ŞABRAN: ƏFSANƏLƏRDƏN REALLIQLARA...

Onda qala, bütün bunlar sənin ola...

...Vətən torpağının hər qarışı sevilər, əziz tutular. Adi bir düzəngahı da, adi bir qaya parçası da. Onda qala bu Vətənin sınırları həm də zirvələri qılınc tək parıldayan qarşı dağlardan başlayıb dünyanın Ən Gözəl Dənizinə qədər uzana, meşələri, çayları, düzləri bir-birinə qovuşdura. Onda qala... Bütün hamısı sənin ola! Və sən ömrün boyu bu müqəddəs gözəlliyin ovsununa "əsir düşüb" qalasan...

Min illərin bir Şabran nağılı da var bu dünyada. Torpağın altından üstünə boylanan, bu yerlərə səslənən, onu sevən insanlara ruh verən bu nağılın şirinliyini yaşadınızmı? Nağıl nağıldır, siz bu günün Şabran nağılını, Şabran poeziyasını dinlədinizmi? Qarşı dağlar. Sıx ormanlar, qədim-ulu abidələr, möcüzə Xəzər... dadlı bir xəyalmı? Indi oba-oba tikilən, qurulan, ucalan, müasirləşən gözəl bir Şabran da var. Təbiətlə, qədimliklə birləşib şirin bir nəğmə kimi oxunar...

Mahnı demiş, şeir demiş...

Mahnı demiş, nəğmə demiş, bu gözəlim Şabranın hər tərəfində, hər bucağında qəribə bir diqqətçillik, səmimilik hiss edirsən. Gördüklərin və eşitdiklərin sənə gerçəkdən qədim bir türkü təsiri bağışlayır; alma, şaftalı, gilənar çiçəkləri sənə həm də tanış, amma çox tanış şeir misralarını da xatırladır. Burada sanki hər tərəf nəğməli, şeirli xatirələr mövsümünü yaşayır...

Görüb eşitdiklərim

Mən Şabran şəhərinin son 3-4 ildəki inkişafından xəbərsiz idim. Abad yolları, küçələri, yaraşıqlı binaları, park və meydanları görüb çox sevindim. Gerçəkdən bütün Azərbaycan inkişafda, yüksəlişdədir. Prezident İlham Əliyevin diqqət və qayğısı, xalqın rifahı üçün arzuladıqları bu gün elə müasir Şabranın timsalında daha aydın görünür.

Şəhərdə rastlaşdığım bir neçə sakini "təsadüfi" söhbətə çəkərkən gözlədiyimdən də artıq korrekt cavablar aldım. Vətəni və doğma Şabranı çox sevdiklərini bildirən sakinlər göstərilən qayğıya görə ölkə rəhbərliyinə minnətdardırlar. Həmişə camaatla bir yerdə olan icra başçısının səmimiliyindən, obyektivliyindən, rəhbərlik bacarığından da maraqlı söhbətlər eşitdim. Bilmirdim, heç demə başçı Novruz Novruzov ötənlərdə, özünün gənclik illərində komsomol işində də çalışıb, birinci katib vəzifəsinə qədər çətin və məsuliyyətli bir yol keçib. Durub indi cığallığa vərdiş eləmiş obıvatellər hücuma keçməyə tələsməsin. Mən komsomolun siyasi fakturasını deyil, onun pillə-pillə ucalan və ucaldan zəhmətsevərlik, səmimi dostluq, təşkilatçılıq və əsl vətənpərvərlik məktəbinin əvəzedilməzliyini qəbul və etiraf edirəm. Xatırlatmaq istəyirəm ki, bütün bunlar sadə reallıqdır. Ən yaxşısını elə mənimlə həmfikir olanlar bilər. Mənəvi-əxlaqi dəyərlərimizi, tarixi keçmişimizi, ədəbiyyatımızı da, digər gözəl bildiklərimizi də Vətəni sevmək səviyyəsində yaşaya bilənlər... Eləcə dünən də, bu gün də, sabah da!

Mövzudan uzaqlaşmayaq. Ancaq deyim ki, Layihənin şərtləri yol versəydi, yazımı axıradək elə bu ruhda davam etdirərdim. Hər halda davam edən söhbətimizin özü də uğurların başqa bir sevincidir. Əslində bir-birinin davamıdır, yeni, daha maraqlı söhbətlərə bir körpüdür..

Başçı danışır...

Şabran Rayon İcra Hakimiyyətinin başçısı Novruz Novruzovla bir çox mövzularda söhbətlərimiz oldu. Təbii ki, ən vacib məsələ rayonun sosial-iqtisadi inkişafı ilə bağlı görülən işlərin, qazanılan uğurların, tarixi hadisəyə çevrilmiş unudulmaz günlərin xatırlanması, qarşıda duran vəzifələrdən söhbət açılması idi. Söhbətimiz də məhz elə bu istiqamətdə davam etdi.

Novruz müəllimin söylədiklərindən:

- Keçən il rayonumuz üçün də bir çox cəhətdən yadda qalan, əlamətdar il olmuşdur. İqtisadi, sosial, mədəni quruculuq işləri sahəsində nəzərəçarpacaq irəliləyiş əldə edilmiş, rayon mərkəzi, kəndlərimiz xeyli abadlaşmış, sosial əhəmiyyətli bir çox vacib məsələlər öz həllini tapmışdır. 2011-ci il cənab Prezidentin rayonumuza səfəri ilə şabranlılar üçün də əlamətdar olmuşdur. Azərbaycan vətəndaşlarına qayğını gündəlik fəaliyyət prinsiplərindən biri kimi həmişə diqqət mərkəzində saxlayan möhtərəm prezidentimiz səfər zamanı rayonumuzda son illərdə aparılan abadlıq, quruculuq işləri ilə yaxından tanış olmuş, Heydər Əliyev Mərkəzi, Şabran Tarix Diyarşünaslıq Muzeyi, Uşaq Yaradıcılıq Mərkəzi, Mədəniyyət Sarayı və 80 çarpayılıq rayon Xəstəxanasının yeni binasının istifadəyə verilməsində iştirak etmişdir. Dövlət başçısı rayonumuzun ərazisində tikilən dövlət əhəmiyyətli layihə olan Vəlvələçay-Taxtakörpü kanalının istismara hazır olan 10,7 kilometrlik birinci hissəsinin açılışında iştirak etmiş, "Taxtakörpü" Su anbarında aparılan tikinti işlərinin gedişi ilə yaxından maraqlanmışdır. Cənab Prezidentin yeni xəstəxananın açılışından sonra rayon ictimaiyyətinin nümayəndələri ilə görüşü zamanı dediyi, "Mən Şabran rayonuna dəfələrlə səfər etmişəm, buraya bir neçə dəfə gəlmişəm, vəziyyətlə tanış olmuşam. Deyə bilərəm ki, rayon çox sürətlə inkişaf etmişdir" sözləri hər birimiz üçün çox dəyərlidir və biz şabranlıları bundan sonra daha yaxşı işləməyə, rayonumuzun inkişaf etmiş qabaqcıl rayonlar səviyyəsinə çıxması üçün bütün səy və bacarıqlarımızı sərf etməyə səfərbər edir...

Əsaslı irəliləyiş

2011-ci ildə rayonda sosial-iqtisadi, abadlıq və quruculuq işlərinin yerinə yetirilməsində əsaslı irəliləyişlər əldə edilmişdir. Azərbaycan Respublikasının Prezidentinin 16 avqust 2011-ci il tarixli sərəncamı ilə Şabran rayonunda abadlıq və quruculuq işlərinin sürətləndirilməsi məqsədilə 2 (iki) milyon manat, Dövlət Neft Fondundan 1(bir) milyon manat vəsait ayrılmışdır. Ayrılmış vəsaitin 1,9 milyon manatı ötən il ərzində ən vacib işlərin yerinə yetirilməsinə sərf edilmişdir. Heydər parkında tikinti və abadlıq işləri başa çatdırılmış, 30 mənzilli 5 mərtəbəli yaşayış binasının əsaslı təmiri yekunlaşmışdır. Şəhərin küçə və meydanlarında 2924 kv.m istinad divarı tikilmiş və 3028 kv.m üzlük daş vurulmuşdur. 2 fəvvarə, 3 söhbətgah, 2 Uşaq Əyləncə Kompleksi tikilmişdir. Şəhərdə piyadaların gedişi üçün 3496 metr yola 1350 kv.m asfalt, 2146 kv.m üzlük daş, park və meydanlara isə 5262 kv.m (cəmi 7408 kv.m) dekorativ üzlük daş döşənmiş, 3728 metr uzunluğunda bardur qoyulmuşdur.

Şəhərin 4,2 km uzunluğunda 4 küçəsinə, park və meydanlarda isə 4,8 km uzunluğunda müasir işıqlanma sistemi quraşdırılmışdır. 60 mənzilli 5 mərtəbəli daha bir yaşayış binasında təmir-bərpa işləri başa çatmaq üzrədir. Görkəmli Azərbaycan şairi Xaqaninin heykəli ucaldılmış və qarşısında meydan tikilmişdir.

(ardı gələn sayımızda)

MƏZAHİR ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-13 aprel.- S.7.