1906-1908-ci illərdə
"Qarabağ Birlik Məclisi" - "Difai"nin fəaliyyəti
(əvvəli
ötən saylarımızda)
Müəllif bu
kitabında erməni millətçi təşkilatlarının
terrorçu fəaliyyətinə cavab olaraq Azərbaycanda ilk
milli təşkilat "Difai" (Müdafiə)
Partiyasının yaradılması və fəaliyyəti
tarixi tətbiq edilir. Ən müxtəlif mənbələrdən
cəlb edilmiş zəngin faktiki materialın təhlili və
ümumiləşdirilməsi əsasında bu mövzunu
ideoloji ehkamlardan və milli-subyektiv baxışlardan
asılı olmadan işıqlandırmağa cəhd
edilmişdir. Əsərdə "Difai"nin fəaliyyəti
erməni-azərbaycanlı ziddiyyətlərinin
yaranmasının ilkin tarixi şərtləri və səbəbləri
fonunda nəzərdən keçirilir. Çar
Rusiyasının XVIII əsrin birinci rübündən
başlayaraq Cənubi Qafqaza hərbi-siyasi ekspansiyası bu
ziddiyyətlərin əsasını qoymuşdur. Həmin
siyasətin həyata keçməsində erməni amilinə
imperiyanın regionda sosial dayağı və müsəlman
dövlətləri olan Türkiyə və İrana
qarşı mübarizə xristian forpostu rolu
ayrılırdı. Məhz bu siyasət nəticəsində
XX əsrin əvvəlində erməni-azərbaycanlı
ziddiyyətləri kuliminasiya nöqtəsinə çataraq,
açıq qanlı qarşıdurmaya çevrilmişdir. Azərbaycanlı
əhalinin erməni terrorundan qorunmasında "Difai"
Partiyasının rolunu obyektiv və əsaslandırılmış
şəkildə işıqlandırılması zərurəti
müasir dövrdə bu araşdırmanın əhəmiyyətini
və aktuallığını şərtləndirir.
1906-cı ilin dekabr
ayında Naxçıvan qəzasının keçmiş rəisi
podpolkovnik Engel difaiçilər tərəfindən
öldürülmüşdü. 1906-cı ildə
Naxçıvanda erməni-azərbaycanlı münaqişələri
zamanı Engel qoşunların köməyi ilə Azərbaycan
kəndlərinin talan olunmasında açıq aşkar
iştirak etmişdi. Ordubadi yazır ki, polismeyster Angil (Engel -
Müəllif) könüllü döyüşən
cavanları qan tökməyə və quldurluqla təşviq
edirdi. Engelin Naxçıvanda törətdiyi cinayətlər
nəticəsində bir ailə tamamilə məhv edilmiş Cəhri
kəndi ermənilər və kazaklar tərəfindən
yandırılmışdı. 1907-ci il iyulun 11-də Yevlax
stansiyasında jandarm Jukov öldürülmüşdü. O,
həmin dövrdə sanballı mükafat müqabilində
silah daşınmasına və silah alverinə şərait
yaradır, silah daşıyanların şəxsiyyətini
müəyyən edir və onların barəsində
müdriyyətə məlumat verirdi. Bu aksiyaların məqsədi
Azərbaycanın şəhər və kəndlərinə təcavüzkar
hücumları dəstəkləmək, yerli etnosu öz
tarixi torpaqlarından sıxışdırıb
çıxarmaq idi. Bundan əlavə, "Difai"nin öz
xalqına xəyanətdə, müsəlmanlara zərər
vuran hərəkətlərdə ittiham etdiyi şəxslər
də onun qurbanları olurdu. Partiyanın proqramına uyğun
olaraq, özlərini müsəlmanların rəhbərləri
hesab edən, əslində isə xalqın məhvi
üçün çalışan ağaların aqibəti
ağır olacaqdır. Partiyanın qılıncı daim
onların cinayətkar başları üzərində
asılacaq və onların bütün əməllərinə
görə amansızcasına qisas alınacaqdır". "Difai"nin
Şuşa komitəsinin qərarı ilə 1907-ci il mayın
1-dən 2-nə keçən gecə Şuşa şəhər
sakinləri Muxtar Kərbəlayı Cabbar oğlu və onun
oğlu Rəhim Muxtar oğlu qətlə yetirilmişdir. Onlar
ermənilərin xeyrinə cəsusluqda ittiham edilirdi. Tiflis
Quberniya Jandarm İdarəsinin rəisinin Yelizavetpol
quberniyasındakı köməkçisinin 14 dekabr 1903-cü
il tarixli məlumatında bildirilir: "Muxtar Cabbar oğlu
çox pis ad çıxarmışdı və həm
Şuşa şəhərinin, həm də qəzanın
bütün xadimləri onu "əclaf Muxtar" kimi
tanıyırlar".
Kiçik zabit
S.Kaçenovskinin birinci polis sahə pristavı Qrişinin məlumatlarına
və şəhid ifadələrinə əsaslanan məruzəsindən
məlum olmuşdur ki, 1906-cı ildə "Difai"nin
Malıbəyli kəndindəki komitəsinin rəhbəri Əşrəf
Məşədi Molla İmran oğlunun sərəncamı ilə
Xankəndi postunun stajniki Şahmərdanov ermənilərin
xeyrinə satqınlıq etdiyinə görə
öldürümüşdür. "Difai"nin hər bir
terror aktından sonra çağırışlar
buraxılır, difaiçiləri həmin şəxslərə
münasibətdə bu aktı törətməyə sövq
etmiş səbəblər izah edilir və bu
çağırışların hər biri belə xəbərdarlıqla
bitirdi ki, müsəlmançılığın
bütün düşmənlərini və müsəlmanların
öz aralarındakı xəyanətkarları da bu cür
aqibət gözləyir.
"Difai"nin fəaliyyətinin
genişlənməsi nəticəsində partiya dünyada
baş verən hadisələrlə, proseslərlə fəal
maraqlanmağa başlamışdı və heç də həmişə
passiv müşahidəçi rolunda qalmırdı. Hüquq-mühafizə
orqanlarının sənədlərindən məlum olur ki,
partiya İranda Səttərxan hərəkatını, eləcə
də Türkiyədə gənc türkləri dəstəkləyirdi.
Məsələn, 1908-ci ilin martın 3-də Yelizavetpol şəhərinin
fəxri şəxsləri adından Yelizavetpol qubernatorunun
adına daxil olmuş anonim məlumatda deyilirdi: "Difai"
adlı komitə göstərir ki, tezliklə Türkiyə ilə
müharibə olacaqdır və biz silah və patron almaq
üçün pul yığırıq. Bu məqsədlə
onlar Rəfibəyovun evində toplaşır, orada kimin nə
qədər pul verməli olması barədə siyahılar tərtib
edilirdi. Bizə 50000 rubl məbləğində pul toplamaq təyin
edilmişdi, biz isə bunu edə bilmədik və sizdən
kömək istəməyə başladıq". Məktubun
müəllifləri başda Ələkbər bəy Rəfibəyov
olmaqla "Difai"nin Yelizavetpol mərkəzi komitəsinin
bütün üzvlərinin adlarını da göstərirlər.
Elə həmin gün Yelizavetpol qubernatorunun işlər
müdiri Q.Kovalyov Yelizavetpol Quberniya polis rəisinə tam məxfi
sirkulyar məktub göndərmişdi. Məktubda xəbərdarlıq
edilirdi: "Məndə olan məlumatlara görə,
"Difai" müsəlman partiyasının üzvləri
hazırda aşkar türkpərəst yönümlü
güclü təşviqat aparır və öz cinayətkar
fəaliyyəti ilə yerli əhali arasında son dərəcə
narahat əhval yaradırlar. Son vaxtlar bu təşviqat
xüsusi ilə geniş miqyas almışdır. Mən bunu qəza
polis məmurlarının tamamilə fəaliyyətsizliyi kimi
qiymətləndirirəm. Onlar bu partiya barəsində mənim
dəfələrlə göndərdiyim təlimatlara məhəl
qoymadan partiya təbliğatçılarının fəaliyyətinin
bu qədər güclü inkişaf etməsinə və
onların əhaliyə təsirinin artmasına imkan vermişlər.
Deyiləni nəzərə alaraq, mənə etibar edilmiş
quberniyanın polis rəislərinə təklif edirəm ki,
yuxarıda göstərilən təşviqatçıların
onlara etibar edilmiş qəzalarda görünməsinə yol
verməmək üçün bütün tədbirləri
görsünlər və bu barədə onların tabeliyində
olan polis məmurlarına dərhal müvafiq göstərişlər
versinlər və təşviqatçılar aşkar edildikdə
onları tutub həbs etsinlər".
Lakin 1908-ci il mayın
24-də Yelizavetpol şəhərinin özlərini fəxri
şəxslər adlandıran sakinlərindən jandarm
rotmistri Qrekova yeni məktub daxil oldu. Məktubda deyilirdi:
"Silah və patron almaq üçün Komitənin xeyrinə
15 min rubl pul toplanmışdır və komitə bizdən
daha 5 min rubl tələb edir. Lakin biz imtina edirikg Biz nə
vaxta qədər pul ödəyəcəyikg Ümid edirik ki,
ali həzrətləriniz bizim xahişimizi cavabsız qoymayacaq
və siz bizə rəhm edəcəksinizg Biz pul ödəməkdən
təngə gəlmişik". Sənədlərdən
göründüyü kimi, difaiçilər tərəfindən
yığılan pulun bir hissəsi İranda və Türkiyədə
qiyamçılara kömək üçün göndərilirdi.
Təkcə Şuşa şəhərinin ətrafındakı
Çuxurməhlədə difaiçilər Məşədi
Ələsgər Abbas oğlu və Bahadur Kərim oğlu
yerli sakinlərdən 3000 rubl pul yığmış, bu pula
silah, patron, revolver alınmış, adamlar
hazırlanmış və Cənubi Azərbaycana Səttarxanın
köməyinə göndərilmişdi.
Yuxarıda göstərilən
polis materiallarından və məmur məruzələrindən
götürülmüş, difaiçilərin ayağına
yazılan faktlar XX əsrin əvvəlində Rusiya
İmperiyasında inqilabi hadisələr dövründə
bir sıra partiyaların fəaliyyəti üçün səciyyəvi
idi. Rusiya İmperiyasının tarixindən məlum olduğu
kimi bolşeviklər bu məsələdə çox irəli
getmişdilər. Bəzi hallarda partiyaların maliyyə
problemləri bu cür radikal metodlarla həll edilirsə,
başqa hallarda bu, son məqsədləri təkcə
partiyanın proqram vəzifələrini yerinə yetirməklə
məhdudlaşmayıb özlərinin merkantil tamahkar məqsədlərindən
ibarət olan partiya daxili kriminal qrupların yaranması ilə
bağlı idi. Bir qayda olaraq, bu cür qruplar dövlətə
və ya dövlət quruluşuna bilərəkdən meydan
oxumurdu, partiya mənsubiyyəti isə onların öz məqsədlərini
reallaşdırması üçün münasib pərdə
idi. Sənədlərdən göründüyü kimi
"Difai" partiyasının bəzi üzvləri də bu
cür cinayətlərə ittiham edilmişdir. Bu ittihamlar həmin
cinayətlərin qurbanları olmuş şəxslərin
şikayət teleqramlarına əsaslanırdı. Lakin belə
cinayətlərin çox vaxt tamah məqsədi ilə
törədildiyi və ya sadəcə olaraq şəxsi
münasibətləri ayırd etmək üsulu olduğunu nəzərə
alsaq, onda aydın olur ki, bu cinayətləri bütün
partiyaya aid etmək olmazdı. Digər tərəfdən, rəsmi
şəxslərin məruzələrindən
göründüyü kimi həmin dövrdə partiyanın
güclü fəaliyyətini nəzərə alan hakimiyyət
orqanları "Difai"ni ləğv etmək
üçün həmin cinayətlərə ilk növbədə
siyasi xarakter verməyə çalışırdılar.
1908-ci ilə qədər
"Difai"nin fəaliyyəti o qədər geniş miqyas
almışdı ki, Azərbaycan qəzalarında çar hakimiyyəti
orqanlarının mövcudluğuna təhlükə
yaranmışdı. Partiya üzvlərinə qarşı
repressiya başlanmışdır. Qafqaz canişini
özünün 4 mart 1908-ci il tarixli fərmanı ilə
"Difai partiyasının ləğv edilməsi barədə
tapşırıq vermişdi. Yelizavetpol general-qubernatoru
Q.Kovalyov cavab məktubunda yazmışdı ki, cari ilin mart
ayında bu partiya tamamilə ləğv ediləcəkdir.
(ardı var)
Eldar Əzizov
Ədalət.- 2011.- 3 mart.- S. 6.