DAHA BÖYÜK UĞURLAR SORAĞINDA

(əvvəli ötən saylarımızda)

Prezident İlham Əliyevin "Kənd təsərrüfatı məhsulları istehsalçılarına dövlət dəstəyi haqqında" 23 yanvar 2007-ci il tarixli sərəncamına uyğun olaraq, 2011-ci ildə rayon üzrə istehsalçılara yanacaq və motor yağlarına görə 1,7 milyon manat yardım verilmişdir. Buğda istehsalçılarına isə 1,13 milyon manat yardım veriləcəkdir. Ötən il əhaliyə 50% güzəştli qiymətlərlə 3056 ton mineral gübrə verilmişdir. 58 ədəd müxtəlif adda kənd təsərrüfatı texnikası lizinq yolu ilə torpaq mülkiyyətçilərinə satılmışdır. Cəmi, sərəncamdan sonrakı dövrdə dövlət yardımının məbləği 12,2 milyon manat təşkil etmişdir.

Ölkə Prezidentinin 15 dekabr 2011-ci il tarixli sərəncamı ilə təsdiq edilmiş "2012-2020-ci illərdə üzümçülüyün inkişafına dair Dövlət Proqramı" Xaçmaz fermerlərinin də qarşısına mühüm vəzifələr qoyur. Məlum olduğu kimi 1980-ci illərin sonunadək rayonda 1800 hektardan artıq üzüm bağları becərilmiş, lakin məlum hadisələr nəticəsində bu bağların hamısı məhv edilmişdir. Son illər bu gəlirli sahəyə artan marağın nəticəsində yeni üzüm bağları salınaraq, üzüm bağlarının ümumi sahəsi 300 hektara çatmışdır.

Xüsusən, Yeni Həyat və Köhnə Xudat İƏV-də torpaq mülkiyyətçilərinin üzümçülük sahəsinə marağının və səriştəsinin olması nəzərə alınaraq, bu istiqamətdə ciddi nəticələr əldə olunacağı gözlənilir.

Mütəxəssislərin proqnozlarına görə 2020-ci ilədək rayonda üzüm bağlarının sahəsini ən azı 800-1000 hektara çatdırmaq mümkündür. Rayonda fəaliyyət göstərən "Xaçmaz-şərab" ATSC bu istiqamətdə mövcud imkanlardan geniş istifadə edə bilər.

Aqrar sahəyə yüksək dövlət qayğısı nəticəsində kənd təsərrüfatının maddi texniki bazasının gücləndirilməsi istiqamətində rayonda kifayət qədər işlər görülmüşdür.

Rayon üzrə 3 ədəd hər biri 2000 tonluq, 1 ədəd 500 tonluq meyvə-tərəvəz saxlanması üçün soyuducu anbarlar tikilib istifadəyə verilmiş, 2000 tonluq daha bir anbarın tikintisi yekunlaşmaq üzrədir. Bundan başqa birinin sahəsi 4 ha, digərinin 2 ha olmaqla iki tərəvəz yetişdirən istixananın, bir meyvə-tərəvəz qurudulması sexinin və bir fındıq emalı sexinin tikintisi aparılır.

Təhsil, səhiyyə və mədəniyyət

Təhsil sahəsi bu gün ölkə rəhbərliyi tərəfindən ən önəmli sahələrdən biri kimi qiymətləndirilir. Təhsilin maddi texniki bazasının gücləndirilməsi sahəsində işlər uğurla davam etdirilmişdir. Bu sahədə ən böyük uğurlardan biri Prezident tərəfindən açılışı həyata keçirilən Şahmat məktəbinin yeni binasıdır. Sentyabrın 15-də Təhsil Nazirliyinin sifarişi ilə Gödəkli kəndində inşa edilmiş 220 şagird yerlik yeni məktəb binası istifadəyə verildi. İlin sonunda Heydər Əliyev Fondunun təşəbbüsü ilə rayonun Şimali kəndində inşa edilmiş 120 şagird yerlik yeni məktəb binası istifadəyə verilmişdir. Bundan başqa hazırda rayonun Köhnə Xaçmaz kəndində 640 şagird yerlik, Uzunoba kəndində 480 şagird yerlik məktəb binalarının tikintisi davam etdirilir. Xaçmaz şəhər 1 N-li uşaq bağçası üçün müasir tipli yeni binanın tikintisi artıq başlanmışdır. Yaxın günlərdə Müzəffəroba kənd orta məktəbi üçün 180 şagird yerlik binanın tikintisinə başlanacaqdır. Ötən il Təhsil Nazirliyi tərəfindən Şahmat məktəbi, şəhər 6 N-li orta məktəbi inventar və avadanlıqlarla tam təchiz edilmiş, məktəb və uşaq bağçalarına xeyli sayda avadanlıq alınmışdır. Xaçmaz şəhər 3 N-li orta məktəbinin istilik sistemi tam yenidən qurulmuşdur.

Ötən 2011-ci il həm də "Turizm ili" kimi yaşandı.

Rayonun səhiyyə müəssisələrinin maddi-texniki bazasının gücləndirilməsi istiqamətində işlər uğurla davam etmişdir. Bu sahədə də ən böyük uğur əsaslı təmirdən sonra Prezident tərəfindən açılışı həyata keçirilən Mərkəzi rayon xəstəxanasının 5 mərtəbəli korpusu olmuşdur.

Bununla bağlı təsdiq edilmiş Tədbirlər Planının icrası ilə əlaqədar böyük turizm potensialına malik olan Xaçmazda kifayət qədər işlər görülmüş və bu vacib istiqamətdə işlər bundan sonra da davam etdiriləcəkdir. Əraziyə turist axınının artırılması, onlara göstərilən xidmət növlərinin genişləndirilməsi, xidmətin keyfiyyətinin yüksəldilməsi, maraqlı turist marşrutlarının təşkili istiqamətində Mədəniyyət və Turizm şöbəsi fəaliyyətini davam etdirməlidir.

2012-ci il Prezident sərəncamı ilə "İdman ili" elan edilmişdir. Cari ildə ümumən Respublika üzrə 10 olimpiya kompleksinin tikilməsi nəzərdə tutulmuşdur ki, bunun da biri Xaçmaz rayonunda inşa edilir. Doğrudur, indiyədək rayonda idmanın maddi-texniki bazası zəif olmuşdur. Lakin, buna baxmayaraq, müxtəlif beynəlxalq yarışların qalibləri, dünya və avropa çempionatlarının qalibləri və mükafatçıları arasında xaçmazlı gənclər də olmuşdur.

Görüşlər, səyyar qəbullar

Respublika Prezidenti cənab İlham Əliyevin dövlət orqanları qarşısında qoyduğu əsas vəzifələrdən biri də vətəndaş müraciətlərinə, qaldırılan problemlərə diqqətlə yanaşılması, operativ sürətdə həlli məsələsidir ki, bu istiqamətdə rayon İcra Hakimiyyəti Başçısının aparatı tərəfindən müvafiq işlər görülür.

İl ərzində rayon İcra Hakimiyyəti Başçısının ərazilərdə 52 səyyar qəbulu keçirilmiş, 1476 nəfər vətəndaş qəbul edilmişdir. Eləcə də RİH-də keçirilən qəbullarda 2073 nəfər vətəndaş qəbul edilmişdir. İl ərzində RİHB yanında Şuranın 15 iclası keçirilmiş, 29 məsələ müzakirə edilmişdir.

İlin əvvəlində İƏV-də 2011-ci ilin yekunlarına dair hesabat yığıncaqları keçirilmiş, qaldırılmış bütün məsələlər ümumiləşdirilmiş, mövcud problemlər araşdırılmış və həlli mümkün olanların aradan qaldırılması üçün müvafiq tapşırıqlar verilmişdir.

Yeni uğurlara doğru

...2012-ci ilin elə əvvəlindən rayonda bütün istiqamətlər üzrə nəzərdə tutulmuş tədbirlər həmişəki ruh yüksəkliyi ilə davam etməkdədir. Istər sənaye və kənd təsərrüfatı sahələrində, istərsə də tikinti, quruculuq və abadlıq işlərində. Rayon rəhbərliyi camaatla birlikdə daha böyük uğurlar qazanmaq, Xaçmazın şərəfini uca tutmaq əzmindədir.

MƏZAHİR ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-12 aprel.-S.7.