"Azərbaycan bayrağı Xankəndidə və Şuşada dalğalanacaq"

"Buna tam əminəm: bizə qarşı informasiya müharibəsi aparılır"

Qlobal informasiya məkanında informasiyalarla bərabər, təxribatlar da kifayət qədər çoxdur. Bu təxribatlar bəzi hallarda açıq, bəzi hallarda məxfi, yəni, gizli xarakter daşıyır". Nazirlər Kabinetinin bu ilin birinci rübünün yekunları ilə bağlı aprelin 16-da keçirdiyi müşavirədə Azərbaycan prezidenti İlham Əliyevin növbəti dəfə maraqlı çıxışı olub. Prezident ölkənin iqtisadi-siyasi, sosial-mədəni həyatını xarakterizə edib.

İlham Əliyev Azərbaycanın informasiya müharibəsinə məruz qaldığını bildirib. Dövlət başçısı bəyan edib ki, bu informasiya müharibəsinin aparılması işində, əlbəttə ki, ilk növbədə, erməni lobbisi öz fəallığı ilə seçilir: "Getdikcə informasiya təhlükəsizliyi məsələləri daha da çox aktuallaşır. Bizə qarşı informasiya müharibəsi aparılır. Bu, həqiqətdir. Mən buna tam əminəm, bu barədə iki fikir ola bilməz. Azərbaycanı qaralamaq, reallıqlarını danmaq, Azərbaycanı geridə qalmış, antidemokratik ölkə kimi dünyaya təqdim etmək cəhdləri, ilk növbədə, erməni lobbisinin çirkin əməllərindən qaynaqlanır. Onların təsir dairəsi kifayət qədər genişdir, müxtəlif ölkələrin aparıcı mətbu orqanlarında təmsil olunurlar. Bəzən başqa familiyalarla təmsil olunurlar, öz mənşəyini gizlədirlər. Bu, indi ikinci məsələdir. İnsan öz milli mənsubiyyətini gizləməməlidir. İstənilən insan öz milli mənsubiyyəti ilə fəxr etməlidir. Amma onlar başqa ölkələrdə nədənsə bu sahədə də seçilirlər".

Prezident deyib ki, Azərbaycan azad internetin olduğu ölkələrdəndir: "Bunu, bəzən bizi tənqid etmək istəyənlər unutmasınlar. İnternet istifadəçilərinin sayı getdikcə artır, 50 faizdən çoxdur".

İlham Əliyev onu da vurğulayıb ki, erməni lobbisi bəzi hallarda Azərbaycana qarşı açıq kampaniya aparır. Çalışırlar ki, Azərbaycanın imicinə koordinasiya edilmiş şəkildə xələl gətirsinlər: "Onların fəaliyyəti məqsədyönlüdür və bu gün erməni lobbisi üçün bir nömrəli hədəf Azərbaycandır. Bizim üçün də, bir daha demək istəyirəm ki, bir nömrəli düşmən erməni lobbisidir. Biz bu mübarizəyə də hazır olmalıyıq".

"Erməni lobbisi təşkilatlanmış çox aqressiv və mənfi qüvvədir"

Ölkə başçısı son illərdə vəziyyətin böyük dərəcədə dəyişdiyini bildirib: "Azərbaycanın diaspor təşkilatları, bizim sağlam qeyri-hökumət təşkilatlarımız, Azərbaycanın xaricdəki səfirlikləri, bizim ictimaiyyətimiz, xarici mətbuata çıxış imkanlarımız və mövqeyimiz güclənir. Ancaq hələ ki, biz reallıqları da nəzərə almalıyıq. Erməni lobbisi Avropada və başqa ölkələrdə, böyük ölkələrdə onilliklər, bəlkə əsrlər boyu fəaliyyət göstərir, təşkilatlanmış çox aqressiv və mənfi qüvvədir. Bizə qarşı, necə deyərlər, mənfi informasiyanın təkanvericisi erməni lobbisidir. Erməni lobbisinin təsiri altında olan, onların çirkli pulları ilə dolanan bəzi ölkələrin siyasi xadimləridir. Biz onların adlarını bilirik, onları tanıyırıq. Onların qondarma "Dağlıq Qarabağ respublikası"na səfərlərinin sayına baxmaq kifayətdir ki, hər bir adam bilsin, nə üçün onlar oraya gedirlər. Bu, ikinci qüvvədir".

Prezident vurğulayıb ki, üçüncü qüvvələr də var: "Əfsuslar olsun ki, bəzi ölkələrdə islamofobiya meyilləri güclənir. Bu da reallıqdır. Çox mənfi reallıqdır, ancaq reallıqdır. Biz də bu reallıqla hesablaşmalıyıq. İslamofobiya meyilləri gücləndikcə müsəlman ölkələrinə münasibət də mənfi istiqamətə gedir. Biz bunu bilməliyik və deməliyik. İslamofobiya xəstəliyinə yoluxmuş siyasətçilərin sayı artmaqdadır. Bu qüvvələr müsbət mənada seçilən, öz müasirliyi, müstəqil siyasəti ilə fərqlənən, islam dəyərlərinə sadiq olan ölkə kimi Azərbaycanı görəndə, əlbəttə ki, sevinmirlər, məyus olurlar. Biz bu amili də daim nəzərdə saxlamalıyıq və çalışmalıyıq ki, bu vəziyyəti öz siyasətimizlə xeyrimizə dəyişdirək".

"Dünya ictimaiyyəti BMT-dir.BMT də bizi dəstəkləyir"

Prezident Azərbaycana qarşı informasiya müharibəsi aparan digər qüvvələrin Azərbaycanın müstəqil siyasətini qəbul etməyənlər olduğunu deyib: "Onlara elə gəlir ki, Azərbaycan kimi ölkə müstəqil siyasət aparmamalıdır. Kiminsə qanadının altına keçməlidir və müstəqil siyasətə malik olmamalıdır. Elə qüvvələr də var ki, biz onları tanıyırıq. Onların Azərbaycana qarşı gizli mübarizəsi gedir. Bu mübarizəni bəzi hallarda açıq yox, qorxaqcasına informasiya məkanında aparırlar".

Prezident Azərbaycanın müstəqil siyasətinin, beynəlxalq məsələlərlə bağlı qəti mövqeyinin dünya birliyi tərəfindən dəstəkləndiyini vurğulayıb: "BMT Təhlükəsizlik Şurasına seçilməyimiz bizim böyük təntənəmizdir, zəfərimizdir. Bizi 155 ölkə dəstəklədi. Budur, dünya ictimaiyyəti. Dünya ictimaiyyəti hansısa regional təşkilat deyil. Dünya ictimaiyyəti BMT-dir. BMT də bizi dəstəkləyir".

"Biz hər bir əsassız hücuma cavab verməliyik, veririk və verəcəyik"

Prezident bəzi qüvvələrin Azərbaycanın siyasətindən qıcıqlandığını qeyd edib: "Onlar yeni imkanlardan istifadə edib informasiya təxribatları ilə məşğul olmağa çalışırlar, yalan, böhtan xarakterli məlumatları ötürürlər. Mətbuat hazırda, nəinki informasiya mənbəyidir, eyni zamanda, təxribat mənbəyidir. Əfsuslar olsun ki, bu, belədir. Biz isə öz növbəmizdə buna hazır olmalıyıq. Biz hazırıq. Biz hər bir əsassız hücuma cavab verməliyik, veririk və verəcəyik".

Dövlət başçısı Azərbaycana qarşı informasiya təxribatlarının bu faktlarla məhdudlaşmadığını qeyd edib: "Elə qüvvələr var ki, bölgədə vəziyyəti qarışdırmaq istəyirlər. Elə qüvvələr var ki, Azərbaycanı öz qonşuları ilə üz-üzə qoymaq istəyirlər. Burada da informasiya təxribatlarından istifadə edilir. Başqa necə istifadə edə bilərlər?! Mümkün deyil. Çünki qonşularımızla əlaqələrimiz tarixi köklərə söykənir. Biz bütün qonşularla, - Ermənistan təbii ki, istisna olmaqla, - normal, yaxşı dostluq münasibətləri yaratmışıq və bu dostluq münasibətlərini gücləndiririk, gücləndirəcəyik. Heç bir qonşumuzla problemimiz yoxdur".

"Kim istəyir, Azərbaycanı qarşıdurma arenasına çevirsin,gedib özünə başqa yer axtarsın"

"Azərbaycan heç vaxt başqa ölkələrin planlarında iştirak etməyəcək. Mən bunu dəfələrlə demişəm" deyən dövlət başçısı hələ prezidentlik dövrünün əvvəlindəki bəyanatını xatırladıb: "Azərbaycan qarşıdurma arenasına çevrilməyəcək. Kim istəyir, Azərbaycanı qarşıdurma arenasına çevirsin, gedib özünə başqa yer axtarsın. Biz heç vaxt imkan verə bilmərik ki, ərazimizdən qonşulara qarşı hansısa mənfi planlarda istifadə edilsin və bunu hamı bilir. Belə olan halda yenə gəlir informasiya təxribatı məsələləri. Mötəbər, dünya səviyyəli mətbu orqanlarda çirkin yalanlar dərc edilir. Sonra bu yalanları təsir altında olan digər mətbu orqanlar yayır. Beləliklə, rəy formalaşır. Yaxud da ki, formalaşdırmağa çalışırlar ki, Azərbaycan bölgədə hansısa başqa planlara malikdir".

Prezident Azərbaycanın bölgədə sülh, sabitlik, əmin-amanlıq olmasını, qonşularla münasibətlərin prioritet xarakter daşıdığını bildirib: "Biz bu bölgədə yaşayırıq və yaşayacağıq. Mən qonşulardan da Azərbaycana ancaq müsbət münasibət görürəm və buna çox şadam. Ona görə, biz bunu bilməliyik, bu barədə açıq deməliyik və buna qarşı biz öz prinsipial mövqeyimizi qoymalıyıq və qoyuruq".

"Xocalıda soyqırım törədənlər faşistlərdir,bunun başqa adı ola bilməz"

İlham Əliyev həmçinin diqqətə çatdırıb ki, bütün beynəlxalq tədbirlərdə Azərbaycanın hər zaman ölkənin baxışlarını, mövqeyini və siyasi xəttini ifadə edib, Ermənistan-Azərbaycan, Dağlıq Qarabağ münaqişəsi ilə bağlı həqiqətləri, torpaqlarımızın işğal altında qalması və bir milyon soydaşımızın əziyyət çəkməsi məsələlərinə toxunaraq, dünya birliyinin diqqətini bu məsələlərə yönəldib: "Bütün tədbirlərdə Ermənistanın işğalçı siyasətini ifşa etmişəm, edəcəyəm. Münaqişənin həlli ilə bağlı bizim prinsipial mövqeyimiz dəyişməz olaraq qalır. Azərbaycanın ərazi bütövlüyü qeyd-şərtsiz bərpa edilməli, işğalçı qüvvələr torpaqlarımızdan geri çəkilməlidir. Beynəlxalq birlik tərəfindən tanınan ərazi bütövlüyümüz tam şəkildə bərpa ediləcək. Mən buna şübhə etmirəm".

Bakıda Avronest Parlament Assambleyasının ikinci sessiyasının keçirildiyini xatırladan ölkə başçısı bu sessiyanın Avropa İttifaqının xaricində ilk dəfə keçirildiyini vurğulayıb: "Sessiya çox yüksək səviyyədə keçirildi və yenə də bu, bizə imkan verdi ki, Avropa Parlamenti deputatlarına birbaşa müraciət edərək, Azərbaycanın həm gördüyü işlər, həm mövqeyi haqqında məlumatı verək, xüsusilə Ermənistan-Azərbaycan, Dağlıq Qarabağ münaqişəsinin tarixi və həqiqətləri, azərbaycanlılara qarşı törədilən soyqırımı, erməni faşizmi haqqında mövqeyimizi bildirək. Xocalıda o qanlı faciəni, soyqırımını törədənlər faşistlərdir, bunun başqa adı ola bilməz. Mən bu imkanlardan istifadə edərək həm həqiqətləri, həm Azərbaycanın mövqeyi və gələcəyə ümumi baxışları haqqında fikirlərimi bildirmişdim. Bizim xarici siyasətimiz açıqdır, aydındır və birmənalıdır. Bölgədə, dünyada rolumuz artır. Bu, həqiqətdir və bu həqiqətlə hesablaşmaq lazımdır".

"Gün gələcək Azərbaycan bayrağı Xankəndidə və Şuşada dalğalanacaq"

Ölkənin hərbi potensialının gücləndiyini deyən prezident bu sahəyə böyük diqqət göstəriləcəyini bildirib: "Biz güclü hərbi sənaye yaradırıq, eyni zamanda, böyük həcmdə hərbi texnika, silah, sursat alırıq və alacağıq. Mən hələ hava hücumuna qarşı silahlardan danışmıram, tanklar, artilleriya qurğuları, döyüş təyyarələri, müxtəlif silahlar, döyüş aparmaq üçün lazım olan bütün müasir ləvazimatlar alınır və alınacaq. Deyə bilərəm ki, hər bir yerdə olduğu kimi, bu sahədə də biz şaxələndirilmiş siyasət aparırıq, bir istehsalçıdan asılı deyilik. Bu sahədə bizimlə əməkdaşlıq etmək istəyən ölkələrin sayı artır və imkanımız var. Biz bəzi başqa ölkələrdən fərqli olaraq heç nəyi müftə almırıq, pulla alırıq və bu siyasət davam edəcək. Azərbaycanın artıq güclü ordusu var. Bütün silahlı qüvvələr bu gün istənilən vəzifəni - ölkəmizin bütün maraqlarını müdafiə etmək üçün hazırdırlar, buna qadirdirlər. Dağlıq Qarabağda və işğal edilmiş torpaqlarda Azərbaycanın suverenliyini bərpa etməyə hazırdırlar. Sadəcə olaraq biz istəyirik ki, bunu qan tökülmədən, sülh, danışıqlar yolu ilə edək və hər an, hər gün biz qələbəyə yaxınlaşırıq. Hər gün Ermənistan daha da böyük tənəzzülə uğrayır, Azərbaycan daha da güclənir. Biz hər gün qələbə gününü yaxınlaşdırırıq. Gün gələcək Azərbaycan bayrağı Xankəndidə və Şuşada dalğalanacaq".

"Özünü hörmətli mətbu orqan sayan telekanallar, qəzetlər təxribata qarışırlar"

İlham Əliyev bəzi xarici mətbuat orqanlarında Azərbaycanın əleyhinə dərc olunan böhtan xarakterli yazılardan da danışıb: "Qanunsuz tikilmiş binaların köçürülməsi ilə bağlı spekulyasiyalara yol verilir, xüsusilə xarici mətbuatda. Bu da Azərbaycana qarşı bir növ qaralama kampaniyasının tərkib hissəsidir. Təəssüf edirəm ki, özünü hörmətli mətbu orqan sayan telekanallar, yaxud da ki, qəzetlər bu təxribata qarışırlar. Azərbaycanda verilən kompensasiya ən yüksək səviyyədədir. Hər kvadratmetrinə görə 1500 manat vəsait ödənilir. Deyə bilərəm ki, kompensasiya alanların mütləq əksəriyyəti bu məbləğlərlə razıdırlar. Amma təxribatçı qüvvələr var ki, bundan öz məqsədlərinə çatmaq üçün istifadə etmək istəyirlər. Şəhərin ümumi abadlaşma prosesi hansısa tədbirlə əlaqədar deyil. Bizim ümumi xəttimiz, siyasətimiz, şəhərsalma proqramlarımız var".

Ölkə başçısı Bakının yeni şəhərsalma konsepsiyasını təsdiq etdiyini xatırladaraq, yenilik, quruculuq və köçürmə proseslərinin əvvəlki dövrdən müəyyən edilmiş qaydada aparıldığını vurğulayıb: "Bunun heç bir beynəlxalq tədbirlə əlaqəsi yoxdur. Biz nə qədər mümkündür hər yerdə parklar, yaşıllıq zolaqları salırıq. Şəhərin mərkəzindən köçürülən ərazilərdə avtomobil dayanacaqları, yeraltı avtomobil dayanacaqları yaradılır. Buna böyük ehtiyac var. Onun üstündə gözəl yaşıllıq zolaqları, parklar, ictimai yerlər tikilir və biz bu siyasəti davam etdirəcəyik".

"Texnoparkların yaradılması istiqamətində çox təsirli və ciddi addımlar atılmalıdır"

Prezident neft-kimya sənayesindəki yeniliklərə də diqqət çəkib. İlham Əliyev bildirib ki, neft-kimya, neftayırma və qaz emalı zavodlarının qurulmasına qoyulan investisiya 10 milyard manatdan artıq ola bilər: "Bu il texnoparkların yaradılması istiqamətində çox təsirli və ciddi addımlar atılmalıdır. Artıq təcrübə də var, Sumqayıt Texnoparkı çox gözəl təcrübədir. İndi Gəncədə, Balaxanıda və Sumqayıtda buna oxşar yeni texnoparkların salınması prosesi gedir. Mən hesab edirəm ki, bu il biz artıq konkret işlərə başlamalıyıq. Yeni texnoparkların yaradılmasına özəl sektorun dəstəyi ilə nail olunacaq".

Kənd təsərrüfatı sahəsində ciddi işlər görüldüyünü deyən ölkə başçısı bu sahənin inkişafı üçün müasir texnologiyaların tətbiqinin vacibliyini qeyd edib. Bu sahədə aqroservislərin qurulmasına xarici investorların da maraq göstərdiyini vurğulayan prezident bu sahəyə yerli investorların da cəlb edilməsinin lazımlığını qeyd etməklə, yeni aqroservislərin yaradılması ilə bağlı təkliflərin hazırlanması barədə tapşırıq verib: "Subsidiyalarla, dövlət tərəfindən verilən güzəştlərlə bağlı yeni təkliflər verilməlidir. Birinci mərhələdə biz kənd təsərrüfatını, xüsusilə taxılçılığı stimullaşdırmaq üçün bu subsidiyaları ayırdıq. Həm yanacağa, həm gübrələrə, eyni zamanda, əkilən məhsullara hektarbaşı subsidiyalar pul şəklində verilir. Bu, çox müsbət təşəbbüs idi və işgüzarlığın artmasına böyük təkan verdi. Mənim təklifim ondan ibarətdir ki, biz bu subsidiyaları daha da təkmilləşdirək. Söhbət ondan getmir ki, bunu azaldaq, yaxud da ki, aradan götürək. Yox, əksinə, söhbət ondan gedir ki, bunlar daha da səmərəli şəkildə işləsin. Bəlkə buna daha da böyük məbləğ ayrılsın. Ancaq verilən subsidiyalara görə nəticə daha da təsirli olsun. İndi subsidiyaların həcmi verilən nəticə ilə uyğun gəlmir. Nəticə daha da çox və təsirli olmalıdır".

Ərzaq təhlükəsizliyi məsələsinə toxunan ölkə başçısı burda ərzağın keyfiyyətinin də nəzərdə tutulduğunu bildirib: "Son zamanlar bu sahədə ciddi dönüş yaradılıb. Əvvəlki dövrdə deyə bilərəm ki, bu sahə ümumiyyətlə diqqətdən kənarda qalmışdı və yoxlamaları aparan qurumlar əfsuslar olsun ki, vəzifə borclarını layiqincə yerinə yetirmirdilər. Onların yoxlamaları formal xarakter daşıyırdı. Yaxud da ki, gedib hansısa yoxlamanın aparılmasından sonra onlar qanunsuz tələblərdə də iştirak edirdilər. Beləliklə, həm yerli, həm xarici keyfiyyətsiz məhsullar bizim bazarımızı bürümüşdü".

Prezident bu sahədə həm bazar, həm də idxala nəzarətin güclü olmasının vacibliyini qeyd edib.

"Bəzi kanalların insanlara verdikləri təkliflər çox məyusedicidir"

Prezident deyib ki, insan sağlamlığına təhlükə olan keyfiyyətsiz ərzaqlardan danışarkən, televiziya kanallarındakı mətbəx proqramlarına toxunmaya bilmir: "Bizim televiziyaların, demək olar ki, hamısı indi mətbəxlə, yeməklərin bişirilməsi, hazırlanması ilə bağlı verilişlər təqdim edirlər. Birincisi onu demək istəyirəm ki, bu da xaricdən gələn bir meyildir. O ölkələrdə ki, evlərdə yemək bişirilmir, onlar üçün bəlkə bu, daha da aktualdır. Azərbaycanda evlərdə bişirilən yemək, indi istənilən restorandan daha da yaxşıdır, ləzzətlidir. Amma bu, bir dəbdir, bizə də gəlib çatıb. Mən etiraz etmirəm, olsun. Ancaq bir şərtlə ki, orada göstərilən reseptlər və yeməklərin bişirilmə qaydaları insanların sağlamlığına mənfi təsir göstərməsin. Mən o verilişlərə hərdənbir baxıram və bəzi hallarda çox ürək ağrısı ilə görürəm ki, indi yağın içində üzən yeməklər təbliğ edilir. Axı olmaz. Bu yeməkləri gündə yeyən insan xəstələnəcək. Yəni, nə qədər gülməlidisə, bir o qədər də faciəvidir. Biz sağlam həyat tərzini təbliğ edirik, insanları pis vərdişlərdən çəkindiririk, idmanı təbliğ etdiyini, siqaret çəkənə müsbət münasibət ola bilməz. Alkoqollu içkilərə aludə olanlar qınaq obyektinə çevrilməlidir. Belə olan halda, bizim bəzi kanalların insanlara verdikləri təkliflər əlbəttə ki, çox məyusedicidir".

Prezident özəl kanalların siyasətinə qarışmaq fikrində olmadığını deyib: "Ancaq məsləhət verə bilərəm ki, insan orqanizmi üçün sağlam reseptləri daha çox tətbiq etsinlər".

Ölkə başçısı daha sonra qeyd edib ki, bu il məcburi köçkünlərin yaşayış səviyyəsinin yaxşılaşdırılması üçün Neft Fondundan 300 milyon manat vəsait ayrılıb, Azərbaycan enerji təhlükəsizliyi ilə bağlı məsələləri uğurla həll edib, dənizkənarı zolaq Zığa qədər davam etdiriləcək, su və kanalizasiya layihələrinin icrası bütün ölkə üzrə gedir və 2014-cü ildə başa çatdırılacaq, kəndlərdə belə, əhalinin təmiz su ilə təmin olunması üçün modul tipli sutəmizləyici qurğular quraşdırılacaq.

"Korrupsiya ilə mübarizə bir gün,bir dəqiqə səngiməməlidir"

"Bu il və gələn il əmanətlərin qaytarılması prosesi aparılacaq, əlbəttə inflyasiyaya daha da böyük təkan verə biləcək amillər də olacaq. Əlavə yükdür, 1 milyard manata yaxın vəsait dövriyyəyə buraxılacaq. Elə etməliyik ki, istehsal qiymətlərinə nəzarət daha da güclü olsun".

Bunu da Nazirlər Kabinetinin bu ilin ilk rübünün yekunlarına həsr olunmuş müşavirəsində İlham Əliyev bildirib. Prezident nəzarətin güclənməsinin istehsal qiymətlərinin səviyyəsini sabit saxlamağa imkan verdiyini deyib. Onun sözlərinə görə, müvafiq qurumların ənənəvi bayram ərəfəsində qiymətlərin qalxmaması üçün gördükləri tədbirlər də bəhrəsini verir: "Əvvəlki illərdə bayram ərəfəsində qiymətlər qaldırılırdı və bayramdan sonra da enmirdi. Hər ildə ən azı iki dəfə qiymətlər süni şəkildə şişirdilir. Biz bu xoşagəlməz meyillərlə ciddi mübarizə aparırıq və aparacağıq. Qiymətləri süni şəkildə şişirtmək istəyənlərə qarşı mübarizə daha ciddi olmalıdır. Onlara qarşı cəza tədbirləri daha da təsirli olmalıdır".

Prezident təqaüd islahatlarının bundan sonra da aparılacağını deyib: "Hazırda Azərbaycanda orta pensiyanın səviyyəsi 150 manat və ya 190 dollardır. Orta maaş 370 manat, yəni 470 dollardır. Bu, artır, getdikcə daha da artacaq və beləliklə, qiymətlərin normal səviyyədə qalmasına daim diqqət göstərilməlidir".

Ölkədə maaş və təqaüdlərin əsasən plastik kartlarla ödənildiyini deyən ölkə başçısı lakin vəsaitin daha dərhal nağd halda çıxarıldığını bildirib. Bunun birinci səbəbi psixolojidirsə, ikinci səbəb həmin kartla əksər yerlərdə alış-veriş etməyin mümkünsüzlüyüdü: "Posterminallar olmadığı üçün bu kartlar sadəcə olaraq bir funksiyanı daşıyırdı ki, pensiyaların, əməkhaqlarının verilməsi zamanı xoşagəlməz hallara son qoyulsun. Çünki hamımız yaxşı xatırlayırıq ki, əvvəllər maaş, pensiya kassirlər vasitəsilə verilirdi və xoşagəlməz hallar kifayət qədər çox idi. Əslində bu, bir ənənəyə çevrilmişdi. Hər bir maaş alan özünü borclu hesab edirdi ki, kassirə maaşından pul versin. Nə üçün o pulu verməli idi?! O, kassirin babasının puludur?! O, dövlətin puludur. Ancaq bir ənənə yaranmışdı və bu, geniş vüsət almışdı. Biz hamımız bunu yaxşı bilirik. Maaşların, pensiyanın plastik kartlarla verilməsi buna son qoydu".

Ölkə başçısı deyib ki, vəsaitin kartla verilməsi həm də ölkədə nağdsız ödəmələrin genişlənməsinə yol açmalıdır, bunun üçün isə posterminalların geniş tətbiq edilməsinə ehtiyac var.

Prezident korrupsiyaya və rüşvətxorluğa qarşı mübarizənin ciddi aparılmasının vacibliyini bildirib: "Həm inzibati, həm də cəza tədbirləri gücləndirilməlidir. Eyni zamanda, sistem xarakterli, institusional xarakter daşıyan islahatlar daha da sürətlə aparılmalıdır. Mübarizə bir gün, bir dəqiqə səngiməməlidir".

Elektron xidmətlərin geniş tətbiq edilməsinin korrupsiya və rüşvətxorluğa qarşı mübarizədə böyük amil olduğunu deyən prezident İlham Əliyev bütün qurumların elektron xidmətlər göstərməsi üçün sərəncam imzalandığını xatırladıb: "Mənə bu yaxınlarda verilən arayışa görə, heç də hər yerdə bu, belə deyil. Elə qurumlar, nazirliklər var ki, tam şəkildə elektron xidmətləri göstərirlər. Məndəki siyahıda elə qurumlar var ki, elektron xidmətləri qismən göstərirlər. Elə qurumlar da var ki, ümumiyyətlə, elektron xidmət göstərmirlər. Mən o qurumların adlarını hələ ki, çəkmək istəmirəm, iki həftə vaxt verirəm, hər bir dövlət qurumunda elektron xidmət yaradılmalıdır. Mənim sərəncamlarım şərtsiz və yubanmadan icra edilməlidir. Sərəncam verilir və hər kəs bilməlidir ki, sərəncamın icrasına nəzarət də var və bu nəzarət güclüdür".

"Təkliflər reallıqlara əsaslanmalıdır"

Prezident 2012-ci ilin birinci rübünün sosial-iqtisadi inkişafının yekunlarını özündə əks etdirən statistikanı da sadaılayıb. Məlum olub ki, bu ilin ilk rübündə ümumi daxili məhsulun 0,5 faiz, qeyri-neft sektorunda ümumi daxili məhsul 7,7 faiz artdığını bildirib.

Prezident ümumi sənaye istehsalının 0,3 faiz azaldığını, qeyri-neft sənayesinin 16,5 faiz artdığını deyib.

İnflyasiyanın cəmi 3,1 faiz olduğunu vurğulayan dövlət başçısı əhalinin pul gəlirlərinin təxminən 14 faiz olduğunu vurğulayıb. Onun sözlərinə görə, bu ilin dövlət büdcəsi 20 milyard dollardan çoxdur, icmal büdcə təqribən 25 milyard dollara bərabərdir.

Prezident Azərbaycanın qlobal məsələlərin həllində siyasi güc kimi iştirak etdiyini, həmçinin maliyyə resurslarını nəzərə alaraq maliyyə gücü kimi də iştirak etməsinin lazımlılığını deyib. Ölkə başçısı Dövlət İnvestisiya Proqramının ilin sonuna kimi tam icra edilməsinin vacibliyini qeyd edib: "Son illərin reallıqları bundan ibarətdir ki, biz bəzi hallarda Dövlət İnvestisiya Proqramını tam şəkildə icra edə bilmirik. Çünki bəzi hallarda vəsait bizim texniki imkanlardan artıqdır. Yaxud da ki, bəzi hallarda müvafiq nazirliklər və dövlət qurumlarının hökumətə verdikləri sifarişlər o qədər böyük olur ki, onların icrasını il ərzində təmin edə bilmirlər. Biz buna da diqqət yetirməliyik. Real sifarişlər verilməlidir. Hər bir nazirlik, hər bir dövlət qurumu öz imkanlarını ölçüb-biçməlidir, qeyri-real təkliflər verməməlidir. Mən başa düşürəm, hər bir qurum, hər bir nazirlik istəyir ki, onun sahəsində daha da sürətli işlər getsin və beləliklə, Dövlət İnvestisiya Proqramı formalaşdıqda daha da böyük təkliflər irəli sürürlər. Ancaq bu təkliflər reallıqlara əsaslanmalıdır".

Dövlət başçısı hər bir qurum və məmurun Dövlət İnvestisiya Proqramını tam, vaxtında və yüksək keyfiyyətlə icra etməsinin vacibliyini vurğulayıb. Ölkədə icra edilən böyük infrastruruktur layihələrinin 2014-cü ildə tam başa çatdırılmalı olduğunu, bundan sonra Dövlət İnvestisiya Proqramına yeni prizmadan yanaşılacağını deyib.

Ölkə başçısı Azərbaycan dövlətinin sovet dövründə yığılan əmanətlərə cavabdehlik, məsuliyyət daşımadığını, lakin dövlətin siyasətində insan amilinin diqqət mərkəzində olmasını nəzərə alaraq, belə bir sərəncam imzalandığını xatırladıb: "Hələ 1992-ci ildə milli valyutaya keçid dövründə on sovet rublu bir Azərbaycan manatı nisbətində əvəz olunub - birə on. 2006-cı il yanvarın 1-də manatın denominasiyası həyata keçirilib. Beləliklə, beş min Azərbaycan manatı - köhnə manat bir yeni manata bərabər olub. Buna baxmayaraq, hazırda min rublu olan əmanətçiyə 150 manat, yaxud da ki, 180 dollara yaxın kompensasiya ödənilir. İki min rublu olan 300 manat, yaxud da ki, 400 dollar alacaq. Bu cədvəli davam etdirmək olar. Yəni, bu, özlüyündə onu göstərir ki, ən yüksək əmsal və ən qısa dövr Azərbaycandadır. Bu, bir daha Azərbaycan dövlətinin həmin məsələyə nə qədər həssas olduğunu göstərir. Mən bilirəm ki, Azərbaycan vətəndaşları bu təşəbbüsü alqışlayırlar".

"Biz öz yolumuzla gedəcəyik-müstəqillik, azadlıq yolumuzla"

Ölkə başçısı "Eurovision" mahnı müsabiqəsi ilə bağlı xarici mətbuatda aparılan çirkin kampaniya da münasibət bildirib: "Azərbaycan hansı ölkənin mətbuatında bu kampaniyanın daha sürətlə getdiyini yaxşı bilir. Elə ölkələr var ki, orada nəinki hər həftə, hər gün Azərbaycan ilə bağlı çirkin, böhtan xarakterli yazılar gedir. Təbii ki, bu, əlaqələndirilmiş şəkildə aparılan siyasətdir. Ancaq bu siyasətin heç bir nəticəsi yoxdur və olmayacaq. Çünki bizim siyasətimizə təsir edə biləcək qüvvə yoxdur və nə qədər ki, mən bu kürsüdəyəm heç vaxt olmayacaq. Biz öz yolumuzla gedəcəyik. Müstəqillik yolumuzla, azadlıq yolumuzla gedəcəyik!"

Azərbaycanda bütün azadlıqlar olduğunu vurğulayan prezident "Bizi bəzi hallarda nədəsə, yəni, antidemokratik addımlarda ittiham etmək istəyənlər getsinlər öz ölkələrində nə baş verdiyini görsünlər. Orada hər gün, hər həftə nümayişə çıxan insanlar döyülür, əzilir, onların başı partlayır, yüzlərlə nümayişçi həbs edilir. Bu, o ölkələrdir ki, onların bəzi mətbu orqanları Azərbaycana qarşı çirkin kampaniya aparırlar. Yaxşı atalar sözü var bizdə, deyir: "Öz gözündə tiri görmür, başqasının gözündə tükü seçir". Bax, yerinə düşər bu atalar sözü" deyə, əlavə edib.

Prezident Azərbaycanda demokratiya, söz və vicdan azadlığı, sərbəst toplaşmaq azadlığı olduğunu deyib: "Bütün Azərbaycan ictimaiyyəti bunu da gördü ki, ölkəmizdə sərbəst toplaşmaq azadlığı var. Əgər bütün bu imkanlardan istifadə etmək istəyənlər normal davranış qaydalarını gözləsələr, şəhər meriyasının göstərdiyi yerdə öz tədbirlərini keçirsələr, onda sərbəst toplaşmaq hüququndan yararlana bilərlər. Mən hesab edirəm ki, şəhər meriyası çox müdrik addımlar atıb və nümayişlər, mitinqlər üçün ən məqbul, yəni, o insanlar üçün ən məqbul və onlara yaraşan yeri seçib. O yerdə istənilən tədbiri keçirmək mümkündür. Bu tədbirlər məhz o yerdə keçirilməlidir".

Prezident ölkənin gələcək planlarından da danışıb: "Biz inamla qabağa gedirik. Bizə qarşı təxribatlar bundan sonra da olacaq. Bizə qarşı informasiya mübarizəsi bundan sonra da aparılacaq. Bu, bizi narahat etmir. Sadəcə olaraq, biz bu barədə danışmalıyıq, öz tədbirlərimizi görməliyik, Azərbaycan xalqının xoşbəxt gələcəyini təmin etməliyik".

Anar İSAOĞLU

Ədalət.-2012.-18 aprel.-S.3.