ÖZÜMLƏ ÜMİDİM ARASINDA

Düşüncələrim, duyğularım -

Özümlə ümidim arasında.

Mənsə oturmuşam

İlmələri ələnmiş,

Arğacları süzüm-süzüm süzülmüş,

Sərt küləklər, narın yellər,

Saçaqların xırxanlayıb daramış,

Bir az sevinc, bir az qəmlə boyanmış,

Həsrət yüklü xalının üstündə.

Hisslərimlə danışıram, dərdləşirəm,

Deyirəm: - Ürəyimi sevirəm!

Çünki sən ordasan.

Gözlərimi sevirəm,

Çünki o ancaq səni,

Səni gəzib axtarır,

Sənə baxmaq istəyir!

Özümü sevirəm!

Çünki, çünki sən hər an,

Mənimləsən!

Bax, beləcə gümanlarım azdırır hisslərimig

Qarabasmalar çaşdırır duyğularımıg

Mənsə hələ də xalının üstündəyəm,

Oturmuşam ümidimlə özümün arasındag

Çünki sən eləg mənim özümsən!

KÖSÖV

Kösöv!

Nə odu atır,

Nə atəşə çatır.

Alov ola bilmir,

Ancaq

Öz odunda dağlayır özünü.

Pərdə-pərdə korşalayır,

Qabar olur,

Çopur qalır,

Sağalmaz dərdlərin

İzi kimi.

DİNDİR MƏNİ

Yorğunam, incik düşmüşəm,

Bir layla de, dindir məni.

Lal sükuta sarılmışam,

Qəhqəhə çək, güldür məni.

Yağmurdu, islanıb yaxam,

Payızı gəlmiş yarpağam.

Etmədiyim bir günaham,

Oxşa de, sevindir məni.

Bir ümiddir, indi yoxam,

Görəmmirəm dönüb baxam,

Gövdədən qopmuş budağam,

Tutuşmuşam söndür məni.

Qol yerinə bilək boşdur,

Başım altda qara daşdır,

Daha bəsdir, səbrim daşdı,

De sözünü, qaldır məni.

TƏNDİRƏSƏRDƏ DOĞULAN QIZ

(Bir gözəl qız: - Təndir üstə doğulmuşam - dedi)

Təndirəsərdə doğulan qız!

Sən doğulanda kündəsi axıb

Köz üstə düşən,

Yanıb qapqara qaralan

Çörəyin rəngidirmi hopub

Gözlərinin giləsinə?

Ya da kündənin tüstüsü

Burum-burum havalanıb

Gedib çatıb buludlara.

Sonra yağış olub sellənib yer üzünə.

Bərq vuran mirvari inciləri kimi,

Axıb, qoşulub gözlərinin parıltısına?

Yəqin kösöv olmuş

O qapqara rəng

Qarışıb gecənin qaranlığına,

Sonra da hopubdu saçlarına.

Göydən ulduz damır,

Əridir qaranlığı,

O ulduz da həsəd çəkir

Sənin gözlərinin giləsindəki işığa.g

***

Təndirəsərdə doğulan qız!

Sən doğulanda

Təndirin gülfəsindən havalanan

Odun, istinin

Hərarətidirmi hopub canına?

Sarılıb əndamına, ruhuna,

Çöküb ürəyinin dibinə?

Yəqin o atəşdir ki, yandırıb kül edir məni,

Təndirin közü kimi!

***

Təndirin hənirtisi

O kündənin tüstüsü

Çörəyin xoş qoxusu

Ətrimi dolub nəfəsinə?

Dilin bal dadır.

***

Yandırma odunla xısın-xısın,

Kösöv oldum

Gülfənin ağzından

Qaldır məni havalanım,

Ya da su çilə.

DAŞ YADDAŞ

Daş, yaddaş, bir də yağış!

- İri cüssəli,

İgid gövdəli,

Yepyekə daş!

Yaddaş!...

Yağış:

- Gah öpüb, gah sığallayıb,

Şumlayıb,

Oyuq-oyuq oyub kürəyini,

Sərt rüzgarlar yalayıb sinəsini.

Şümallayıb çöhrəsini.

Çiyinləri yarı işıq, yarı qaranlıq,

Mamırlayıb.

Görməyən gözlərin giləsinin işığı,

Sezilməyən sözlərin lal duruşu.

Daş!

"Doğma baxış".

İllərin sərt üzünün,

Əzabının,

Poza bilmədiyi

Qeyrət, naxış!

Nə inilti,

Nə yalvarış,

Heykəlləşmiş,

Mamır basmış,

"Daş baxış"!

Daş, lal yaddaş.

YAŞIM UZANSAYDI

Bir ilim qalıb

Çatmağa

Anamın yaşına.

Adlasam ötərəm,

Yetərəm

Üzüyün qaşına,

Ömrümün qışına.

İllərin bəmbəyaz

Yaddaşına,

Yetmişi adlamış

Atamın yaşına.

***

İkiyə bölünsə bəsimdi,

Atamla, anamın

Yaşlarının arasındakı fərq

22 ilin yarısı

Ötmək,

Keçmək istəyirəm,

Bir az da irəli

Keçmək istəyirəm,

Doldurmaqçün

Yaşadığım illərin boşluqlarını,

Düzəltmək istəyirəm

Buraxdığım səhvlərin başlıqlarını.

***

Onda Nəcəf böyüyər,

Tutaram,

Sallanaram ətəklərindən.

Yapışar qollarımdan

Qaldırar,

Götürər,

Qabaqda oturdar məni,

Aparar

Gül dərməyə,

Ya da çiçək yığmağa.

Bəlkə də

Şəkil çəkməyə.

Çəkərdim

Saçları əsmər,

Çöhrəsi qaraşın,

Gözləri piyalə,

Baxışları şəlalə,

Gülərüz, ipisti

Uşaqlıqda sevdiyim şəkilləri.

Çəkərdim

Qucağından

Boylanan,

Qalxmaq, ucalmaq üçün çırpınan

Dəcəl bir

Oğlan uşağını

Sinəsinə sıxmış

Qarabuğdayı

Aparıq

Bir qadın şəkli.

Ana şəkli.

Ya da bir

Kişi şəkli

Göy atın üstündə

Çaparaq gələn

Ər şəkli, ərən şəkli!

NOVRUZ NƏCƏFOĞLU

Ədalət.-2012.-7 aprel.-S.20.