Ölkə Prezidenti Salyanı təqdir etdi

Ola bilsin ki, hələ bir neçə il öncə bölgələrlə bağlı hökumətin çıxardığı qərar bir çoxlarında şübhələr də yaratmışdır. Əslində isə belələri yanılmışdır. İqtisadi potensialı hər gün bir qədər də artan respublika çox düzgün bir proqramla əyalətlərin inkişafına rəvac verdi. Daim diqqətdə saxlanılan regionların sosial-iqtisadi proqramı tezliklə öz nəticəsini ortaya qoydu. İndi Azərbaycanın ən ucqar rayonlarında belə bu iradənin nəticələri görünməkdədir.

Bu barədə təzə söz demək, yazmaq bəlkə də nəyisə təkrarlamaq kimi görünsə də əslində bu məsuliyyətlə həyata keçirilən işlərin nəticəsinin əksidir axı.

Ölkənin regionlarla bağlı həyata keçirdiyi dövlət proqramı yerlərdə bu uğurların qazanılması üçün aparılan abadlıq-quruculuq işləri bu gün göz önündədir. Bununla bağlı indi nəyisə yazmaq, şərh etmək yalnız regionlar haqqında təəssüratların genişlənməsinə xidmət edir.

Bu mənada Salyan rayonunda da son bir ildə həyata keçirilən abadlıq-quruculuq işlərini ölkə ictimaiyyəti müxtəlif televiziya kanalları ilə izləyə bildi.

Azərbaycan Prezidenti İlham Əliyevin Salyan rayonuna etdiyi səfərlə bağlı hazırlanan reportajlarda ürəkaçan məqamlar əks etdirildi.

Ölkə Prezidenti Salyanda

Martın 13-də bu rayonda səfərdə olan Prezident İlham Əliyev öncə rayon mərkəzindəki Heydər Əliyev Parkında Ulu Öndərin abidəsini ziyarət etməklə başladı.

Son bir ildə Salyanda görülmüş abadlıq-quruculuq işləri ilə bağlı ona verilən məlumatdan göründü ki, çoxmərtəbəli binaların fasadları müasir memarlıq üslubunda layiqincə təmir edilmiş, milli ornamentlərlə bəzədilmişdir. Təmir edilən, abadlaşdırılan küçələrə 630 ədəd işıqlandırma dirəyi qoyulmuşdur. Ələt-Astara yolunun Salyan şəhərindən keçən hissəsində 5 kilometr uzunluğunda istinad divarı tikilməklə "Gülbax" daşla üzlənmişdir.

Salyan rayon İcra Hakimiyyətinin və Heydər Əliyev Mərkəzinin tikintisində olan, Heydər Əliyev Fondunun təşəbbüsü ilə tikilən Uşaq Texniki Yaradıcılıq Mərkəzinin açlışında iştirak edən Prezident əsaslı təmirdən çıxmış "Kür " otelinə baş çəkməyi də unutmadı.

1865-ci ildə inşa olunmuş, sonradan müəyyən səbəblərdən uçulub-dağılmış nəhayət, son illərdə əsaslı təmir və bərpa edilmiş Salyan şəhərindəki Cümə məscidində olmağa da vaxt tapan İlham Əliyev Babazanan dağında aşkar edilən müxtəlif dövrlərə aid əmək alətləri, bəzək əşyaları ilə tanış olmuşdur.

İbadət üçün hər bir şəraiti olan məsciddə görülən işlərdən ölkə Prezidenti razı qalmışdır.

Prezident sevincini də gizlətmədi

10 mindən çox əhalinin yol problemini həll edən, uzunluğu 23.5 kilometr, eni 10 metr olan, Prezidentin ehtiyat fondu hesabına təmir edilən Kürsəngi-Yolüstü kənd arası avtomobil yolunun açılışında rəmzi qırmızı lenti kəsən İlham Əliyevə burda aparılan işlər haqqında geniş məlumat verildi. Bildirildi ki, bu yol Kürsəngi, Birinci Varlı, Yolüstü, Yeni Uluxanlı kəndlərinin ərazisindən keçməklə bərabər Peyk və İkinci Varlı kənd sakinlərinə də xidmət edəcək.

Buradakı rayon ictimaiyyətinin nümayəndələri ilə görüşən İlham Əliyev sevincini də gizlətmədi: " Bu gün gördüklərim məni sevindirir. Gözəl binalar, gözəl yollar, iş yerləri, ticarət yerləri. Şəhərin abadlaşması əlbəttəki, çox müsbət haldır.

Kəndlər də abadlaşır. Kəndlərdə insanlar yaxşı yaşamalıdırlar. Qazlaşdırma prosesi gedir. Yəqin ki, gələn ilin sonuna qədər Salyan rayonunun bütün kəndləri qazlaşdırılacaqdır. İçməli su layihələri icra edilir. Elektrik enerjisi ilə bağlı problem yoxdur. Kənd yollarının tikintisi gedir. Salyanda əvvəlki dövürdə Mərkəzi Rayon Xəstəxanası yenidən qurulmuşdur, Olimpiya İdman Kompleksi, böyük elektrik yarımstansiyası tikilmişdir. Növbəti illərdə rayonun uğurlu inkişafı üçün əlavə tədbirlər görüləcəkdir".

Heç şübhəsiz ki, ölkə Prezidentinin bu çıxışı xüsusən son bir ildə Salyanda aparılan abadlıq-quruculuq, təmir -tikinti işlərinə yüksək bir qiymət idi.

Həm də onun 2011-ci il 19 aprel tarixli Sərəncamı ilə ayırdığı 2 milyon manat vəsaitin təyinatı üzrə səmərəli istifadə edildiyindən doğan razılıq duyğusu ayrıca hiss edilirdi. Bu səmimi görüşdə Prezident çox incə mətləblərə də toxundu: " Mən Salyanda tez-tez oluram. Bir məqamı da xatırlamaq istəyirəm ki, mən 2003-ci ilin prezident seçkiləri kampansiyasını məhz Salyandan başlamışam. Ulu Öndər də seçki kampaniyasını 1998-ci ildə məhz Salyandan başlamışdır. Bu gün isə sizinlə bərabər bu gözəl hadisəni qeyd edirik. Yenə də deyirəm bu, mənim Prezident kimi Salyana beşinci, ya altıncı səfərimdir. Bundan sonra açılışlar çox olacaq. Gözəl tədbirlər olacaqdır".

Görüşün sonunda İlham Əliyevlə xatirə şəkli çəkdirən Prezidenti gözəl əhval -ruhiyyə ilə yola salan salyanlılar bir daha əmin oldular ki, ölkə başçısı hələ onlarla çox görüşəcəkdir.

(ardı var)

Səxavət Məmmədli

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-17 aprel.-S.7.