BSU-da Heydər Əliyevin 88-ci ildönümü ilə bağlı tədbirlər

Azərbaycan xalqının Ümummilli lideri, ölkəmizi ağır tarixi sınaqlardan uğurla çıxarmış, demokratik dövlət quruculuğunda xidmətlərilə bir ictimai-siyasi xadim kimi nüfuz qazanmış görkəmli dövlət xadimi Heydər Əlirza oğlu Əliyevin anadan olmasının 88-ci ildönümü bütün respublika ictimaiyyətində təntənəli şəkildə qeyd olunur.

Respublikamızda ulu öndərimizin əziz xatirəsinə ithaf olunmuş geniş miqyaslı tədbirlər həyata keçirilməkdədir. Uzaqgörən siyasətçi, ümummilli liderimiz Heydər Əliyevin sərəncamı ilə yaradılmış, onun ideyalarını həyata keçirən və öz istiqaməti üzrə unikal bir tədris ocağı kimi tanınan Bakı Slavyan Universitetində də ulu öndərin xatirəsinə həsr olunmuş geniş tədbirlər planı təsdiq edilmiş və onun icrasına başlanılmışdır.

Universitetin tədbirlər planına uyğun olaraq 4-7 may tarixlərində BSU-nun təşkilatçılığı və Gəncə Dövlət Universitetinin iştirakı ilə Ümummilli lider H.Əliyevin anadan olmasının 88-ci ildönümünə həsr olumuş ənənəvi "Azərbaycanşünaslığın aktual problemləri" II Beynəlxalq Elmi Konfransı, BSU tələbələrinin, universitetin əməkdaşlıq etdiyi orta məktəblər və qaçqın məktəbləri şagirdlərinin iştirakı ilə "Müasir Azərbaycan Heydər Əliyev ideyaları işığında" Tələbə-Şagird elmi konfransı, universitet fakültələrində "Heydər Əliyev görkəmli siyasi və ictimai xadim kimi", Universitet muzeyində Məktəb-Lisey Kompleksinin buraxılış sinif şagirdlərinin və valideynlərin iştirakı ilə "Heydər Əliyev Bakı Slavyan Universitetinin yaradıcısıdır", BSU Tələbə Gənclər Təşkilatı, Kölgə Kabineti, Magistrantlar Şurası və Şagird Parlamentinin iştirakı ilə "Heydər Əliyev və Azərbaycan gəncliyi", tələbələrin və 190 saylı orta məktəb şagirdlərinin iştirakı ilə "Mən fəxr edirəm ki, azərbaycanlıyam", jurnalist tələbələrin iştirakı ilə "Heydər Əliyev yerli və xarici mətbuatda", "Heydər Əliyev və Azərbaycan ədəbiyyatı", "Heydər Əliyevin dil siyasəti", "Heydər Əliyev və Azərbaycan dövlətçiliyi" mövzularında dəyirmi masaların, respublikanın ali məktəb tələbələrinin bədii yaradıcılıq festivalında iştirakı, Məktəb-Lisey Kompleksində "Doğma yurdum Azərbaycan" mövzusunda tələbələrin əl işləri, foto və rəsm sərgilərinin təşkili nəzərdə tutulmuşdur. Bundan əlavə İsmayıllı rayonunun H.Əliyev adına İvanovka kənd orta məktəbində "Heydər Əliyev və Azərbaycan"mövzusunda tələbə və şagirdlərin bilik yarışı, universitet fakültələrində "Heydər Əliyev və Azərbaycan gəncliyi" mövzusunda inşa və ifadəli oxu müsabiqələri, YAP namizədləri olan tələbələrin və Məktəb-Lisey Kompleksi şagirdlərinin Milli Təhlükəsizlik Akademiyasının Heydər Əliyev adına "Şöhrət Muzeyi"nə ekskursiyasının təşkili də planlaşdırılmışdır. "Tələbə dünyası" qəzetinin xüsusi buraxılışının nəşri, "Heydər Əliyev məktəbi" Tələbə Radiostudiyasında Ulu öndərə həsr olunmuş silsilə verilişlərin hazırlanması, divar qəzetlərinin buraxılışı, universitetdaxili idman yarışlarının keçirilməsi də tədbirlər planına daxildir. BSU-da fəaliyyət göstərən Türkiyə, Rusiya, Bolqar, Belorus, Ukrayna, Çexiya, Polşa, Yunanıstan və digər tədris və mədəniyyət mərkəzlərində Heydər Əliyevlə bağlı silsilə tədbirlərin, görüşlərin, dəyirmi masaların təşkil olunması və filmlərin nümayişi də nəzərdə tutulub.

Qeyd etmək lazımdır ki, artıq universitetdə "Heydər Əliyev müstəqil Azərbaycanın yaradıcısıdır" mövzusunda kitab sərgisi hazırlanmış, Məktəb-Lisey Kompleksi şagirdlərinin "Ulu öndəri xatırlayarkən" mövzusunda inşa müsabiqəsinin məktəb və respublika turlarında iştirakı təşkil olunmuş, YAP Nəsimi rayon təşkilatının sədri, millət vəkili M.İbrahimqızının universitetin 3 saylı yataqxanasında "Heydər Əliyev və Azərbaycan gəncləri" mövzusunda BSU tələbələri ilə görüşü keçirilmişdir. Beynəlxalq münasibətlər və Regionşünaslıq fakültəsində isə "Heydər Əliyev və Azərbaycan diaspora sahəsində dövlət siyasətinin formalaşması" mövzusunda dəyirmi masa ətrafında söhbət aparılmışdır.

Dünən isə Bakı Slavyan Universiteti Azərbaycanda ilk dəfə olaraq respublikanın elmi-mədəni həyatına töhfə verə biləcək möhtəşəm layihəyə imza atır. BSU-da Ümummilli Lider Heydər Əliyevin anadan olmasının 88-ci ildönümünə həsr olunmuş "Humanitar elmlərin aktual problemləri" mövzusunda magisrtantların I Beynəlxalq Elmi Konfransı öz işinə başladı.

Konfransda Türkiyə, Rusiya, Ukrayna, Belorus, Gürcüstan, Çin, Cənubi Koreya kimi xarici ölkələrdən, Azərbaycan Respublikasından isə müxtəlif universitetlərdən( Bakı Dövlər Universiteti, Azərbaycan Dillər Universiteti, Azərbaycan Respublikasının Prezidenti yanında Dövlət İdarəçilik Akademiyası, Azərbaycan Dövlət Pedaqoji Universiteti, Azərbaycan Müəllimlər İnstitutu, Azərbaycan Dövlət Mədəniyyət və İncəsənət Universiteti, Sumqayıt, Naxçıvan, Lənkəran, Gəncə Dövlət Universitetləri, Azərbaycan Diplomatiya Akademiyası, Bakı Avrasiya Akademiyası və s.) magistrantlar 112 elmi məruzə ilə çıxış edirlər. Konfrans öz işini "Dilçilik", "Ədəbiyyatşünaslıq", "Pedaqogika, psixologiya və metodika" və "İctimai elmlər" bölmələrində davam etdirir:

Konfransın açılış mərasimindən əvvəl Fəxri Xiyabanda Ulu öndər Heydər Əliyevin məzarını ziyarət ediblər.

Konfransın plenar iclasını giriş sözü ilə BSU-nun tədris işləri üzrə prorektoru prof. Asif Hacıyev açaraq gələn qonaqları salamladı və tədbir haqqında auditoriyaya məlumat verdi, konfransın mədəniyyətlərin və elmin inteqrasiyası yolunda əhəmiyyətli addım olduğunu bildirdi: "Umummilli lider Heydər Əliyevi öyrənməyin, təbliğ etməyin bir amalı vardır. O da bundan ibarətdir ki, hər bir gəncimiz, hər bir yeni yetişən nəslin nümayəndəsi öz fəaliyyətində, öz əqidəsində, öz gələcək işlərində Ulu öndərin ideyalarına layiq olsun, dövlətimizə layiqli vətəndaş kimi formalaşmasın, Azərbaycanın gələcəyi üçün var gücü ilə çalışsın".

Konfrans çərçivəsində Universitetdə çalışan, magistr elmi-tədqiqat işlərinə uğurla rəhbərlik edən bir sıra alimlərin magistrantlar üçün müxtəlif mövzulu ustad dərslərin keçirilməsi də nəzərdə tutulub.

Konfransın işi bu gün də davam edir.

Əbülfət

Ədalət.- 2011.- 27 aprel.- S. 3.