Aldanma, Alça ağacı

Üstündəki nə çiçəkdi,

Kim saçına sığal çəkdi?

Şaxta uzun sürəcəkdi,

Aldanma, Alça ağacı!

Bu çiçiəkdən bar gözləmə,

Min bir dərdi var, gözləmə.

Vaxtdan etibar gözləmə,

Aldanma, Alça ağacı!

İnad etmə, gəl sözə bax,

Qovuracaq səni sazaq.

Dərdlərini hara yazaq?

Aldanma, Alça ağacı!

Vallah, gün tovlayıb səni,

Minib, cilovlayıb səni.

İrəli qovlayıb səni,

Aldanma, Alça ağacı!

Ah çoxalıb, aman artıb,

Vaxtsız gələn duman artıb.

Yalançılar yaman artıb-

Aldanma, Alça ağacı!

DAHA NƏ GÖZLƏYİM MƏN BU BAHARDAN?

Yoluna göz dikdim, yolu uzandı,

Özgə səmtə açıq qolu uzandı.

Əlimə çatmayan əli uzandı,

Daha nə gözləyim mən bu bahardan?

Dəyişən əhvalı dəmbə-dəm oldu,

Nifrəti bol oldu, eşqi kəm oldu.

Sevinc gözləyirdim, payı qəm oldu,

Daha nə gözləyim mən bu bahardan?

Mənə uyuşmadı, mənə uymadı,

Görünür, dərdimi yaxşı duymadı.

Şaxtası vurmamış çiçək qoymadı,

Daha nə gözləyim mən bu bahardan?

ÖMRÜMÜ

Çəkilmir başımdan payızın çəni,

Artıq unutmuşam olub keçəni.

Vaxt dəyirman kimi üyüdür məni,

Günlər ilmə-ilmə sökür ömrümü.

Özüm bağlamışam öz əllərimi,

Özgələr nə bilər dərdi-sərimi.

Qoyub tərəziyə əməllərimi

Çəkən imtahana çəkir ömrümü.

Qoşa yaranıbdı sevinc ilə qəm,

Sevinc də dadmışam, qəm də yemişəm.

Daha o yanlığam, mənimlə bahəm

Tanrım kəfənimə bükür ömrümü.

ÖLÜM, QIYMA YAXŞILARA!

Ömür dəndi, sən dəyirman,

Üyüdursən zaman-zaman.

Heç fərqinə varırsanmı

Kimdi yaxşı, kimdi yaman?

Gəl sən haqqı düzgün ara,

Ölüm, qıyma yaxşılara!

Ürəyini daş görmüşəm,

Haqsızlığa tuş görmüşəm.

Qəsd etdiyin qartalların

Yuvasını boş görmüşəm

Qismət eyləmisən sara,

Ölüm, qıyma yaxşılara!

Nə tapmısan bu həvəsdə,

Tülkü kefdə, şir qəfəsdə.

Ölməlilər ölməliykən

Saxlayırsan gözün üstə

De, bu dərdi yazaq hara?

Ölüm, qıyma yaxşılara!

Gəl hamıya yaman olma,

Vaxtsız gələn duman olma.

Qana həris ac qurd kimi

Hər yetənə cuman olma.

Ağ varağa salma qara,

Ölüm, qıyma yaxşılara!

YALANLAR

Mayasını haramlıqdan alıbdı,

Haramlığın şər sözüdü yalanlar.

Yalançının yollarına nur saçan

Günəşli bir gündüzüdü yalanlar.

Sirdaş olub əyrilərə, oğruya,

Vərdiş edib müdam böhtan doğraya.

Düşmənidir, meyl eləməz doğruya

Doğru sözün tərs üzüdü yalanlar.

Ay Tərtərli, sən düzü seç, düzü gəz,

Təmizliyə, halallığa yox əvəz.

Bərk ayaqda ayaq tutub yeriməz,

Gücsüzlərin gücsüzüdü yalanlar.

Qədir Tərtərli

Ədalət.-2012.-11 aprel.-S.7.