ilə kreditlər ayrılır və bu kreditlər gözəl nəticələrini verməkdədir. Yəni, regionların inkişafı proqramı icra edilir. Regionlara səfərlərim mənə imkan verir ki, görülən işləri özüm gözümlə görüm və deyə bilərəm ki, hər bir bölgədə inkişaf var. Ən önəmlisi odur ki, bu inkişaf davamlıdır. Biz əldə edilmiş uğurlarla kifayətlənməməliyik. Baxmayaraq ki, son illərdə Azərbaycanda böyük işlər görülüb, biz daim inkişaf etməli, daim mövcud problemlərin həlli işində fəal olmalıyıq".

Prezident bildirib ki, regionların sosial-iqtisadi inkişafı proqramının icrası ilə bərabər, Bakıətrafı qəsəbələrin sosial-iqtisadi inkişafı proqramı da hazırlanır. Bu məqsədlə keçən ay geniş müşavirə keçirilib. Bütün tapşırıqlar verilib. Hazırda problemlər təhlil edilir: "Əslində, biz bu problemləri bilirik. O problemlərin həlli üçün xüsusi proqram qəbul olunandan sonra biz bu il proqramda nəzərdə tutulacaq məsələlərin bir hissəsini icra edəcəyik. Ancaq vaxt itirməmək üçün Prezidentin Ehtiyat Fondundan Bakı Şəhər İcra Hakimiyyətinə 10 milyon manat ayrılıb ki, bu məsələlər təxirə salınmadan həllini tapsın".

Dövlət başçısının sözlərinə görə, artıq qəsəbələrdə işlər başlayıb. Qəsəbələrdə tez-tez olduğunu vurğulayan prezident deyib ki, qəsəbələrdə son illərdə böyük işlər görülüb: "Tikilən məktəblər, demək olar ki, qəsəbələrdə təhsil sahəsinin inkişafına müsbət təsir göstərib. Bəzi qəsəbələrdə su qıtlığı mövcuddur. Kanalizasiya problemi, demək olar ki, bütün qəsəbələrə xas olan məsələdir. Kanalizasiya problemi təkcə qəsəbələrdə deyil, Bakı şəhərinin özündə də qarşıda duran çox kəskin məsələdir. Bununla bərabər, son illər aparılmış işlər nəticəsində elektrik enerjisi ilə təminat yaxşıdır. Heç bir şikayət, heç bir müraciət olmayıb. Qəsəbələrin qazlaşdırılması prosesi gedir. Hazırda bu məsələ demək olar ki, tam şəkildə həll edilib. Sadəcə, növbəti bir neçə il ərzində biz yeni xətlərin çəkilişi nəticəsində qazın təzyiqinin də yaxşılaşdırılmasına nail olmalıyıq".

Prezident bildirib ki, səhiyyə məsələləri də müəyyən dərəcədə həll olunub: "Amma yeni xəstəxanaların, poliklinikaların tikintisinə ehtiyac var. Ən vacib məsələ, - bu problemi bütün qəsəbələrə aid etmək olar, - yollar məsələsidir. Demək olar ki, qəsəbələrin yollarının əksəriyyəti torpaqdır. Hazırda yol çəkilişi prosesi başlanıb. Geniş, çox dəqiq və konkret proqram qəbul olunandan sonra 2013-cü ilə qədər qəsəbələrdə mövcud problemlərin böyük əksəriyyəti həll ediləcək. Baxmayaraq ki, bu çox böyük proqramdır. Qəsəbələrdə hazırda 800 mindən artıq əhali yaşayır. Bu özlüyündə böyük bir şəhərdir. Bu məsələlər həllini tapmalıdır".

Dövlət başçısı başqa böyük infrastruktur layihəsi - Beynəlxalq Dəniz Ticarət Limanından da danışıb. Prezident çıxışında vurğulayıb ki, informasiya-kommunikasiya sektorunda bu ilin birinci rübündə çox böyük artım var. Bu sektor çox dinamik inkişaf edir. Azərbaycan bu bölgədə artıq informasiya-kommunikasiya texnologiyaları üzrə mərkəzə çevrilir. Ənənəvi olaraq "Bakutel" sərgiləri keçirilir. Azərbaycana və burada görülən işlərə dünyada maraq artır. Bu sektorun inkişafı Azərbaycanda ümumi intellektual potensialın və intellektual imkanların inkişafına xidmət göstərəcək, eyni zamanda, bu sektorun böyük kommersiya əhəmiyyəti vardır. Artıq bu sektor yeni bir gəlir mənbəyinə çevrilir. Gələcəkdə bu sektorda əldə olunacaq gəlirlər ölkə iqtisadiyyatının inkişafına çox güclü təsir göstərəcək. Süni peykin yaradılması proqramı icra edilir. Prezident ümid etdiyini bildirib ki, Azərbaycan yaxın zamanlarda öz peykinə malik olacaq: "Bu, həm də ölkənin imici və nüfuzu üçün çox vacib məsələdir. İlk növbədə isə praktiki nöqteyi-nəzərdən bu, çox vacib layihədir. Peykin kommersiya istismarından əldə olunacaq gəlirlər də yaxşı imkanlar yaradacaq".

Dövlət başçısının sözlərinə görə, birinci rübündə görülən işlər göstərir ki, ölkə iqtisadiyyatı uğurla inkişaf edir, sosial məsələlər həllini tapır, hər bir sahə üzrə konkret proqramlar var: "Dünyada gedən proseslər, xüsusilə neftin dünya bazarlarında kəskin şəkildə bahalaşması istər-istəməz inflyasiya risklərini də artırır. Belə olan halda biz gərək antiinflyasiya tədbirlərinin gücləndirilməsində daha da məqsədyönlü siyasət aparaq. Həm dünyada gedən proseslər, neftin bahalaşması, eyni zamanda, ölkəmizdə maaşların, pensiyaların gözlənilən artırılması məsələləri istər-istəməz inflyasiya risklərinə öz təsirini göstərəcək. Biz çalışmalıyıq ki, 2011-ci ildə inflyasiya birrəqəmli olsun və bütün antiinflyasiya tədbirləri daha da güclü və məqsədyönlü şəkildə həyata keçirilsin". İ. Əliyev istehlak qiymətlərinə nəzarət edildiyini, daim monitorinq aparıldığını, bundan sonra da bu məsələlərin diqqətdə saxlanılacağını deyib.

Prezident miqrasiya ilə bağlı məsələlərin də Azərbaycanda uğurla həllini tapdığını bildirib: "Miqrasiya da inkişafın təzahürüdür. Qanunsuz miqrasiyaya qarşı ciddi tədbirlər görülür. Əgər Azərbaycanda sürətli inkişaf olmasaydı, xaricdən Azərbaycana işləmək üçün gələnlərin sayı o qədər də çox olmazdı. Biz əlbəttə ki, ilk növbədə daxili əmək resurslarımızı müdafiə etməliyik. Baxmayaraq ki, son illərdə Azərbaycanda bir milyona yaxın iş yeri yaradılıb və bunun tam əksəriyyəti daimidir, yenə də işsizlik məsələləri var. Elə etməliyik ki, ilk növbədə Azərbaycan vətəndaşları işlə təmin olunsunlar. Eyni zamanda, Azərbaycan dünya iqtisadiyyatının bir parçasıdır və biz bütün inteqrasiya proqramlarına çox müsbət baxırıq. Azərbaycanda liberal iqtisadiyyat və işləmək üçün bütün imkanlar var. Azərbaycan xalqı qonaqpərvər xalqdır, Azərbaycanda quruculuq-abadlıq işləri, müasir xidmətlərin yaradılması məsələləri əlbəttə ki, miqrantları cəlb edir".

İ.Əliyev qeyd edib ki, Azərbaycanda ictimai asayiş çox yüksək səviyyədə qorunur, təhlükəsizlik tədbirləri güclüdür: "Şəhərlərimizə xas olan əlamət ondan ibarətdir ki, insanlar özlərini çox rahat hiss edirlər". Prezident bildirib ki, növbəti aylarda sahibkarlığın inkişafı işində əlavə tədbirlər görüləcək. Sahibkarlığa Kömək Milli Fondunun xətti ilə artıq kreditlərin verilməsinə başlanıb: "Bu kreditlər bütün bölgələri əhatə edir. Bu il veriləcək kreditlər hesabına yeni müəssisələr, yeni iş yerləri yaradılacaq və ölkə iqtisadiyyatının çoxşaxəli şəkildə inkişaf etməsinə biz daha da böyük həcmdə nail olacağıq. Bu ilin birinci rübünün uğurlu yekunları, xüsusilə qeyri-neft sektorunun artımı, o cümlədən sahibkarlığa göstərilən diqqətin nəticəsində mümkün olub. Güzəştli şərtlərlə verilən kreditlər, sahibkarlara dəstək, regional inkişaf proqramının icrası və proqrama vaxtaşırı əlavələrin edilməsi məsələləri də əlbəttə ki, müsbət rol oynayır".

Dövlət başçısı bildirib ki, hazırda taxılçılığın inkişafı ilə bağlı təkliflər paketi hazırlanır. Prezident ətraf mühitin qorunması işində səylərin daha da gücləndirilməsinin vacibliyini vurğulayıb. O bildirib ki, hazırda bütün ölkədə içməli su və kanalizasiya layihələri icra edilir. İ.Əliyev əlavə edib ki, bu ay Bakı qəsəbələri ilə bağlı proqram qəbul ediləcək: "Proqrama çox ciddi nəzarət edilməlidir. Həm Bakı Şəhər İcra Hakimiyyəti, həm rayon icra hakimiyyətləri, həm də İqtisadi İnkişaf Nazirliyi tərəfindən proqram vaxtaşırı təhlil olunmalı, əlavələr edilməlidir. Bakı qəsəbələrinin inkişafı proqramı çərçivəsində qəzalı vəziyyətdə olan məktəblərin bərpası və yenidən qurulması məsələləri öz həllini tapmalıdır".

Son illərdə bu sahədə çox böyük işlər görüldüyünü deyən prezident iki mindən artıq məktəbin tikilib istifadəyə verildiyini, əlavə korpuslar tikildiyini qeyd edib: "Ancaq qəzalı vəziyyətdə olan məktəblərin sayı hələ də kifayət qədərdir. Burada əlbəttə ki, müxtəlif fikirlər ola bilər: hansı məktəb qəzalı məktəb hesab olunmalıdır və burada fikir müxtəlifliyi var. Çünki mən bu məsələ ilə bağlı göstərişlər vermişəm ki, qəzalı vəziyyətdə olan məktəblərin sayını mənə versinlər və o məktəblər hansı rayonlarda, hansı qəsəbələrdə yerləşir. Hər halda, mən hesab edirəm ki, Azərbaycanda pis vəziyyətdə məktəb olmamalıdır".

Prezident qeyd edib ki, bütün məktəblər yaxşı vəziyyətdə olmalıdır: "Büdcəyə əlavələr edilən zaman bu məqsədlər üçün də vəsait nəzərdə tutulacaq. Bununla bərabər, ölkədə uşaq bağçaları ilə bağlı problemlər də var. Bu problemlər müstəqilliyimizin ilk illərində yaranıb. O vaxt uşaq bağçalarının bir hissəsi özəlləşdirilib. Yaxud da ki, onlardan başqa məqsədlər üçün istifadə olundu. Bəzilərində dükanlar, restoranlar, digər məişət obyektləri yaradıldı. Yəni, o dövrdə belə xoşagəlməz hallara yol verilirdi. Ona görə, hazırda mövcud olan uşaq bağçaları bizim tələbatımıza heç uyğun gəlmir. Sovet vaxtında tikilmiş bağçalar daha az əhaliyə hesablanmışdı. Ona görə bu vəziyyət çox ciddidir. Burada yeganə real yol ondan ibarətdir ki, yeni uşaq bağçaları tikilməlidir. Mən hesab etmirəm ki, biz özəlləşdirmənin nəticələrinə yenidən baxaq. Bu, mümkün deyil. Azərbaycan bazar iqtisadiyyatına sadiq ölkədir. Azərbaycan xarici və daxili investorlar üçün çox etibarlı ölkədir və bu, bizim böyük nailiyyətimizdir. Hamı bilir ki, Azərbaycan öz sözünə sadiqdir və investisiyalar - istər xarici, istər daxili olsun - dövlət tərəfindən qorunur. Bu siyasət bundan sonra da davam etdiriləcək. Ona görə bizim bircə yolumuz qalır ki, yerlər müəyyən edilsin və biz uşaq bağçalarının tikintisinə geniş şəkildə başlaya bilək. Ona görə bu göstərişi də verirəm. Büdcəyə əlavələrdə bu məsələ mütləq həllini tapmalıdır. Bu il və növbəti illərdə uşaq bağçalarının tikintisi proqramı icra edilməlidir".

Neft-qaz sektorundan danışan dövlət başçısı deyib ki, Azərbaycan öz imkanlarını genişləndirir və bütün ölkədə qazlaşdırma prosesi gedir: "Demək olar ki, hər həftə hansısa kənd qazlaşdırılır. Bütün infrastruktur yenidən qurulur, bu işlər müasir səviyyədə görülür və hesab edirəm ki, növbəti iki il ərzində ölkədə qazlaşdırma ilə bağlı əsas məsələlər həllini tapacaq. Bu ilin birinci rübündə Avropa İttifaqı ilə Azərbaycan arasında "Cənub" qaz dəhlizi üzrə bəyannamə imzalanıb. Bəyannamədə Azərbaycan Avropa istehlakçıları üçün təchizatçı və kömək edən ölkə kimi göstərilir. Azərbaycanın zəngin qaz ehtiyatları müxtəlif yollarla dünya bazarlarına çatdırılır və çatdırılmalıdır. Biz elə etməliyik ki, zəngin qaz ehtiyatlarımızdan maksimum dərəcədə səmərəli şəkildə istifadə edək, yaxın gələcəkdə hasilatın həcmini artıraq. Bunu etmək üçün, şübhəsiz, bizim üçün mövcud olan bazarlarda qazımızın həcmini artırmalıyıq və yeni bazarlara çıxmaq üçün çalışmalıyıq. Hazırda müxtəlif ölkələrlə ikitərəfli danışıqlar gedir və əlbəttə, Avropa İttifaqı ilə Azərbaycan arasındakı əlaqələr, imzalanmış sənədlər bu məsələnin həlli üçün mühüm addım olacaq".

Prezident elektrik enerjisinin istehsalı sahəsində bütün işlərin lazımi səviyyədə aparıldığını, Azərbaycanın artıq elektrik enerjisi ixrac edən ölkəyə çevrildiyini də deyib: "Bu il Füzuli Su Elektrik Stansiyası istismara verilməlidir. Onun gücü 25 meqavatdır. "Cənub" Elektrik Stansiyası da istifadəyə verilməlidir. Onun gücü isə 800 meqavata yaxındır. Hazırda müxtəlif hesablamalara görə 1000 meqavata yaxın əlavə enerji gücümüz var ki, biz ondan istifadə etmirik. Gələcəkdə əlbəttə ki, elektrik enerjisinin ixracı ilə daha da ciddi məşğul olmalıyıq. Bunu etmək üçün qaz sahəsində olduğu kimi, bu sahədə də həm hazırkı bazarlara ixracı artırmalıyıq, eyni zamanda, yeni bazarlara da çıxmalıyıq. Bu məqsədlə hazırda Azərbaycanla Gürcüstan arasında 500 kilovotluq enerji xətlərinin tikintisinə başlanıb. Bu məqsədlə Samuxda yeni böyük yarımstansiya tikilib. Neft və qazdan sonra üçüncü vacib ixrac xəttimiz bu xətt olmalıdır. Bununla bərabər, bərpa olunan enerji mənbələrinin yaradılması prosesi gedir, kiçik su elektrik stansiyaları tikilir, bir neçəsinin təməl daşı qoyulub".

Dövlət başçısı magistral yolların tikintisi ilə bağlı əlavə tədbirlər görülməli olduğunu da qeyd edib: "Bütün magistral yollarda işlər gedir. Şəhərlərarası yollar, kənd yolları tikilir. İlin sonuna qədər bu sahədə əlavə vəsaitin ayrılması hesabına işi daha da sürətləndirməlidir. Xüsusilə Bakı-Rusiya sərhədi yolunun davam etdirilməsi üçün əlavə vəsait nəzərdə tutulmalıdır ki, biz bu yolun tikintisini tezliklə başa vuraq. Yolun böyük hissəsi artıq beynəlxalq standartlara uyğundur. Sərhədə yaxın olan qalan hissənin tikintisini də tezliklə təmin etməliyik. Bakı-Gürcüstan yolunun bir hissəsi ikizolaqlı, bir hissəsi dördzolaqlıdır. Nəzərə alsaq ki, o yoldan istifadə çox intensiv xarakter daşıyır, biz ikizolaqlı hissəni dörd zolağa genişləndirməliyik. Bu tapşırığı da verirəm ki, Bakıdan Gürcüstan sərhədinə qədər bu yolun hamısı dördzolaqlı olsun".

Bu layihəyə başlamaq üçün əlavə vəsaitin nəzərdə tutulmalı olduğunu vurğulayan dövlət başçısı deyib ki, Bakı-İran sərhədi yolunun inşası da cədvəl üzrə gedir: "Bu yol əvvəldən dördzolaqlı kimi nəzərdə tutulmuşdu. Orada bütün işlər cədvəl üzrə gedir. Bakı-Şamaxı yolu da demək olar ki, Bakı-Balakən sərhəd yolunun bir hissəsidir. O da yenidən qurulub. İkizolaqlı yol kimi qurulub. Hesab edirəm, bu yolu da dörd zolağa genişləndirmək üçün əlavə tədbirlər görülməlidir ki, bu yolla gedib-gəlmək daha da rahat olsun".

Prezident qeyd edib ki, Bakıda yeni qovşaqlar, körpülər, tunellər tikilir. Bu işlər paytaxtın müxtəlif yerlərində gedir. Bakı qəsəbələrinin proqramı çərçivəsində qəsəbələrarası yolların tikintisi də nəzərdə tutulur: "Bu işlər daha da sürətlə aparılmalıdır. Bütün bu işləri görmək üçün yaxın zamanlarda büdcəyə əlavələr edilməli, dürüstləşmə aparılmalıdır. İndi müvafiq göstərişlər verilib, təkliflər hazırlanır. Nəzərə almalıyıq ki, əlavə maliyyə resurslarımız var, dünyada neftin qiyməti artıb. Təbii olar ki, biz həllini gözləyən məsələləri elə bu il həll edək və bu məsələləri gələn ilə saxlamayaq. İlk növbədə qeyd etdiyim məsələlər, infrastruktur layihələri əlavə edilməlidir, tikinti işləri, sosialyönümlü tədbirlər, dürüstləşmə zamanı nəzərə alınmalıdır".

"Azərbaycanda sosialyönümlü tədbirlər vaxtaşırı aparılır" deyən prezident qeyd edib ki, həm uzunmüddətli proqramlar çərçivəsində, həm də lazım gələndə əlavə tədbirlər görülür: "Mən onların arasında bu yaxınlarda əhalinin suya olan borclarının silinməsi məsələsini qeyd etmək istəyirəm. Bu, bizim sosial siyasətimizin nə qədər güclü olduğunu göstərir. Bu addım xoşniyyətli addımdır və hesab edirəm ki, düzgün addımdır, sosial ədalət prinsipləri baxımından düzgün addımdır, bazar iqtisadiyyatı prinsipləri baxımından bəlkə də o qədər də düzgün addım deyil. Ancaq bizim üçün əsas məsələ prioritetlərin düzgün seçilməsidir. Bu prioritetlər sırasında sosial məsələlər birinci yerdədir".

Prezident bildirib ki, 2006-cı ilə qədər pensiyaya çıxmış vətəndaşların pensiyaları artırılmalıdır. Çünki bu sahədə müəyyən ədalətsizlik var: "Bu ədalətsizlik ona görə yarandı ki, 2006-cı ildən sonra yeni qaydalar tətbiq olundu və 2006-cı ildən sonra pensiyaya çıxanlar daha böyük pensiya alırlar. 2006-cı ilə qədər Azərbaycanda pensiyaya çıxanların sayı haradasa 900 mindən artıqdır. Ölkədə bütövlükdə 1 milyon 300 nəfərə qədər pensiyaçı var. Onlardan 900 mini 2006-cı ilə qədər pensiyaya çıxmışdır. Ona görə, ilk növbədə onların pensiya təminatı yaxşılaşdırılmalıdır ki, bu sahədə heç bir ayrı-seçkilik olmasın və yaşlı insanlar lazımi səviyyədə pensiya ilə təmin olunsunlar. Bu bizim borcumuzdur, onlar işləyiblər, çalışıblar, bu ölkəni yaradıblar, ölkənin inkişafında çox böyük rol oynayıblar. Bizim borcumuz onların maddi təminatını yaxşılaşdırmaqdır. Biz bunu mütəmadi qaydada edirik. Xüsusilə bu il biz 2006-cı ilədək pensiyaya çıxmış vətəndaşların pensiya təminatını yaxşılaşdırmalıyıq".

Ədalət.- 2011.- 14 aprel.- S. 2.